Даўыт ҳаққында ўақыялар
Жас шопан
Мухаддес Китап, 1 Патшалық китабы, 16-бап
Сол ўақытлары Бейтлеҳем жолаўшылар айтарлықтай итибар бермейтуғын кишкене бир аўыл еди. Бирақ Қудай Самуелди сол жердеги бир шаңараққа мийманға жибереди. Сол шаңарақтың улларының бири израил халқының кейинги патшасы болыўы керек еди. Шаңарақ басшысы болған Ишай ушын пайғамбар Самуелдиң өзи оның үйине келгени үлкен бахыт еди. Ол Самуелди биргеликте түслик жеўге мирәт етти. Дастурхан жайылды ҳәм Ишай улларын таныстырып баслады. Ишай:
– Мынаў, туңғыш улым, – деп мақтанышлы түрде таныстырды.
Самуел: «Ол әлле қашан ҳәм ҳәзирде сымбаты патша сыяқлы көринеди. Мен патшалыққа майлаған Шаул сыяқлы сондай бойшаң, мәртебели екен», – деп ойлады.
Бирақ сол ўақытта Самуел Қудайдың мынадай даўысын еситти:
– Оның шырайына, бойының узынлығына қарама! Адам сыртқы көринисине қарайды, ал Мен жүрекке қарайман. Ол патша болмайды.
Солай етип, Ишай жети улын биринен кейин бирин таныстырып шықты. Бирақ ҳәр биринде Қудай: «Яқ, бул ол емес!» – деди. Ишай дастурханға бурылып:
– Енди аўқатланайық, – деди. Самуел:
– Тоқтап тур, сен маған барлық улларыңды таныстырдың ба? – деп сорады. Ишай:
– Мениң ең генже улым бар. Ол жайлаўда қой бағып жүрипти, – деди.
Самуел:
– Ол усы жерге келсин! – деди.
Тез арада Даўыт Самуелдиң алдына келди. Ол аққубадан келген, сулыў көзли ҳәм жүзи жағымлы еди. Сонда Жаратқан Ийе Самуелге:
– Оны майла, бул сол болады! – деди.
Самуел майға толы шақты алды да, жас өспиримди майлады ҳәм былай деди:
– Қудайдың аты менен сени Израил халқының үстинен патша етип майлайман. Жаратқан Ийе сени жарылқасын!
Сол ўақытта Ийениң Руўхы Даўыттың үстине келип түсти. Ишай ҳәм оның қалған уллары таң қалғанлықтан ҳеш қандай сөз айта алмай қалды, ал Даўыт болса сол күни оған не жүз бергенин ақырына дейин түсинбеди.
СОРАЎЛАР:
1. Жаратқан Ийе Самуелге қандай тапсырма берди?
2. Ишайдың неше улы бар еди?
3. Патшалыққа ким майланды?
