Ийсаның қолға алыныўы
Мухаддес Китап, Лука жазған Хош Хабар, 22-бап, 47-54 аятлар
Бағдың қасында бир топар адамлар пайда болды. Адамлар өзлериниң жолын шам менен жақтыландырған еди. Олар тап қарақшыны ямаса қанхорды қолға алыў ушын келгендей, қылыш ҳәм шоқмарлар менен қуралланған еди. Олардың көпшилиги бас руўханий менен парисейлердиң хызметшилери еди, ал оларды баслап келген адам шәкиртлердиң бири болған Яҳуда еди.
– Кимди излеп келдиңлер? – деп сорады Ийса. Топар ишинен биреўи:
– Насыралы Ийсаны, – деп жуўап берди. Ийса:
– Бул Мен, - деди.
Ийсаны услаў ушын бирге келген адамларға Яҳуда белги бериўди алдыннан былай келискен еди: «Алжасық болмаўы ушын, мен Устазымды аманласыў белгиси сыпатында сүйемен. Усы белги бойынша сизлер қолға алыў керек болған Адамды услайсыз».
Яҳуда Ийсаға жақынлағанда, Ол әсте оған:
– Яҳуда! Сен Адам Улын сүйип турып, Оған сатқынлық ислейсең бе? - деди.
Бул сөзлер Яҳуданың жүрегине барып тийди, деген менен, ол Ийени сүйди. Сонда олар Ийсаға жақынлап келди де, Оған тәп берип, услап алды.
– Не ушын Мени усы жерде түн ортасында услап атырсызлар? Мен ҳәр күни Ибадатханада отырып тәлим беретуғын едим, бирақ сизлер Мени усламадыңлар, – деди Ийса ҳәм ҳеш қандай қарсылық билдирмей, Өзин байлаўына жол қойды.
Сонда шәкиртлериниң ҳәммеси Устазын алып әкетип баратырғанын көрип қорққанлықтан, Оны таслап, қашып кетти.
Ийса Өзин өлим жазасы күтип турған Ерусалим қаласына душпанлар тәрепинен алып барылды.
Ийса Өзин өлим жазасы күтип турған Ерусалим қаласына душпанлар тәрепинен алып барылды.
