Қудық жанындағы ушырасыў
Мухаддес Китап, Юхан 4-бап, 4-29 аятлар
Мынадай сүўретти көз алдымызға келтирейик: күнниң ыссы ўақтында бир топар жолаўшылар жүрип баратыр. Мине, олар Сихар қаласына жақын жерге жақынлап, бир неше жүз жыллар бурын Яқып тәрепинен қазылған қудықтың қасында тоқтады.
Бул жолаўшылар Ийса ҳәм Оның шәкиртлери еди. Түслик ўақты жақынлағанлықтан Устаз шәкиртлерин азық сатып алыўы ушын қалаға жибереди, ал Өзи қудықтың қасында қалады. Түски ўақыт болып, қуяш тас төбеде еди. Бундай ўақытта әдетте қудыққа адам келмейтуғын еди, бирақ қаладан өз гүзесин көтерип, бир ҳаял қудыққа келди. Ол қудықтан суў алғанда, Ийса күтилмегенде оған:
– Маған ишиўге суў бер, – деди.
Ҳаял яҳудийдиң оған хабарласқаны ушын қатты таң қалды, өйткени яҳудийлер самариялылар менен сөйлеспейтуғын еди.
Бирақ Ийса оның жүрегиндегилерди билип, оған жәрдем бериўди қәледи. Ол оған ең әҳмийетли нәрсе: исеним ҳәм Жаратқан Ийеге қалай дурыс сыйыныў кереклиги ҳаққында айтты. Ийса ҳаялға:
– Қудай – Руўх, Оған сыйынатуғынлар да руўх ҳәм ҳақыйқатлық пенен сыйыныўы тийис, – деди.
Ийса оған сыйынатуғын орын ондай әҳмийетли емес, деп айтыўды қәлеген еди. Бизлер Қудайға ҳәмме жерде сыйына аламыз, себеби Ол ҳәмме жерде. Ҳаял қатты дыққат қойып тыңлады, Мухаддес Руўх оған Ийсаның сөзлерин түсиниўине жәрдем берди.
Ҳаял әлле қашаннан берли ҳақыйқатлықты излеп жүрген еди, сонлықтан ол:
– Масийхтың келетуғынын билемен. Ол келгенде, Қудайға мақул болыўымыз ушын, не билиўимиз керек болса, бизлерге ҳәммесин билдиреди, – деди.
Ийса оған:
– Сениң менен сөйлесип турған Мен – Солман, – деди.
Енди ҳаял шынлықты билип алды. Ол енди Ийсаның – Қутқарыўшы екенине исениўи керек.
Самариялы ҳаял сондай қуўанышқа толып, бул ҳаққында ҳәммеге айтып бериў ушын қалаға қарай асықты. Өйткени ол тири суў берген Қутқарыўшы менен ушырасты. Ҳаял өзине Масийхпан деп таныстырған Адамды көриң деп, Сихар турғынларын қудықтың қасына барыўға шақырды.
Барлық турғынлар ҳәўлиресип, Ийсаға қарай асықты, себеби олар Масийхты көриўди қәледи.
Көп самариялылар ҳаялдың: «Ол өмирим ҳаққында барлығын айтып берди», - деп гүўалық берген сөзлери бойынша Ийсаға Ийе деп исенди. Олар Ийсаның алдына келгенде, Оны үйлерине мирәт етип, сол жерде қалыўын өтинди.
Ийса адамлар менен сәўбетлесип, қалада еки күн қалды. Сонда еледе көбирек адамлар Оған исенди, ал ҳаялға олар қуўанышлы түрде былай деди:
– Бизлер енди сениң сөзлериң себепли емес, ал Оның сөзлерин өзлеримиз еситип, Оның ҳақыйқаттан да дүньяның Қутқарыўшысы екенин билгенимиз себепли исенемиз.
СОРАЎЛАР:
1. Ийса дем алыў ушын тоқтаған қудық Израилдың қайсы аймағында жайласқан еди?
2. Ийса самариялы ҳаялға не ҳаққында айтып берди?
3. Ҳаял не ушын қалаға қарай асығып кетти? Қаланың турғынларына ол не айтты?
