Ийсаның балаларды жарылқаўы
Мухаддес Китап, Лука жазған Хош Хабар, 18-бап, 15-17 аятлар.
Ийсаны көплеген халық дөгереклеп турған күнлердиң бири еди. Ол халыққа Қудай ҳәм Аспан Патшалығы ҳаққында айтып берип атыр еди, Ол диний муғаллимлердиң дузаққа түсириў ушын ҳәм сум сораўларына сабыр менен жуўап берер еди ҳәм көплеген аўырыўларға шыпа берип атырған еди.
Оның дөгерегине көп сандағы халық жыйналған еди. Сонда ер ҳәм ҳаяллар топары баллары менен Ийсаға қарай жақынлады. Аламан ишинен биреў:
– Азғантай тоқтап турың, қаяққа өтежақсызлар? – деди. Бир ҳаял:
– Ийсаның алдына, Ол балаларымызды жарылқасын, – деп жуўап берди.
Сол турғанладың бири:
– Балалар! – деп жақтырмай қатты сөйледи.
– Балалар менен шуғылланыўдан басқа Ийсаның әҳмийетли иси жоқ шығар! Ол жерде шыпа күтип турған аўырыўларды көрип турған жоқсыз ба? Ол салдамлы ҳәм әҳмийетли болған Қудайдың патшалығы ҳаққында айтып атырғанын еситип турған жоқсыз ба? Ал сизлер болсаңыз, ҳеш нәрсени аңлатпайтуғын балаларыңыз бенен, ҳәттеки жаңа туўылған бөпелериңиз бенен келип турсызлар! Олардың бири:
– Балалар ҳәммесин түсиниўи шәрт емес, бирақ олар Қудайдың оларды сүйетуғынын түсине алады. Сонлықтан мен Ийсадан сорамақшыман, Ол оларды... – деп атырғанда, оған:
– Ол қымбат баҳалы ўақыт саатын балалар ушын қурыдан-қуры босқа сарпламайды, – деди.
– Илтимас, бизлерди өткерип жибериң!
Бул сөйлесиўлер көтериңки даўыслар менен шығып кетти. Ийса тартысып атырғанларға дыққатын қаратты да, былай деди:
– Балалардың Маған келиўине рухсат бериңлер, оларға тосқынлық жасамаңлар. Өйткени Қудайдың Патшалығы усындайлардики!
Шәкиртлери Ийсаға таң қалып, қарады. Ата-аналар балалары менен қуўанғанынан аламан ишинен Ийсаның алдына келди. Өзлерин исенимсиз сезген шәкиртлер енди не болады екен, деп көриў ушын жақынлады.
Оларға қарата Ийса:
– Сизлерге шынын айтаман: ким де ким Қудайдың Патшалығын кишкене бала сыяқлы қабыл етпесе, ол оған кире алмайды, – деди.
Кейин Ийса кишкене балаларды бирме-бир қолына алып, оларды жарылқады, ал үлкенирек балаларға болса қолын қойып, оларды жарылқады.
СОРАЎЛАР:
1. Шәкиртлер не ушын балаларды Ийсаның алдына жибериўди қәлемеди?
2. Ийса Қудайдың Патшалығын кишкене бала сыяқлы қабыл етпесе, ол оған кире алмайды, дегенде нени нәзерде тутқан еди?
