Яирдиң қызының тирилиўи
Мухаддес Китап, Лука 8-бап, 41-42, 49-56 аятлар
Яир бурын бундай болып жылдам, асығыс түрде жуўырып көрмеген еди. Ол мәжилисхананың (мәжилисхана – бул яҳудийлер дуўа етиў ушын жыйналатуғын үй) басшыларынан бир еди, ал усындай ўазыйпада ислейтуғын адамлар арасында бундай етип жуўырыў үрдис емес еди. Бирақ оның қызы өлим төсегинде жатырған еди. Яир қызын жүдә жақсы көретуғын еди, ал енди болса ҳәр күн сайын қызының төменлеп баратырғанын көриўге мәжбүр еди. Сол ўақытта Ийса шәкиртлери менен қалаға келген еди. Сонда Яир Ийемизден жәрдем сораўды шешкен еди. Ийсаның алдына келип, Оның аяғына жығылды да, үмитсизликте былай деп өтине баслады:
– Устаз, қызым өлейин деп атыр. Сизден өтинемен, келип, оны қутқар! Сизден өтинемен! Тез жәрдем бер, болмаса кеш болады!
– Жүр, – деп жуўап берди Ийса. – Сен алдымыздан барабер, ал Мен сениң изиңнен бараман.
Деген менен, аламан халықтың арасында жүриў аңсат емес еди, олар жүдә әсте жүрип баратырған еди. Сонда Яир үйинен биреўдиң киятырғанын байқады. Сол келген хызметкери:
– Қызыңыз өлди, енди Устаздың тынышын алмаң, – деди.
Яирдиң жүреги тоқтап қала жазлады. Ҳәммеси тамам болды! Сүйикли қызы өлди! Барлық урыныўылары нәтийжесиз болып қалды. Яир қатып қалды, оның жүзи де өлидей болып ағарып кетти.
Ийса хызметкердиң айтқан сөзин еситти.
Ол Яирдиң ийнинен қушақлап:
– Қорқпа, тек исен, қызың шыпа табады, – деди.
Мәжилисхана басшысы неге исенерин билмеди. Қайғыға батқан ол үйине қарай сүйретилип жүре баслады. Ийса оның артынан барды. Үйине жақынлағанда бәлент даўыста дад салысыўлар еситилди.
Ийса:
– Жыламаңлар, ол өлген жоқ, тек уйықлап атыр, – деди.
Бул сөзлерди еситип, адамлар Оның үстинен күле баслады. Олар қыздың өлгенин анық билетуғын еди. Ол усындай қолайсыз сөзлерди қалай сөйлеўи мүмкин!
Ийса ҳәммесин сыртқа шығарып жиберди де, қыздың ата-анасы, Петр, Юхан ҳәм Яқып деген шәкиртлери менен бирге төсегинде жатырған қыздың бөлмесине кирди.
Ийса қыздың қолынан услады да, даўыслап:
– Қызалақ, орныңнан тур! – деди.
Сонда қыз терең демин алып, көзин ашты. Қыздың жүзи бурынғыдай түске енип, орнынан турды. Ата-анасы өз көзлерине исеенбеди. Перзенти енди тири! Қандай бахыт!
– Қызға жейтуғын бир нәрсе бериң, ол ҳәзир күшин тиклеўи зәрүр, – деди Ийса.
Кейин Ол орнынан турды да, қызға күле шырай менен қарады ҳәм сыртқа шықты. Таң қалған шәкиртлери өзине келиўи ушын бир неше ўақыт өтти ҳәм кейин қуўанышқа толып-тасқан шаңарақты қалдырып, Устазының изинен асығыслы түрде жүрип кетти.
СОРАЎЛАР:
1. Мәжилисхана басшысының аты ким еди?
2. Онда қандай қайғы-ҳәсирет жүз берди?
3. Яирдиң үйинде Ийсаның қайсы шәкиртлери кәраматтың гүўасы болды?
Ийса қыздың қолынан услады да, даўыслап:
– Қызалақ, орныңнан тур! – деди.
Қыздың жаны қайтып кирип, ол дәрриў орнынан турды. Ийса оған жеў ушын бир нәрсе бериўди тапсырды.
Лука жазған Хош Хабар 8:54-55
