Даладағы шопанлар
Мухаддес Китап, Лука жазған Хош Хабар, 2 бап, 8-20 аятлар.
Бейтлеҳем әтирапында шопанлар далада өз падасын далада қараўыллайтуғын еди. Түн болды, бирақ оларға уйықлаўға болмайтуғын еди: себеби әтирапында жабайы ҳайўанлар көп еди, олар қәлеген ўақытта келип, қозыларды жеп қойыўы мүмкин еди. Ҳәр түни ҳәр қандай ҳаўа-райына қарамастан, олар өз падасына қараўы тийис еди.
Бирақ бир нәрсе жүз берди ме? Бул қандай жарық нур болды? Қандай да бир жеңил ҳәм жарқырап турған нәрсе аспаннан жерге түсип келген еди. Шопанлар қорқынышқа түскен еди. Бундай болыўы мүмкин емес! Бул Қудайдың периштеси-ғо! Периште шопанларға мүләйимлилик пенен былай деди:
– Қорқпаңлар! Мен сизлерге ҳәмме адамларды шексиз қуўандыратуғын хош хабар жәриялайман.
Периште шопанларға бүгин Даўыттың қаласында адамлар ушын Қутқарыўшы туўылғаны ҳаққында айтты. Ол – Ийемиз Масийх.
Көптен берли күтилген Қутқарыўшының туўылғаны ҳаққында еситип, шопанлар ҳайран қалды. Әжайып Хош Хабар! Бирақ кейин олар ҳайран қалды, өйткени периште шопанларға Оның белгиси мынадай екенин айтты: сизлер ақырда қундақлаўлы жатырған Нәрестени табасызлар, Оны қымбат сарайда излеў шәрт емес. Бул дегени, олар биринши орында қораны излеўи керек еди.
Шопанлар бир-бири менен сөйлесип үлгерместен, периштелердиң даўысын еситти:
– Аспанда Қудай алғыслансын, Қудайға унайтуғын жердеги адамларға тынышлық болсын!
Бул жер жүзинде айтылған қосықлардың ең әжайыбы болғаны сөзсиз.
Кейин периштелер жоқ болып кетти.
Шопанлар бир-бирине қарап, мынадай шешим қабыл етти:
– Жүриңлер, Бейтлеҳемге барайық. Жаратқан Ийемиз бизлерге билдирген, сол жүз берген ўақыяны көрейик, – деди.
Сол Хош Хабарды Қудайдың Өзи оларға айтқанына шопанлардың исеними кәмил еди.
Шопанлар падаларын таслап, жолға шықты. Қудай олардың падаларын қорғайтуғынына исенген еди. Асығыслық пенен келип, Мәриям менен Юсупти ҳәм ақырда жатырған Нәрестени тапты.
Жүреклери ҳақыйқый қуўанышқа толған еди, өйткени олар көптен күткен Қутқарыўшы Ийсаны, Қудайдың Улын биринши болып көриўге миясар болды.
СОРАЎЛАР:
1. Түнде далада кимлер бар еди? Олар не қылып атырған еди?
2. Периштеге шопанлар менен сөйлесиўди ким буйырған еди? Ол шопанларға не деди?
3. Периштелердиң қосығы не ҳаққында еди?
4. Шопанлар периштениң сөзлерине исенди ме? Олар Нәрестени көриўге асықты ма, ямаса азанға дейин күтиўди шешти ме?
Сол әтирапта шопанлар болып, олар түнде өз падасын далада қараўыллайтуғын еди. Тосаттан олардың алдында Жаратқан Ийемиздиң бир периштеси пайда болып, Ийемиздиң салтанаты олардың әтирапын жарқыратып жиберди. Олар қатты қорқып кетти. Периште оларға:
— Қорқпаңлар! Мен сизлерге ҳәмме адамларды шексиз қуўандыратуғын хош хабар жәриялайман. Бүгин Даўыттың қаласында сизлер ушын Қутқарыўшы туўылды. Ол — Ийемиз Масийх. Сизлер ушын оның белгиси мынадай: сизлер ақырда қундақлаўлы жатырған Нәрестени табасызлар, — деди.
Бирден периштениң қасында аспандағы периштелердиң үлкен топары пайда болды ҳәм былай деп Қудайды алғыслады:
Аспанда Қудай алғыслансын,
Қудайға унайтуғын жердеги адамларға тынышлық болсын!
Лука жазған Хош Хабар 2:8-14.
