Ийсаның Бетанияда майланыўы
Мухаддес Китап, Юхан жазған Хош Хабар, 12-бап, 1-8 аятлар
Ийса Өз шәкиртлери менен Қутқарылыў байрамынан алты күн бурын Бетанияға келди. Ол әдеттегидей, Марта, Мәриям ҳәм Лазардың үйинде болды.
Келеси күни Олар ҳәммеси биргеликте Ийсаның Өзи мақаў кеселден шыпалаған Шимонның үйине қонаққа барды. Кешки аўқатқа Марта дастурхан жайып хызмет етти. Мәриям орнынан турып, қымбат баҳалы май қуйылған алавастр гүзени алды да, Ийсаның қасына барды. Ол гүзениң аўзын әсте ғана ашты да, майды Ийсаның басына ҳәм аяғына қуйды. Кейин ол узын шашын жайып, Ийсаның аяғын шашы менен сыпыра баслады. Пүткил үйдиң иши қымбат баҳалы майдың ийисине толып кетти. Сол жердегилердиң базылары Мәриямға ашыўланды. Олар қымбат баҳалы майдың усындай жол менен жоқ қылыныўына иши ашыды. Кейин ала Ийсаға сатқынлық қылатуғын Яҳуда Искариот:
– Не ушын бул май үш жүз динарға сатылып, ақшасы жарлыларға берилмеди? – деди.
Бул сөзлерди ол жарлыларды ойлағаны ушын емес, ал уры болғаны ушын айтты. Орталықтағы пулдың қутысы онда болып, ол қутыға салынғанлардан өзине алатуғын еди.
Ийса шәкиртлердиң наразылықларын тоқтатып, қатаң түрде:
– Ҳаялды тынышына қой! Ол буны Мениң жерленетуғын күним ушын сақлап қойған. Жарлылар сизлер менен бәрқулла бирге, ал Мен сизлер менен бәрқулла бирге болмайман. Сизлерге шынын айтып турман: Хош Хабар дүньяның қай жеринде жәрияланса да, бул ҳаял еске алынып, оның Мен ушын ислеген иси айтылатуғын болады, – деди.
СОРАЎЛАР:
1. Бетанияда Ийса кимниң үйинде болды? Ол қашан сол жерге барған еди?
2. Мәриям не қылған еди?
3. Мәриямның исине наразылық билдирген қайсы шәкирт еди?
