Ийсаның Ерусалимге кирип келиўи
Мухаддес китап, Матта жазған Хош Хабар, 21-бап, 1-11аятлар
Қутқарылыў байрамы жақынлап қалған еди. Ийса шәкиртлери менен Бетфагеден Ерусалимге қарай жол жүрип кетти. Көп адамлар олар менен бирге жүрди. Усы ўақытқа дейин Ийса Ерусалимде Оны үлкен азап күтип турғанын бир неше мәрте айтқан еди. Деген менен Оның бул келиси, дәслеп салтанатлы түрдеги жүристи еслететуғын еди. Қуўанышлы түрде аламан жеңис ҳәм азатлық мәнисин беретуғын пальма ағашының жапырақларын былғап ҳәм төсеп, Ийени күтип алды. Демек, Ийсаны күтип алып атырған ерусалимлилер Оны узақ ўақыттан берли күтип атырған әрманларын орынлайды, деп үмит еткен еди. Пайғамбарлар арқалы Қудайдың ўәде еткен Яҳудий Патшасы, Миссия оларды римлилердиң қол астынан азат етиўи керек! Насыралы Ийса усы Патшаның ўазыйпасына басқаларға қарағанда анық туўры келетуғын еди! Ийемиз тек ғана аламанның кеўиллерин емес, ал Қудайдың Ийса ҳаққында Зехария пайғамбар арқалы айтқан Мухаддес Жазыўды да билетуғын еди: «Мине, сениң Патшаң ешекке, жас ешекке, гүрреге минип кишипейиллик пенен саған киятыр!».
Аспандағы Әкесиниң еркин орынлаў ушын, Ийса жас ешекти әкелиўи ушын шәкиртлерин жақын жердеги аўылға жиберди.
Шәкиртлери Ийсаның айтқанларын орынлады. Жас ешекти Оған әкелип, өз кийимлерин ешектиң үстине төседи ҳәм Ийемиз ешектиң үстине минди. Оның изине ерип жүрген халық қуўанысып:
– Даўыттың Урпағына ҳосанна! Жаратқан Ийениң аты менен келетуғын жарылқансын! Ең жоқарыда ҳосанна! – деп бақырысты.
Әййемги еврейше «ҳосанна» деген сөз: «Жаратқан Ийе, жарылқап, қутқара гөр!» деген мәнисте. Базы адамлар: «Ҳалилуя!»,- деп те бақырысты, бул сөзди аўдарғанда «Қудайға алғыс-мақтаў айтың!»,- деген мәнисте. Күтип алып атырған адамлар да әсте-әсте усындай көтериңки кейпиятқа бөленди. Ҳәммеси Қудайды даўыслап алғыслады:
– Ийса, Сен бизлерге жәрдем бериў ушын, Қудай тәрепинен жиберилген Адамсаң!
Адамлар Ийсаны күтип алыў ушын, пальма шақаларын кесип алды ҳәм еле де даўыслап:
– Сени алғыслаймыз! Сен Қудайдың Елшиси болып келдиң! Сен Патшамызсаң! Сен бизлерге тынышлық алып келесең! – деп бақырысты.
Патшалардың алдына төселетуғын узын гилем-паластың орнына, адамлар өз кийимлерин ҳәм жапқышларын шешип алып, шаңлы жерге төседи. Олар Ийсаның – ўәде етилген Қутқарыўшы екенин усылай көрсетиўди қәледи. Ийса олардың патшасы болыўы керек!
Өтип баратырған адамлардың ҳәммеси усы шадланып, бақырысып атырған аламанға қосылды. Қай жаққа қарасаң да, ҳәмме жерде қуўанышлы жүзлер, күле шырай берген, жигерленген даўыслар ҳәм шадлы бақырыслар.
Деген менен, ол жердегилердиң ҳәммеси бул қуўанышқа қосылмады. Парисейлердиң базылары бул шадланыўларға қабақларын үйип қарады ҳәм Ийсаның қасына келип:
– Буны тоқтат! Егер римлилер адамлардың Сени патша, деп атап атырғанын билип қалса, Сенде машқала пайда болады. Себеби олар не деп даўыслап айтып атырғанын да түсинбейди. Оларға үнлерин өшириўин айт, – деди.
Парисейлер Ийсаны көре алмады, өйткени олардың өзлеринен гөре, Ийса әпиўайы халықтың ишинде Өз тәсирин тийгизетуғын ҳәм атақлы болып кетти. Олар яҳудийлер арасындағы өз абырайынан ҳәм тәсир өткизиўинен айырылып қалыўдан қорқты.
Ийса:
– Яқ, егер бул адамлар үнсиз қалса, онда таслар сөйлеп баслайды. Олар Қудайға алғыс айта берсин! – деди. Бирақ усының менен бирге Ийемиз бүгинги даўыслап Оған алғыс айтып атырғанлар, бир неше күннен соң Оны сатып, Оннан жүз буратуғынын да билетуғын еди. Ал олардың сүйиспеншилиги тез арада жек көриўшиликке өзгерип, Оны атанақ ағашқа шегелейди.
СОРАЎЛАР:
1. Ийсаның изине Ерусалимге дейин ерип барған адамлар, Оннан нени күткен еди?
2. Ийса Ерусалимге қай тәризде кирип барды?
3. Ийса ушын не әҳмийетлирек еди: патша болыў ма ямаса атанақ ағашта қыйналып, Өз Әкесиниң еркин орынлаў ма? Не ушын?
