Жесир ҳаялдың баласының тирилиўи
Мухаддес Китап, Лука 7–бап, 11-16 аятлар.
Ийса Галиланың басқа қаласына, Наин деген қалаға қарай кетти ҳәм көп адамлар Оның менен бирге жүрди. Ол қала дәрўазасына жақынлағанда, бир жесир ҳаялдың жалғыз баласының өлигин шығарып атыр еди.
Мәйит жатырған табыттың изинен дад салып, ҳәсиретке батқан ҳаял жүрип киятыр еди. Ҳаял менен бирге оған кеўил билдириў ушын қаладағы көп адамлар бирге жүрип киятыр еди.
Бул ҳаял жесир еди, ал өлген бала болса – оның жалғыз перзенти еди. Ийса қайғыға батқан ҳаялды көрип, оған жаны ашыды ҳәм оған:
– Жылама! – деди.
Жүрип киятырғанлар тоқтады, ал Ийса табытқа жақынлап, оған қолын тийгизди де, өлген балаға:
– Ҳәй жас жигит, саған айтаман: орныңнан тур! – деди.
Өлген жас жигит тикейип отырды да, сөйлей баслады. Кәрамат жүз берди! Ийса оны анасына қайтарып берди. Бир неше ўақыт булардың ҳәммесин көрип турғанлар үнсиз қалып, қорқыныш бийледи, кейин олар:
– Арамызда уллы пайғамбар пайда болды. Қудай Өз халқына жәрдемге келди, – деп Қудайға алғыс айтты.
Наиндағы кәрамат ҳаққындағы хабар пүткил Яҳудия бойлап тез тарқалды.
СОРАЎЛАР:
1. Ийса қайсы қалаға келди?
2. Қала дәрўазасында Ол кимди ушыратты?
3. Наинда не жүз берди? Адамлар кәраматты көргенде өзлерин қалай тутты?
