Ийса Бетанияда
Мухаддес Китап, Лука 10-бап, 38-42 аятлар.
Ийса Ерусалимге келгенде, Ол қаладан бир неше километр қашықлықта жайласқан Бетания аўылына жийи баратуғын еди. Ийса ол жерде Мәриям, Марта ҳәм Лазар деген Өзиниң изине ергенлердиң ҳәм досларының үйинде болатуғын еди.
Ийсаның гезектеги келген ўақтында, Мәриям Оны тыңлап отырды, ал Марта болса дастурхан жайып, қонақ күтиў менен бәнт болды. Сонда Марта Ийсаға келип:
– Ийем, сиңлимниң ҳәмме исти мениң бир өзиме қалдырғанына қарамайсаң ба? Оған айт, маған жәрдемлессин, – деди.
Деген менен, Ийса жыллы сөз бенен оған:
– Эҳ, Марта, Марта, сен көп нәрселерди уўайымлап, тәшиўишленесең. Тек бир нәрсе ғана зәрүр. Мәриям дурыс жолды таңлады, бул оннан тартып алынбайды, – деди.
Уллы Устаз нени нәзерде тутқан еди? Ол Мартаға ҳәм басқа адамлардың ҳәммесине екинши дәрежели нәрсеге көп дыққат аўдарыўдың ҳәжети жоқлығын көрсетиўди қәлеген еди. Марта Мәриям сыяқлы болыўы керек еди, яғный физикалық азықтан гөре, руўхый азықтың көбирек әҳмийетли екенин түсиниўи тийис еди. Ең жақсысы – Ийса Масийхқа исениў – сол ўақытта оның жердеги өмири ерте ме, кеш пе ақыры келеди ҳәм буны ҳеш кимнен алып қойыўға болмайды.
Әлбетте, бул – усы жердеги өмир ҳаққында ҳеш қандай ғамхорлық қылмаў керек, дегенди аңлатпайды. Ҳәр бир адамда өз ўазыйпалары ҳәм тапсырмалары бар!
Мартаның өмиринде болғанындай, бул өмирдиң тәшиўишлери адамның руўхый өмиринен жоқары болмаўы тийис. Марта ушын сол ўақытта Қутқарыўшының сөзинен гөре, мийман күтиў жүдә әҳмийетли болған еди.
СОРАЎЛАР:
1. Ийса Ерусалимге келген ўақытта, көбинесе қай жерде болатуғын еди?
2. Марта нени умытып шын-жүректен аўқат таярлаў менен шуғылланып кеткен еди?
3. Ийса не ушын Мәриямды Мартаға жәрдем бериўи ушын жибермеди?
