Қуяш ҳәм айдың тоқтаўы
Мухаддес Китап, Ешуа китабы, 10-бап
Қанан патшалары Ерихоға не жүз бергенин еситкенде, олар Нун улы Ешуаға ҳәм израил халқына қарсы урысыў ушын бирлести. Гибон қаласының халқы израиллылар менен парахатшылық келисимин дүзген еди. Буннан хабар тапқан бес патша сол қаланы қамал қылды. Гибон халқы Нун улы Ешуадан жәрдем сорады, сонда Ешуа өз аўқамласының душпанларына қарсы көп жаўынгерлери менен қарсы шықты. Тез арада бирлескен Қанан патшаларының әскерлери жеңилип, қаша баслады, Жаратқан Ийе де Өз халқы ушын гүрести: душпан армиясының үстине аспаннан үлкен тас буршақ жаўдырды. Қараңғы түсип баслаған ўақытта, ал душпанлар еле толығы менен жеңилип болмаған еди, сонда Ешуа дуўа етип, былай деди: «Ҳәй қуяш, тур сен Гибон үстинде, Ҳәй ай, сен де Айялон ойпатлығында».
Сонда Жаратқан Ийе бул дуўаны еситти. Израиллылар душпанларын толығы менен жеңип шықпағанша жақты ўақыт узаққа созылды. Бундай ўақыя соннан кейин улыўма жүз бермеди. Усы жүристи қылған ўақытта Ешуа менен израил халқы басқа да қалаларды қолға киргизди, өйткени Жаратқан Ийе Өз халқына жәрдем берди.
СОРАЎЛАР:
1. Қайсы қаланың халқы израиллылар менен парахатшылық келисимин дүзди?
2. Гибон халқын ким қутқарды?
3. Қараңғы түсип баратырғанда, Нун улы Ешуа не иследи?
