Jaratılıs 45 bob
1 Sonda Yusup xızmetshilerdin' aldında o'zin artıq tuta almay: – Ha'mmeni bul jerden shıg'arıp jiberin'! – dep baqırdı. Solay etip, Yusup tuwısqanlarına o'zin tanıtqanda, onın' janında hesh kim joq edi.
2 Onın' dawıslap jılag'anı sonshelli, mısırlılar da onın' jılag'anın esitti. Bul haqqında xabar faraonnın' sarayına da jetip bardı.
3 Yusup tuwısqanlarına: – Men Yusuppen! A'kem ele tiri me? – dedi. Biraq tuwısqanları onın' aldında albırap, ne dep juwap bererin bilmedi.
4 Yusup olarg'a: – Mag'an jaqınıraq kelin'ler, – dedi. Olar jaqınıraq kelgende, Yusup so'zin bılay dep dawam etti: – Men sizler Mısırg'a satıp jibergen tuwısqanın'ız Yusuppen!
5 Meni bul jerge satıp jibergenin'iz ushın qıynalman' ha'm o'zlerin'izdi ayıplaman'. Quday adamlardın' o'mirin saqlap qalıw ushın, meni sizlerden aldın bul jerge jiberdi.
6 Elde eki jıldan beri ashlıq bolmaqta, ja'ne bes jıl dawamında jer de egilmeydi, zu'ra'a't te jıynalmaydı.
7 Quday jer ju'zinde urpaqların'ızdı saqlap qalıw ushın ha'm tan' qalarlıq jol menen janların'ızdı qutqarıw ushın, meni sizlerden aldın bul jerge jiberdi.
8 Meni bul jerge sizler jibergenin'iz joq, al Quday jiberdi. Ol meni faraong'a ken'esgo'y, onın' sarayına xojayın ha'm pu'tkil Mısır eline basshı etip qoydı.
9 Sizler da'rhal a'kemnin' aldına barın' da, og'an ulın'ız Yusup: «Quday meni pu'tkil Mısır eline basshı etip qoydı. İrkilmey, janıma kel.
10 Sen balaların', aqlıqların', su'riw ha'm padaların', pu'tkil mal-mu'lkin' menen birlikte Goshen jerine ornalasıp, menin' janımda bolasan'.
11 Sol jerde men seni bag'aman, o'ytkeni ashlıq ja'ne bes jıl dawam etedi. Bolmasa sen, xojalıg'ın' ha'm sag'an tiyisli ha'mme na'rse nabıt boladı», – dep aytıp atır den'ler.
12 Son'ınan ol tuwısqanlarına ja'ne: – Mine, sizler de, inim Benyamin sen de o'z ko'zlerin'iz benen ko'rip turg'anın'ızday, sizlerge bul so'zlerdi aytıp turg'an men – haqıyqattan da, Yusup bolaman.
13 Mısırda menin' qanshelli ataq-abırayg'a iye ekenimdi ha'm o'zlerin'iz ko'rgen na'rselerdin' ha'mmesin a'keme aytıp berin'. A'kemdi da'rhal bul jerge alıp kelin', – dedi.
14 Son'ınan Yusup inisi Benyaminnin' moynınan qushaqlap jıladı. Benyamin de onı qushaqlap jıladı.
15 Yusup barlıq ag'aların da su'yip, olardı qushaqlap jıladı. Keyin tuwısqanları onın' menen so'ylese baslad
16 Yusuptin' tuwısqanları kelgeni haqqında xabar faraonnın' sarayına jetip barg'anda, faraon ha'm onın' xızmetshileri bug'an quwandı.
17 Faraon Yusupke bılay dedi: «Tuwısqanların'a ayt, olar esheklerine ju'klerin artıp, Qanang'a qaytsın.
18 A'kesin ha'm xojalıqların alıp, usı jerge qaytıp kelsin. Men olarg'a Mısırdın' en' jaqsı jerlerin beremen, iship-jeytug'ını mol boladı».
19 Ja'ne de, olarg'a bılay dep aytıwın'dı da buyıraman: «Balaları ha'm hayalları ushın Mısırdan arbalar alıp ketsin ha'm a'ken'izdi bul jerge alıp kelsin.
20 Qalıp ketken zatların'ızg'a ashınbasın, pu'tkil Mısırdın' en' jaqsı zatları olardiki boladı».
21 İzraildın' ulları aytılg'anlardı isledi. Yusup faraonnın' buyrıg'ı boyınsha olarg'a arbalar ha'm jol ushın azıq berdi.
22 Yusup olardın' ha'r birine bir shapannan, al Benyaminge u'sh ju'z shekel gu'mis penen bes shapan berdi.
23 Ol a'kesine arnap, on eshekke Mısırdın' en' jaqsı zatların ju'kledi ha'm a'kesinin' jolı ushın, on mashag'a da'n, nan ha'm azıq-awqat artıp jiberdi.
24 Yusup tuwısqanların jolg'a shıg'arıp salıp atırıp: – Jolda ja'njellesip ju'rmen'ler, – dedi.
25 Yusuptin' tuwısqanları Mısırdan shıg'ıp, Qanan eline, a'kesi Yaqıptın' janına qaytıp keldi
26 Olar a'kesine: – Yusup tiri eken, ol ha'zir pu'tkil Mısır elin basqarıp tur, – dedi. Biraq Yaqıptın' ju'regi bu'lk etpedi ha'm olarg'a isenbedi.
27 Olar a'kesine Yusuptin' o'zlerine aytqan barlıq so'zlerin aytıp berdi. Yaqıp o'zin ko'shirip a'keliw ushın Yusuptin' jibergen arbaların ko'rgende, ruwxına jan kirdi.
28 Sonda İzrail: – Endi isenemen, ulım Yusup ele tiri eken! O'lmesimnen burın barıp, onı ko'retug'ın boldım, – dedi.
