Jaratılıs 22 bob
1 Bir qansha waqıttan keyin, Quday İbrayımdı sınadı. Quday og'an: – İbrayım! – dedi. İbrayım: – La'bba'y! – dedi.
2 Sonda Quday og'an: – O'zin'nin' su'yikli jalg'ız ulın' Isaqtı alıp, Moriya jerine bar. Ol jerde, Men sag'an ko'rsetetug'ın tawlardın' birinde onı qurbanlıqqa shalıp, jag'ıp jiber, – dedi.
3 İbrayım erten'ine azanda erte turıp, eshegine ju'klerdi arttı. Ol o'zi menen birge eki xızmetshi balasın ha'm ulı Isaqtı aldı. Qurbanlıq ushın otın shawıp bolıp, Qudaydın' o'zine aytqan jerine barıw ushın jolg'a shıqtı.
4 U'shinshi ku'ni İbrayım ko'z taslap, aytılg'an orındı uzaqtan ko'rdi.
5 İbrayım xızmetshilerine: – Sizler usı jerde eshek penen birge qalın'lar. Al bizler balamız ekewimiz ana jerge barıp, Qudayg'a sıyınamız ha'm sizlerge qaytıp kelemiz, – dedi.
6 İbrayım qurbanlıq ushın shawılg'an otınlardı balası Isaqqa arqalatıp, o'zi ot penen pıshaqtı aldı. Son'ınan ekewi birge ju'rip ketti.
7 Ketip baratırıp, Isaq a'kesine: – Ag'a! – dedi. – La'bba'y, ulım, – dedi İbrayım. Isaq onnan: – Minekey, ot ha'm otın bar. Biraq jandırılatug'ın qurbanlıq ushın beriletug'ın janlıq qa'ne? – dep soradı.
8 İbrayım: – Ulım, jandırılatug'ın qurbanlıq bolatug'ın janlıqtı Qudaydın' O'zi jetkizedi, – dep juwap berdi. Solay etip, olar ekewi jolın dawam etti.
9 Olar Qudaydın' İbrayımg'a aytqan jerine jetip kelgende, İbrayım qurbanlıq orın qurıp, onın' u'stine otınlardı qaladı. Keyin ulı Isaqtı baylap, qurbanlıq orındag'ı otınlardın' u'stine jatqızdı.
10 İbrayım balasın bawızlamaqshı bolıp, pıshaqtı aldı.
11 Biraq Jaratqan İyenin' bir perishtesi aspannan dawıslap: – İbrayım! İbrayım! – dedi. – La'bba'y, – dedi ol.
12 Perishte og'an: – Balag'a qol ko'terme, og'an hesh na'rse isleme. Endi men senin' Qudaydan qorqatug'ının'dı bildim. Sebebi sen Mennen jalg'ız ulın'dı da ayamadın', – dedi.
13 İbrayım basın ko'terip, putalıqqa shaqınan ilinip turg'an qoshqardı ko'rdi. Ol barıp, qoshqardı a'keldi de, ulının' ornına qoshqardı qurbanlıq ushın shalıp, jag'ıp jiberdi.
14 Solay etip, İbrayım sol orındı Yahwe-İre dep atadı. Sonlıqtan usı ku'nge deyin: «Jaratqan İye tawında o'zi jetkizedi», – dep aytıladı.
15 Jaratqan İyenin' perishtesi ekinshi ret İbrayımg'a aspannan dawıslap
16 bılay dedi: «Jaratqan İye bılay deydi: „O'z atım menen ant ishemen, sen bul isti islep, jalg'ız ulın'dı da ayamadın',
17 sonlıqtan Men seni u'sti-u'stine jarılqayman. Urpaqların'dı aspandag'ı juldızlar ha'm ten'iz jag'asındag'ı qumlar sıyaqlı u'sti-u'stine ko'beytemen. Senin' urpaqların' dushpanların'nın' qalalarına iyelik etedi.
18 Mag'an boysıng'anın' ushın, urpaqların' arqalı jer ju'zindegi barlıq xalıqlar jarılqanadı“».
19 Sonnan keyin, İbrayım xızmetshilerinin' janına qaytıp keldi. Olar birlikte Beer-Shebag'a qaray ketti. İbrayım sol jerde jasap qaldı.
20 Bir qansha waqıtlardan son', İbrayımg'a: «Tuwısqanın' Naxorg'a hayalı Milka ullar tuwıp berdi», – degen xabar jetip keldi.
21 Milka tun'g'ıshı Ustı, onın' inisi Buzdı, Aramnın' a'kesi Kemueldi
22 Kesedti, Xazonı, Pildashtı, İdlaftı ha'm Betueldi du'nyag'a keltirdi.
23 Al Betuelden Rebekka tuwıldı. Usı segiz uldı İbrayımnın' tuwısqanı Naxorg'a Milka tuwıp berdi.
24 Naxordın' Reuma degen toqalı da og'an Tebax, Gaxam, Taxash ha'm Maaxa degen balalardı tuwıp berdi.
