Ийсаның дәслепки шәкиртлери
Мухаддес Китап, Юхан 1-бап, 35-51 аятлар
Бир күни Шомылдырыўшы Яқыя халыққа Ийса ҳаққында гүўалық бергеннен соң, Ийса және Иорданға келди. Яқыя өзиниң еки шәкирти – Андрей ҳәм Юхан менен сөйлесип турған еди. Қасынан өтип баратырған Ийсаны көрип, Шомылдырыўшы Яқыя Оны көрсетип:
– Мине, Қудайдың Қозысы! – деди.
Бул сөзди айтып, ол Андрей ҳәм Юханға өзи менен бирге қалыўды емес, ал Масийхтың изине ериўин түсиндирген еди. Өйткени Ийса олар ушын ең жақсы Устаз бола алатуғын еди. Андрей менен Юхан Ийсаның изинен ерди. Ийса артына бурылып, изинен киятырғанларды көргенде, олардан:
– Не излеп жүрсизлер? – деп сорады.
– Қай жерде жасайсаң, Устаз? – деди олар.
– Келип көриңлер, – деди Ийса.
Олар барып, Ийсаның қай жерде жасайтуғынын көрди ҳәм сол күни Оның менен қалды. Олар Ийса менен сәўбетлесип сондай қуўанышқа толды! Ҳеш ким ҳеш қашан Ийемиз Ийса сыяқлы шын ҳәм әпиўайы етип, бундай терең мазмундағы сөзлерди айтпаған еди. Андрейдиң Шимон деген туўысқаны бар еди. Олар әкеси менен бирге Галила көлине жақын жайласқан Бетсайда қаласында жасайтуғын еди.
Ертеңине Яқыя және шәкиртлериниң екеўи менен бирге турған еди. Ол өтип баратырған Ийсаны көрип:
– Мине, Қудайдың Қозысы! – деди.
Еки шәкирт оның бул сөзлерин еситип, Ийсаның изине ерди....
Яқыяның сөзлерин еситип, Ийсаның изине ерген еки адамның бири Шимон Петрдиң туўысқаны Андрей еди. Андрей дәслеп өз туўысқаны Шимонды излеп таўып, оған:
– Бизлер Масийхты таптық, – деди. Масийх – Қудай ўәде еткен Қутқарыўшы.
Юхан жазған Хош Хабар 1:35-41
Олар балықшылар еди. Андрей Ийса ҳаққында айтыў ушын туўысқанын излеп таўып, Шимонды көриўден қуўанышлы түрде:
– Бизлер Масийхты таптық! – деди.
Кейин Андрей туўысқанына Ийса менен танысыўы ушын бирге жүриўди усыныс қылды ҳәм ол шын кеўилден келисим берди.
Ийса оған қарап:
– Сен Юхан улы Шимонсаң. Сен «тас» дегенди аңлататуғын Кифа, яғный Петр деп аталасаң, – деди.
Шимон Ийсаның оны биринши мәрте көриўи болса да, әлле қашан оның атын билетуғынына таң қалды. Ийса Шимонға таза ат берип, бир неше ўақыт өткеннен соң, әпиўайы балықшының руўхый күшли, беккем ҳәм тастай қатты болатуғынын билген еди.
СОРАЎЛАР:
1. Ийсаның биринши шәкиртлери кимлер еди?
2. Ийса кимге Петр деген ат берди ҳәм бул нени аңлатады?
