Даниел Дарий патшаның сарайында
Мухаддес Китап, Даниел пайғамбардың китабы, 6-бап.
Жаңа патшалықты, яғный Мидия ҳәм Персия патшалығы үстинен Кир патша ҳүкимдарлық етти. Ол Бабилон халқының үстинен басқарыў ушын мидиялы Дарийди патша етип қойды.
Патша Дарий пүткил патшалықтағы жерлерди 120 ўәлаятқа бөлип, ҳәр бир ўәлаят үстинен найып тайынлаўды шешти. Патшаға қыйын болмаўы ушын, найыплардан есап алып отыратуғын үш ўәзир тайынланды, олардың ишинде Даниел де бар еди. Даниел басқа ўәзирлер ҳәм найыпларға қарағанда өз исин жоқары дәрежеде алып баратуғын еди. Соның ушын, патша пүткил патшалыққа басқарыўшы етип, Даниелди тайынлаўды жобаластырып қойған еди. Сонда ўәзирлер ҳәм найыплар патшаның алдына барып былай деди:
– Патша Дарий, өмириңиз узақ болсын! Патшалықтағы барлық ўәзирлер, ҳүкимдарлар, найыплар, кеңесгөйлер ҳәм ҳәкимлер кеңесип, былай келистик: Тақсыр, отыз күн даўамында ҳәмме адамның сизден басқа адамға ямаса қудайға сыйыныўға тыйым салатуғын пәрман шығарып, оны қатаң күшке киргизиң. Ким де ким басқа бир қудайға ямаса адамға дуўа етсе, ол арысланлар турған шуқырға таслансын. Патша, пәрман шығарып, оны тастыйықлаң. Бул пәрман Мидия ҳәм Персия нызамларына муўапық өзгертилмейтуғын ҳәм бийкар етилмейтуғын болсын.
– Бул шешим маған унады, – деп жуўап берди патша. Себеби оған өзин жоқары көтермелейтуғыны унады.
Солай етип, патша Дарий пәрманды тастыйықлады. Ал усы пәрманға бойсынбайтуғын ҳәр бир адам арысланлар турған шуқырға тасланыўы керек еди.
Сораўлар:
1. Патша Кирдиң Бабилон үстинен тайынлаған патшаның аты ким еди?
2. Даниелди жоқ қылыўды ойлаған адамлар патша Дарийға нени усыныс етти?
3. Патшаның пәрманын бузған адамларды қандай жаза күтип турған еди?
