Jaratılıs 13 bob
1 İbram hayalın ha'm o'zinin' barlıq mal-mu'lkin aldı da, Mısırdan shıg'ıp, Negebke ketti. Lut ta olar menen birge ketti.
2 İbram mallarg'a, gu'mis ha'm altınlarg'a og'ada bay edi.
3 Ol Negebten Beyt-Elge shekem ko'ship-qonıp ju'rdi ha'm Beyt-El menen Ay qalasının' ortasındag'ı burın o'zi shatır qurg'an orıng'a keldi.
4 Sol jerde burın o'zi qurg'an qurbanlıq orıng'a barıp, Jaratqan İyenin' atın aytıp shaqırdı.
5 İbram menen birge ko'shken Luttın' da iri ha'm mayda malları, shatırları bar edi.
6 Olardın' mal-mu'lki sonshelli ko'p bolg'anlıqtan jer jetispey, birge jasaw mu'mkin bolmay qaldı.
7 Sonlıqtan İbram menen Luttın' shopanları arasında ja'njel payda boldı. Sol waqıtları qanan ha'm periz xalıqları da usı elde jasaytug'ın edi.
8 Sonda İbram Lutqa: «Bizlerdin' aramızda da, shopanlarımızdın' arasında da ja'njel bolmasın. Aqırı, bizler tuwısqanbız-g'o!
9 Barlıq jer senin' ko'z aldın'da. Kel, bo'lineyik. Eger sen solg'a ketsen', men on'g'a ketemen. Eger sen on'g'a ketsen', men solg'a ketemen», – dedi.
10 Lut a'tirapına qarap, pu'tkil İordan tegisliginin' Soarg'a shekemgi mol suwlı jerlerin ko'rdi. Jaratqan İye Sodom ha'm Gomoranı joq etpesten aldın, bul jerler Jaratqan İyenin' bag'ınday, Mısır jerindey edi.
11 Lut pu'tkil İordan tegisligin tan'lap, shıg'ısqa qaray ketti. Solay etip, olar birbirinen bo'lindi.
12 İbram Qanan jerinde qaldı, al Lut tegisliktegi qalalardın' arasına jaylasıp, Sodomg'a jaqın jerge shatır qurdı.
13 Sodom xalqı jawız bolıp, Jaratqan İyege qarsı ko'p gu'nalar isleytug'ın edi+.
14 Lut İbramnan bo'lingennen son', Jaratqan İye İbramg'a bılay dedi: «O'zin' turg'an jerden arqag'a ha'm qublag'a, shıg'ısqa ha'm batısqa qara!
15 O'zin' ko'rip turg'an jerdin' ha'mmesin sag'an ha'm senin' urpaqların'a ma'n'gige beremen.
16 Urpaqların'dı jerdin' qumı sıyaqlı ko'beytemen. Kim de kim jerdegi qumlardı sanay alsa, senin' urpaqların'dı da sanay aladı.
17 Qa'nekey, bar da, Menin' sag'an beretug'ın jerlerimdi bastan ayag'ına shekem aylanıp shıq».
18 İbram Xebrong'a jaqın jerdegi Mamre dep atalatug'ın terebinf terekligi janına shatırların ko'shirip aparıp ornalastı. Sol jerde ol Jaratqan İyege arnap qurbanlıq orın qurdı.
