Даниел ҳаққында ўақыялар
Тутқынлық
Мухаддес Китап, 4 Патшалар китабы, 24-бап.
Сулайман қүдиретли ҳәм бай елди патша болып басқарғанынан соң үш жүз жылдан аслам ўақыт өтти.
Оның өлиминен кейин патшалық екиге бөлинди. Ең уллы қала Ерусалим болып қалған еди. Ол жерде патшаның сарайы ҳәм Сулайман қурдырған Ибадатхана бар еди. Енди ол жер Яҳудия деп аталды.
Тилекке қарсы, патша ҳәм халық Қудайдан узақласып, Оның буйрықларына бойсынбай, жат халықлардың қудайларына ҳәм бутларға табынып кетти. Қудайдың пайғамбарлары оларды гүнадан бас тартып, тәўбе етиўге шақыратуғын еди, бирақ оларға ҳеш ким қулақ салмады.
Соннан кейин, Қудайдың ҳүкими келди ҳәм елди Бабилонлылар басып алды.
Бабилон патшасы Набуходоносор Яҳудияның ең жаўыз душпаны еди. Ол өз аскерлери менен Ерусалимге келип, патшаны тутқынлыққа алды ҳәм Ибадатханадағы барлық алтын ҳәм гүмис ыдысларды алып, Бабилониядағы өз қудайларының бутханасына апарды. Олар және де, Ибадатханадағы ҳәм Сулайманның сарайындағы барлық ғәзийнелерди алып кетти. Сондай-ақ, патшаның сарайын, Ибадатхананы ҳәм абырайлы адамлардың үйлерин тонағаннан соң, оларды өртеп жиберди.
Набуходоносор Яҳудияның жас жигитлерин, патшаның улларын ҳәм басшыларды, жети мың сайланды әскерлерди, өнерментлер менен темиршилерди Бабилонияға алып кетеди.
Солай етип, Яҳудия ҳәм Ерусалим Набуходоносордың қол астына киреди.
Қудай Ийе усылай етип бойсынбайтуғын ҳәм гүнакар халқына ҳүким шығарды. Тутқынлықта болған израил халқы Жаратқан Ийениң жалғыз ҳақыйқый Қудай екенин, ал бутлардың жалған қудайлар екенин түсиниўи керек еди.
СОРАЎЛАР:
1. Қудайдың халқы Оған садық болды ма?
2. Яҳудияның ең баслы душпаны ким болып қалды?
3. Бабилония халқы Ерусалимге не қылды?
