Каин ҳәм Абыл
Муқаддес Китап, Жаратылыс китабы, 4-бап
Қуўылғаннан соң Адам-ата ҳәм Ҳаўа-ене бағдың сыртында жасай баслады. Олардан еки ул туўылды. Олар Каин ҳәм Абыл еди. Олар әкесиндей аўыр жумыс ислеўи керек еди. Каин дийханшылық пенен, ал Абыл болса қойларға шопаншылық етиў менен шуғылланатуғын еди.
Енди Қудай адамлар менен бағдағыдай жийи келип, көп сөйлеспейтуғын еди. Бирақ Ол ўақты-ўақты менен сөйлесип, оларға мүтәжликлери менен бөлисиўине мүмкиншилик беретуғын еди.
Бир күни Каин менен Абыл Қудайға қурбанлық бериўди шешти. Каин өз жериниң өниминен қурбанлық әкелди. Абыл болса сүриўиндеги ең жақсы туңғыш қойының бирин қурбанлық орынға алып келди. Жаратқан Ийе Абылды ҳәм оның қурбанлығын қабыл етти, бирақ Каинды ҳәм оның қурбанлығын қабыл етпеди. Қудай ушын Оның алдына адамның қандай жүрек пенен келиўи әҳмийетли. Каинның жүреги дурыс емес еди. Ол қапа болды ҳәм қатты ашыўланып, қабағы қарыс жаўылды да, өз инисин көре алмай қызғанды.
Қудай оның жүрегин көрди ҳәм оған өз пикиринен қайтыўына ҳәм ойланыўға мүмкиншилик берди. Қудай оған: «Саған не болды? Жүрегиңе қара, ол қәўип астында. Гүна есик алдында жатыр, бирақ сен оны ишке киргизбе», – деди. Каин тыңламады. Ол Қудайды Абыл сыяқлы сүймейтуғын еди. Ол тек өзин жақсы көретуғын еди.
Ол Абыл ҳаққында ойлаған сайын, оны соншелли жек көре баслады. Сонда қорқынышлы ўақыя жүз берди.
Бир күни екеўи де атызда жүргенде Каин иниси Абылға топылып, оны өлтирди. Абылдың қаны жерге төгилди. Абыл жердеги биринши өлген адам еди. Солай етип, Каинның ашыўы инисин өлтириўге алып келди.
Көп ўақыт өтпей, Каин Қудайдың өзине сөйлеген мынадай даўысын еситти:
– Абыл иниң қай жерде?
Каин Қудайға:
– Билмеймен, мен не инимниң қараўылыман ба? – деп ашыўланып жуўап берди.
Бирақ Қудай оған:
– Мен жерде иниңниң төгилген қанын көрдим .Соның ушын Мен сени жазалайман, өйткени гүнаның өзиңди бийлеп алыўына жол қойдың. Буннан былай уйиңнен кетип гезендеге айланасаң ҳәм ҳеш жерде тынышлық таппайсаң, – деди.
Каин Қудай менен сөйлескен жерден кетти.
Усылай етип Адам-ата ҳәм Ҳаўа-ене еки баласынан да айырылды, себеби Каин олардан узақ жерге кетеди, ал Абыл болса өлди. Олардың Абылды жоқлап қалай жылағанын тек көз алдымызға келтириўимиз мүмкин!
Бирақ олар Каинның жаўызлыққа қол урғаны ушын буннан да көбирек жылаған болыўы мүмкин.
Не ушын олар шайтан усыныс еткен мийўени жеди? Егер оны жемегенде, олар ҳеш қашан Қудай менен қарым-қатнасынан ҳәм Эден бағындағы өмирден айырылмайтуғын еди, Каин жаўыз болмас еди, ал Абыл болса тири болған болар еди.
Кейинирек Каин үйленди ҳәм оннан жаўыз, жүреги тас ҳәм Қудайды сүймейтуғын ҳәм Оған бойсынбайтуғын балалар туўылды. Бирақ Қудай Адам-ата ҳәм Ҳаўа-енени аяп, оларға Қудайға садық болған және бир ул берди. Оның аты Шит еди. Адам-ата менен Ҳаўа-енеге бул жүдә әҳмийетли еди, себеби олар Каинның урпағынан Қутқарыўшы туўылатуғыны мүмкин емеслигин билетуғын еди. Ал Шиттиң балалары Қудайды жақсы көретуғын еди.
Солай етип, жер жүзининде еки әўлад өмир сүрип баслады: Каинның балалары ҳәм Шиттиң балалары. Мухаддес Китап Шиттиң балаларын Қудайдың балалары деп, ал Каинның балаларын адам балалары деп атайды.
СОРАЎЛАР
1. Не ушын Қудай Абылдың қурбанлығын қабыл етип, Каинның қурбанлығын қабылламады?
2. Каин не ислеген еди ҳәм не ушын?
3. Не ушын Шиттиң туўылыўы жүдә әҳмийетли еди?
