Тери кеселлигине шалынған адамның шыпа табыўы
Мухаддес Китап, Лука 5-бап, 12-14 аятлар
Ийса жердеги хызмети даўамында көп жерлерге барыўына туўры келген еди. Ҳәр түрли қала ҳәм аўылларда болып, Ол ләң аўырыўларды ҳәм кеселлерди ушыратып, оларға шыпа берди. Сол ўақытлары Палестина турғынлары арасында жүдә қорқынышлы тәўир болмайтуғын мақаў кеселлиги кеңнен тарқалған еди. Бул зыянлы тери кеселлиги еди.
Бир күни Ийса шәкиртлери менен Галиланың бир қаласына келди ҳәм ол жерде мақаў, яғный тери кеселлигине шалынған адамды ушыратты. Ол адам Ийсаның алдына жуўырып келип ҳәм Оның аяғына жығылып:
– Ийем! Егер Сен қәлесең, мени кеселликтен тазалай аласаң, – деп жалынды.
Бул адам Ийсаға соншелли исенген еди!
Ийса қолын созып, оған тийгизди де:
– Қәлеймен, тазалан! – деди.
Бул Ийсаның әпиўайы ғана қәлеўи болған жоқ, ал Қудайдың буйрығы менен болды. Қудайдан басқа ҳеш ким бундай етип сөйлеўге батына алмас еди!
Сонда кәрамат жүз берди: сол адамнан тери кеселлиги жоқ болып кетти. Ден саўлығы жақсыланып, терилери тап-таза болып қалды, ол шексиз түрде шадланып, Ийсаның алдында турған еди. Ийса оның бул ҳаққында ҳеш кимге айтыўын қәлемей:
– Буны ҳеш кимге айтпа! Тек руўханийге барып, өзиңди көрсет те, тери кеселлигинен тазаланғаныңды адамларға дәлиллеў ушын, Муўса буйырған қурбанлықты бер, – деп буйырды.
Бирақ кәраматты жасырып болмас еди. Сонда еледе көбирек халық Ийсаны тыңлаў ҳәм шыпа алыў ушын, Оның алдына келетуғын еди.
СОРАЎЛАР:
1. Не ушын мақаў кесели, яғный тери кеселлиги әтираптағыларға қәўипли еди?
2. Тери кеселлигине шалынған адам Ийсаны көргенде, не ушын қатты қуўанып кетти?
3. Ийса не ушын тери кеселлигине шалынған адамның алған шыпасы ҳаққында ҳеш кимге айтпаўын қәледи?
