Jaratılıs 2 bob
1 Usılayınsha aspan ha'm jer, olardag'ı pu'tkil barlıq jaratılıp bolındı.
2 Quday O'z islerin jetinshi ku'nge deyin tamamlap, jetinshi ku'ni barlıq islerinen dem aldı
3 Ol jetinshi ku'ndi jarılqap, onı muxaddes etip ayırdı. Sebebi Ol usı ku'ni O'zinin' barlıq jaratıwshılıq islerinen dem aldı.
4 Mine, aspan ha'm jerdin' jaratılıw tariyxı usınday.Quday İye aspan menen jerdi jaratqanda,
5 jer betinde ele birde bir dala putası yamasa birde bir dala sho'bi o'spegen edi. O'ytkeni Quday İye ele jerge jawın jawdırmag'an bolıp, jerdi ta'rbiyalaytug'ın adam da joq edi.
6 Biraq jerden bulaq suwı shıg'ıp, pu'tkil jer ju'zin suwg'arıp turatug'ın edi.
7 Son'ınan Quday İye jerdin' topırag'ınan adamdı jaratıp, onın' murnına o'mir demin u'pledi. Solay etip, adam tiri jan boldı.
8 Quday İye shıg'ısta, Edende bir bag' ornatıp, O'zi jaratqan adamın sol jerge jaylastırdı.
9 Keyin Quday İye ko'zdin' jawın alatug'ın, jewge jaqsı tu'rli-tu'rli miywe ag'ashların jerden o'sirip shıg'ardı. Al bag'dın' ortasına o'mir teregin ha'm jaqsılıq penen jamanlıqtı biliw teregin o'sirip shıg'ardı.
10 Edennen bir da'rya ag'ıp, bag'dı suwg'ardı ha'm arı qaray to'rt tarmaqqa bo'linip ketti.
11 Olardın' birinshisinin' atı – Pishon bolıp, ol altın ka'ni bolg'an pu'tkil Xawila jerin aylanıp ag'adı.
12 Altını jaqsı bolg'an ol jerde xosh iyisli shayır ha'm oniks tası bar.
13 Ekinshi da'ryanın' atı – Gixon bolıp, ol pu'tkil Kush jerin aylanıp ag'adı.
14 U'shinshi da'ryanın' atı Tigr bolıp, ol Ashshurdın' shıg'ıs ta'repinen ag'ıp o'tedi. To'rtinshi da'ryanın' atı – Evfrat edi.
15 Solay etip, Quday İye Eden bag'ın ta'rbiyalawı ha'm onda islewi ushın adamdı sol jerge ornalastırıp,
16 og'an: «Sen bul bag'dag'ı qa'legen teregin'nin' miywesinen jey alasan'.
17 Biraq jaqsılıq ha'm jamanlıqtı biliw tereginen jeme, jesen' so'zsiz o'lesen'», – dep buyırdı.
18 Son'ınan Quday İye: «Adamnın' jalg'ız bolg'anı jaqsı emes, og'an ılayıqlı ja'rdemshi jarataman», – dedi.
19 Quday İye jerdegi haywanlardın', aspandag'ı quslardın' ha'mmesin topıraqtan jaratıp, olarg'a qanday at beretug'ının biliw ushın, olardı adamg'a alıp keldi. Adam ha'r birine qanday at qoysa, sol janlı janıwar solay atalatug'ın boldı.
20 Adam barlıq mallarg'a, aspandag'ı quslarg'a ha'm jabayı haywanlarg'a at qoydı. Biraq adamnın' o'zine ılayıqlı ja'rdemshi tabılmadı.
21 Sonda Quday İye adamg'a teren' uyqı berdi ha'm ol uyıqlap atırg'anda, onın' bir qabırg'asın alıp, ornın et penen jawıp qoydı.
22 Quday İye adamnın' qabırg'asınan hayaldı jaratıp, onı adamg'a alıp keldi.
23 Sonda adam bılay dedi: «Menin' su'yeklerimnen alıng'an su'yek, Etimnen alıng'an et minekey-g'o! Ol hayal adam dep atalsın, O'ytkeni ol er adamnan alındı».
24 Sonlıqtan er adam ata-anasın qaldırıp, o'z hayalına qosıladı ha'm ekewi bir dene boladı.
25 Adam da, onın' hayalı da jalan'ash edi, biraq olar ele uyattın' ne ekenin bilmeytug'ın edi.
