Jaratılıs 16 bob
1 İbramnın' hayalı Saray og'an ele bala tuwıp bermegen edi. Saraydın' Ajar degen mısırlı shorısı bar edi.
2 Saray İbramg'a: «Minekey, Jaratqan İye meni bala tuwıwdan mahrum etti. Sen menin' shorım menen jat, mu'mkin, ol arqalı balalı bolarman», – dedi. İbram Saraydın' so'zine qulaq astı.
3 Solay etip, İbramnın' Qanan jerinde jasag'anına on jıl bolg'anda, Saray o'zinin' mısırlı shorısı Ajardı İbramg'a toqallıqqa alıp berdi.
4 İbram Ajar menen jatqannan son', ol ha'miledar boldı. Ajar o'zinin' ha'miledar ekenligin bilgende, xanımın mensinbey qoydı.
5 Saray İbramg'a: – Menin' ja'bir shegiwime sen ayıplısan'. Men o'zimnin' shorımdı senin' qoynın'a saldım, al ol o'zinin' ha'miledar ekenin bilgende, meni mensinbey qoydı. Senin' menen menin' aramda Jaratqan İyenin' O'zi qazılıq etsin, – dedi.
6 İbram Sarayg'a: – Shorın' senin' qolın'da emes pe? Og'an ne qılaman desen' de, o'zin' bilesen', – dedi. Solay etip, Saray Ajarg'a qattı azap bere baslag'anlıqtan, Ajar onnan qashıp ketti.
7 Jaratqan İyenin' perishtesi onı sho'ldegi bulaqtın' janınan, Shurg'a aparatug'ın joldın' boyınan tawıp:
8 – Saraydın' shorısı Ajar, qayaqtan kelip, qayaqqa baratırsan'? – dep soradı. Ol: – Men xanımım Saraydan qashıp baratırman, – dep juwap berdi.
9 Sonda Jaratqan İyenin' perishtesi og'an: – Xanımın'a qaytıp bar ha'm og'an boysın, – dedi.
10 Perishte dawam etip: – Men senin' urpaqların'dı sonshelli ko'beytemen, olardı hesh kim sanay almaytug'ın boladı, – dedi.
11 Jaratqan İyenin' perishtesi og'an ja'ne: – Minekey, sen ha'miledarsan'. Sen ul tuwasan'. Onın' atın İsmayıl dep qoyasan'. O'ytkeni Jaratqan İye senin' zarın'dı esitti!
12 Senin' ulın' qulanday boladı. Ol ha'mmege qarsı, ha'mme og'an qarsı boladı ha'm ol barlıq tuwısqanları menen dushpan bolıp o'mir su'redi, – dedi.
13 Ajar: «Men o'zimdi ko'rip turg'an Qudaydı ko'rdim», – dep, o'zi menen so'ylesken Jaratqan İyeni «El-Roiy» dep atadı.
14 Sonlıqtan Qadesh penen Beredtin' arasında jaylasqan bul qudıq «Beer-Laxay-Roiy» dep ataladı.
15 Ajar İbramg'a ul tuwıp berdi. İbram ulına İsmayıl dep at qoydı.
16 Ajar İsmayıldı tuwg'anda, İbram seksen altı jasta edi.
