Петрдиң Ийсадан таныўы
Мухаддес Китап, Лука жазған Хош Хабар, 22-бап, 54-62-аятлар.
Жума күнги таң басланды. Ийсаны Каяфа деген бас руўханийге алып барды. Оның үйине диний муғаллимлер менен ақсақаллар жыйналған еди. Бас руўханийлер ҳәм пүткил жоқарғы кеңес Ийсаны өлим жазасына ҳүким етиў ушын, Оған қарсы жалған гүўалық изледи. Петр бас руўханийдиң ҳәўлисине дейин Устазына узақтан ерип барды, сол жерде Ийсаны сораўға тутып атыр еди. Күн суўық болғанлықтан, хызметшилер менен сақшылар көмир жағып, жылынып турды. Петр де олар менен бирге турып жылынды. Қапыны қараўыллаған шоры қыз Петрден:
– Сен де бул Адамның шәкиртлеринен емессең бе? – деп сорады.
– Яқ, Яқ, – деп Петр оны дәрҳәл исендирди.
Солай етип, ол жақында ғана ҳеш қашан бундай қылмайман деп айтқан болса да, Ийсадан биринши мәрте бас тартты. Петр ҳәўлидеги оттың қасына бараман дегенше, дерлик бир саат ўақыт өткен еди. Ол Устазы ҳүким етилип атырғанда Оған не жүз берип атырғанының барлығын еситип, көрип турған еди. Аламан ишине жасырынып, ол ҳүкимниң тамам болыўын күтиўди қәледи. Бираздан соң, хызметшиниң бири Петрге қарап, былай деди:
– Сен де солардың бирисең!
Петр қарсылық билдирип:
– Ийса менен дейсең бе? Ол Адамды улыўма танымайман! – деди.
Усылай етип, ол Ийсадан екинши мәрте танды.
Сол ўақытта ҳүким залында қорқынышлы шаўқым көтерилди. Ийсаны түрткиледи, Оның үстинен күлди, базылары Оны ура баслады.
Усы жерде және биреў Петрге:
– Ырасында да, сен солардың бирисең. Бул сениң сөйлегениңнен анық билинип тур, – деди.
Петр Устазына қаншелли жаўызлық қылып атырғанын көрди, сонлықтан да, ол Оның қатарына қосылмаў ушын, былай деди:
– Мен бул Ийсаны танымайман!
Сол ўақытта-ақ, таза күнниң басланғанын хабарлап, қораз қышқырды. Сонда Петр өткен күндеги Қутқарылыў байрамы кешесинде Ийсаның: «Бүгин қораз шақырмастан бурын сен Меннен үш рет танасаң», – деп айтқан сөзин еследи. Петр өзи танған Ийеге қарады ҳәм Устазының да оған қарап турғанын көрди. Петрди шерменделик ҳәм азап бийлеп алды. Ол қатты өкирип жылаўы менен ҳәўлиден сыртқа шығып кетти. Ол Устазының бул қарасын ҳеш қашан умыта алмады.
СОРАЎЛАР:
1. Петрди Ийсаның шәкиртлериниң бири сыпатында ким таныды?
2. Петр не деп жуўап берди? Бул неше мәрте қайталанды?
3. Петр не ушын өкирип жылады?
