Ийса Масийхтың дәўириндеги Ерусалим
Жарлы жесир ҳаялдың садақасы
Мухаддес Китап, Марк жазған Хош Хабар, 12-бап, 41-44 аятлар.
Ийса Ерусалимге келип, шәкиртлери менен бирге Ибадатхананың сыртқы ҳәўлисине барды. Ол жерде Ийса садақа қутысына жақын жерде адамардың қутыға қалай ақша салып атырғанына қарап отырды. Ол бай яҳудийлердиң өзлерине басқалардың итибарын қаратыў ушын, көзабаға көп ақша салып атырғанын көрди. Сонда бир жарлы жесир ҳаял келип, өзиниң азғантай еки тийинин садақа қутысына салды. Жаратқан Ийе бул тийинлердиң жарлы жесир ҳаял ушын қаншелли әҳмийетке ийе екенин билди. Ол Өз шәкиртлерин шақырып, оларға:
– Бул жарлы жесир ҳаял қутыға ақша салғанлардың ҳәммесинен де көп салды. Себеби олардың ҳәммеси өз байлықларынан аўысқанын салды. Ал бул ҳаял жарлы болса да, күн көрисине керекли барлық ақшасын салды! – деди.
Бул шәкиртлери ушын жақсы сабақ болды. Ийса оларға, Қудайдың берилген үлкен садақаға емес, ал садақа бериўшиниң жүрегине қарайтуғынын көрсетиўди қәлеген еди. Олар келешекте Жәмәәтке ғамхорлық қылғанда, тап усындай қылыўы керек еди.
СОРАЎЛАР:
1. Ибадатхананың сыртқы ҳәўлисинде Ийсаның ҳәм шәкиртлериниң дыққатын не нәрсе тартқан еди?
2. Көп берилген садақа не ушын Ийсаны таң қалдырмады?
3. Ийса не ушын жарлы жесир ҳаялдың берген садақасын үлги етип көрсетти?
Сизлерге шынын айтып турман: бул жарлы жесир ҳаял қутыға ақша салғанлардың ҳәммесинен көп салды. Себеби олардың ҳәммеси өз байлықларынан аўысқанын салды. Ал бул ҳаял жарлы болса да, күн көрисине керекли барлық ақшасын салды.
Марк жазған Хош Хабар 12:43-44
