Қудайға арналған Ибадатхана
Мухаддес Китап, үшинши патшалар китабы, 5-8 баплар.
Қудай Сулайманның патша болып басқарыўын жарылқады. Оның елинде абаданшылық болып, қоңсы жерде жайласқан халықлар менен парахатшылық ҳүким сүрди. Бирақ Сулайманның алдында үлкен ўазыйпа, яғный Жаратқан Ийеге Ибадатхана салыў ўазыйпасы тур еди.
Израил халқы Ибадатхананы Мысырдан шыққаннан соң төрт жүз сексен жылдан кейин қурып баслады. Сулайман патша әкесиниң досты, Тир ҳәм Сидонның патшасы Хирам менен дослық қатнасықларын орнатты. Олар өз ара келисим дүзди. Бул келисимге гөре Хирам қурылыс ушын керек болған қымбат баҳалалы тас ҳәм ағашлар менен тәмийинлесе, Израил оларды азық-аўқат пенен тәмийинлейтуғын болды. Ибадатхананың қурылысы жети жыл даўам етти. Ол өз өлиминен бурын Даўыт патшаның Сулайманға берген жобасы бойынша қурылды. Ибадатхана ушын арналған жерди де Даўыт көрсеткен еди. Ол Мория таўында болып,ол жерде көп жыллар бурын Ибрайым Жаратқан Ийеге өз садықлығын дәлиллеген еди, ал Қудай ол жерде Ысақтың өмирин сақлап қалған еди.
Ибадатхана тийкарғы еки бөлимнен ибарат еди, олар «Мухаддес» ҳәм «Ең Мухаддес» бөлме деп аталатуғын еди. Жаратқан Ийеның сандығы Ең Мухаддес бөлмесинде еди. Ол бөлме ең бийик жерде жайласқан болып, Мухаддес ханадан қалың перде менен бөлинген еди.
Ең Мухаддес бөлмеде айналар жоқ еди, себеби ол жер қараңғы болып қала бериўи керек еди. Мухаддес Китап ол жерди «Қудай менен сөйлесетуғын орын» деп атайды, себеби ол жерде Қудай Өзи көринбеген ҳалда жасайтуғын (яғный Оның хүзири бар) еди.
Ибадатхананы қурып болғаннан соң оны байрам қылып мухаддеследи. Сулайман барлық басшыларды ҳәм бийлерди шақырып, Жаратқан Ийениң сандығын Ең Мухаддес бөлмеге алып кирген ўақытта аспаннан булт түсип, Ибадатхананы толтырды.
Солай етип, Қудайдың Өзи Израил халқы менен бирге екенин билдириў ушын белги берди.
Енди Сулайман ибадатхананың қурылыс ислериниң барлығы Қудайға унағанына исеними кәмил болды.
СОРАЎЛАР:
1. Не ушын Хирам патша Сулайманға жәрдем берди?
2. Ибадатхананың қурылысы неше жыл даўам етти?
3. Ең Мухаддес бөлме Ибадатханада не ушын керек еди?
4. Жаратқан Ийениң сандығын Ибадатханаға алып киргенде не жүз берди?
