Ерихоның жеңилиске ушыраўы
Мухаддес Китап, Ешуа китабы, 5-6 баплар
Израиллылардан қорққанлығы себепли Ерихо халқы қаланың дәрўазаларын жаўып таслады. Ол арқалы ҳеш ким шықпады да, кирмеди де. Жаратқан Ийе Ешуаға былай деди:
– Мен Ерихо қаласын, оның патшасын ҳәм жаўынгерлерин саған тәслим қыламан. Сен пүткил әскерлериң менен бирге алты күн даўамында қала дөгерегин күнине бир мәртебе айланып шығыўың керек. Кәрнай көтерген жети руўханий сандықтың алдында жүрсин. Жетинши күни қаланың дөгерегин жети мәртебе айланыңлар ҳәм сонда руўханийлер кәрнайларын шертсин. Руўханийлердиң кәрнайларды узақ созып шерткенин еситкениңизде, пүткил халық бәлент даўыс пенен бақырсын. Сонда қаланың дийўаллары қулап түседи ҳәм ҳәр бир адам турған жеринен туўры қалаға киреди.
Кейин Нун улы Ешуа Қудайдың барлық буйрықларын руўханийлерге ҳәм адамларға жеткерди. Және ол, барлық гүмис ҳәм алтынлар, барлық мыс ҳәм темир затлар Жаратқан Ийеге тийисли екенин айтты. Сондай-ақ Ешуа халыққа Ериходан ҳеш нәрсе алмаўын, өйткени буның жазасы өлим болатуғынын айтып, ескертти. Израил халқы Жаратқан Ийениң айтқанларының ҳәммесин анық етип орынлады. Израил жаўынгерлери жолға шықты. Олардың алдында жети руўханий кәрнайлары менен, олардың изинен Келисим сандығын көтерген руўханийлер ҳәм олардың изинен кәрнай шерткен израиллылар жүрди.
Ешуа өзи буйрық бермегенше, оларға сестин шығармаўды буйырды. Алты күн даўамында олар күнине бир мәртеден қаланы айланып шықты. Жетинши күни ерте таңда олар және сес шығармастан Ерихоны айланып шықты, тек ғана руўхнийлер кәрнайларын шертип жүрди. Халық қаланы жетинши мәрте айланып шыққанда, руўханийлер кәрнайларын шертти ҳәм Ешуа:
– Бақырыңлар!,- деп буйрық берди
Барлық жаўынгерлер қатты даўыслап, бақырысты. Сол ўақытта қаланың дийўаллары силкинип, үлкен таслары жерге қулап баслады ҳәм беккем дийўаллары унырап, қулады. Тек ғана дийўаллардың бир бөлеги, Рахабтың үйи жайласқан жер аман қалды. Израил жаўынгерлери туўры қалаға бастырып кирип барды да, оны тез арада ийелеп алды. Ешуа усы жерге жансыз болып келген еки адамға: «Сол Рахабтың үйине барыңлар. Ант ишкениңиздей, ҳаялды ҳәм оның пүткил жақынларын сыртқа алып шығыңлар», – деди. Үйге кирген жас жансызлар Рахабты, оның ата-анасын, аға-инилерин, ағайинлерин ҳәм оның үйиндеги ҳәмме адамларды алып шығып, Израилдың ордасының жанына, Гилгалға әкелди. Ерихо пүткиллей ўайран болды.
СОРАЎЛАР:
1. Израиллылар Ерихоны неше күн избе-из айланып шығыўы керек еди?
2. Олардың алдында кимлер жүрди? Олар нешеў еди?
3. Не ушын Рахаб ҳәм оның жақынлары қутқарылды?
