Jaratılıs 34 bob
1 Bir ku'ni Yaqıptın' Leadan tuwılg'an qızı Dina sol jerdin' qızların ko'riw ushın shıqtı.
2 Ol jerdin' biyi xiw xalqınan bolg'an Xamordın' ulı Shexem Dinanı ko'rgende, onı uslap alıp, og'an zorlıq isledi.
3 Jigittin' Yaqıptın' qızı Dinag'a kewli ketip, onı su'yip qaldı ha'm og'an jıllı so'yledi.
4 Shexem a'kesi Xamorg'a: – Bul qızdı mag'an hayallıqqa alıp ber, – dedi.
5 Yaqıp qızı Dinanın' namısı ayaq astı etilgenin esitkende, ulları jaylawda mal bag'ıp ju'rgen edi. Sonlıqtan Yaqıp olar qaytıp kelgenshe u'ndemedi
6 Sol waqıtta Shexemnin' a'kesi Xamor Yaqıp penen so'ylesiw ushın, onın' aldına bardı.
7 Al Yaqıptın' ulları bolg'an waqıyanı esite sala, jaylawdan qaytıp keldi. Olar ashıwlanıp, g'a'zepke mindi. O'ytkeni Shexem Yaqıptın' qızın zorlap, İzraildın' abırayın to'kken ha'm islewge bolmaytug'ın isti islegen edi.
8 Sonda Xamor olarg'a bılay dedi: – Ulım Shexemnin' kewli qızın'ızda, qızın'ızdı og'an hayallıqqa berin'.
9 Bir-birimiz benen quda-tamır bolayıq. Qız alısıp, qız beriseyik.
10 Bizler menen birge jasay berin'ler. Elimizdin' qa'legen jerinde eminerkin jasap, sawda-satıq qılın'lar ha'm mu'lik iyelen'ler.
11 Keyin Shexem de qızdın' a'kesi menen a'jag'alarına: – Kewlin'iz tolıwı ushın, sizlerge qa'legenin'izdi beremen.
12 Mennen qansha qalın' mal ha'm sawg'a talap qılsan'lar da, ha'mmesin beremen. Tek qızın'ızdı mag'an hayallıqqa bersen'iz bolg'anı, – dedi.
13 Yaqıptın' ulları qarındası Dinanın' namısın ayaq astı etkeni ushın Shexemge ha'm onın' a'kesi Xamorg'a hiyle menen juwap berip,
14 olarg'a bılay dedi: – Yaq, bizler bunday qıla almaymız. Qarındasımızdı su'nnet etilmegen adamg'a bere almaymız, o'ytkeni bul bizler ushın shermendelik boladı.
15 Tek mına sha'rtimizdi qabıl etsen'iz g'ana ırazı bolamız: sizlerdin' ha'r bir er adamın'ız bizler sıyaqlı su'nnet etilse,
16 bir-birimizge qız berip, qız alısamız. Sizler menen birge jasap, bir xalıq bolamız.
17 Eger su'nnet bolıwg'a kelisim bermesen'iz, qızımızdı alıp qaytamız.
18 Bul so'zler Xamor menen onın' ulı Shexemge maqul tu'sti.
19 A'kesinin' u'yinde ha'mmeden ko'p hu'rmetke iye bolg'an jas jigit Shexem bul talaptı orınlawdı tezlestirdi. Sebebi ol Yaqıptın' qızına ashıq edi.
20 Solay etip, Xamor ha'm onın' ulı Shexem qala xalqı menen so'ylesiw ushın qala da'rwazasına bardı ha'm olarg'a bılay dedi:
21 Bul adamlar bizlerge doslıq qarım-qatnasta. Olar jerimizde jasap, sawda-satıq qılsın. Jer ken', olarg'a da jetedi. Olar menen qız alısıp, qız beriseyik.
22 Olar tek mına sha'rt penen g'ana bizler menen birge jasap, bir xalıq bolıwg'a ırazı boladı: bizlerdin' ha'r bir er adamımız olar sıyaqlı su'nnet etiliwi kerek eken.
23 Eger solay islesek, olardın' su'riwleri, malmu'likleri ha'm barlıq malları bizlerdiki bolmay ma? Kelin'ler, olarg'a kelisim bereyik, olar bizler menen birge jasap qalsın.
24 Qala turg'ınlarının' ha'mmesi Xamordın' ha'm onın' ulı Shexemnin' so'zlerin qabıl etti ha'm qaladag'ı barlıq er adamlar su'nnet etildi.
25 U'shinshi ku'ni, olar awırıp jatırg'anda, Yaqıptın' eki ulı – Dinanın' a'jag'aları Shimon ha'm Lebiy qılıshların asınıp alıp, qalag'a irkinishsiz kirdi de, barlıq er adamlardı qılıshtan o'tkerdi.
26 Olar Xamordı ha'm ulı Shexemdi de qılıshtan o'tkizip, Dinanı Shexemnin' u'yinen alıp ketti.
27 Qarındasının' namısın ayaq astı qılg'anı ushın, Yaqıptın' ulları o'lgenlerdi tonap, qalanı talan-taraj etti.
28 Olardın' iri-mayda malların ha'm esheklerin, qaladag'ı da, jaylawdag'ı da barlıq na'rselerin alıp ketti.
29 Ja'ne de, olardın' balaların ha'm hayalların tutqın qılıp, pu'tkil baylıg'ın ha'm u'ylerindegi barlıq zatların olja etti.
30 Yaqıp Shimon ha'm Lebiyge: – Sizler usı jerdin' turg'ınları bolg'an qanan ha'm periz xalıqların mag'an dushpan qılıp qoyıp, basıma ba'le arttırdın'ız. Menin' adamlarım az. Eger olar birigip, mag'an qarsı shıqsa, meni xojalıg'ım menen birlikte joq qıladı, – dedi.
31 Biraq olar: – Qarındasımızg'a buzıq hayalg'a qatnas jasag'anday qatnas jasawg'a jol qoyıwg'a bola ma? – dedi.
