2 Patshalar 14 bob
1 Seruya ulı İoab patshanın' Abshalomdı sag'ınıp ju'rgenin bildi.
2 Ol birewdi jiberip, Teqoada jasaytug'ın aqıllı bir hayaldı aldırdı. İoab hayalg'a: «Aza kiyimlerin'di kiyip, o'zin'di aza tutıp ju'rgen adam sıyaqlı ko'rset. A'tir de jaqpay, o'zin'di uzaq waqıttan beri o'lini azalap ju'rgen sıyaqlı tut.
3 Keyin patshag'a barıp, og'an menin' usı so'zlerimdi jetkiz», – dedi de, İoab hayalg'a nelerdi aytıw kerekligin u'yretti.
4 Solay etip, teqoalı hayal patshag'a bardı. Ol patshanın' aldında etbetinen jıg'ılıp, ta'jim etip, patshag'a: – Taqsır, mag'an ja'rdem berin', – dedi.
5 Patsha onnan: – Ne boldı? – dep soradı. Hayal patshag'a bılay dep juwap berdi: – Men bir baxıtsız jesir hayalman. Ku'yewim o'lip qaldı.
6 Shorın'ız bolg'an menin' eki ulım bar edi. Olar atızda to'belesip qalıptı. Olardı ayıratug'ın hesh kim bolmag'annan son', birewi birewin urıp, o'ltirip qoyıptı.
7 Endi pu'tkil tiyre shorın'ız bolg'an mag'an qarsı shıg'ıp: «Tuwısqanın o'ltirgen adamdı bizlerdin' qolımızg'a ber. Tuwısqanın o'ltirgeni ushın onı o'ltirip, usılayınsha miyrasxordı da joq qılamız», – dep atır. Solay etip, jer betinde ku'yewimnin' atın ha'm urpag'ın dawam ettiretug'ın tuyaq qaldırmaw ushın, olar menin' oshag'ımdag'ı qalg'an shoqtı da o'shirejaq.
8 Patsha hayalg'a: – U'yin'e qayta ber, bul isti senin' paydan'a sheship beremen, – dedi.
9 Sonda teqoalı hayal patshag'a: – Taqsır! Bul waqıyag'a men ha'm menin' a'kemnin' xojalıg'ı ayıplı bolsın. Patsha ha'm onın' taxtı ayıpsız bolsın, – dedi.
10 Patsha hayalg'a: – Birew sag'an qarsı bir na'rse dese, onı mag'an alıp kel. Ol qaytıp sag'an tiymeytug'ın boladı, – dedi.
11 Hayal patshag'a: – Olay bolsa, o'sh alıwshı a'mengerler isin gu'jitip, ulımdı o'ltirip qoymawı ushın, patsha, Qudayın'ız Jaratqan İye haqı ant ishsen'iz, – dedi. Patsha hayalg'a: – Tiri Jaratqan İyenin' atı menen aytaman: ulın'nın' bir tal shashı da tu'speydi, – dedi.
12 Hayal patshag'a: – Taqsır, shorın'ız bolg'an mag'an ja'ne bir so'z aytıwg'a ruxsat bersen'iz, – dedi. – Ayt, – dedi patsha.
13 Hayal so'zin dawam etip bılay dedi: – Ne ushın siz Qudaydın' xalqına qarsı bulay islep atırsız? Patsha, siz usı ga'pin'iz arqalı o'zin'iz o'zin'izdi ayıplap atırsız. O'ytkeni o'zin'iz quwg'ın qılg'an adamdı qaytarmay atırsız.
14 Jerge to'gilgen suwdı qaytıp jıynaw mu'mkin bolmag'anı sıyaqlı, ha'mmemiz de du'nyadan o'tip ketemiz. Biraq Quday jandı nabıt qılıwdı qa'lemeydi. Ol quwg'ın qılıng'an adamnın' O'zinen uzaq ketpewi ushın shara izleydi.
15 Xalıq meni qorqıtqanı sebepli, taqsırıma usılardı aytıp beriw ushın keldim. Men o'zimshe: «Patsha menen so'yleseyin, ba'lkim, ol shorısının' tilegin orınlar.
16 So'zlerime qulaq asıp, meni ha'm ulımdı o'ltirmekshi bolıp, Qudaydın' bergen miyrasınan ayırıwdı qa'legenlerdin' qolınan qutqarar,
17 taqsırımnın' so'zi meni tınıshlandırar», – dep oyladım. Sebebi siz, taqsır, jaqsı menen jamandı ayırıwda Qudaydın' perishtesi sıyaqlısız. Sizge Qudayın'ız Jaratqan İye yar bolsın!
18 Patsha hayalg'a: – Sennen bir na'rse sorayın, biraq mennen hesh na'rseni jasırma, – dedi. Hayal patshag'a: – Soran', taqsır, – dep juwap berdi.
19 Patsha hayaldan: – Bul islerdin' ha'mmesinde İoabtın' qolı bar ma? – dep soradı. Hayal patshag'a bılay dep juwap berdi: – Taqsır, aldın'ızda ant iship aytaman: sizden hesh na'rseni jasırıw mu'mkin emes. Awa, mag'an buyrıq bergen ha'm shorın'ızg'a usı so'zlerdin' ha'mmesin u'yretken qulın'ız İoab boladı.
20 Jag'daydı o'zgertiw ushın, qulın'ız İoab bunı oylap tapqan edi. Taqsır, siz Qudaydın' bir perishtesi sıyaqlı dana bolıp, eldegi waqıyalardın' ha'mmesinen xabardarsız.
21 Sonda patsha İoabtı shaqırtıp, og'an: – Meyli, tilegin'di orınlayman. Barıp, jas jigit Abshalomdı qaytarıp alıp kel, – dedi.
22 İoab et-betinen jerge jıg'ılıp, patshag'a ta'jim etti ha'm og'an minnetdarshılıq bildirip: – Taqsır, bu'gin mennen kewlin'iz tolg'anın bilip turman. Sebebi siz qulın'ızdın' tilegin orınladın'ız, – dedi.
23 Son'ınan İoab Geshurg'a barıp, Abshalomdı Erusalimge alıp keldi.
24 Biraq patsha: «Abshalom u'yine ketsin, menin' aldıma kelmesin», – dep buyrıq berdi. Sonlıqtan Abshalom patshanı ko'rmey, o'z u'yine ketti.
25 Pu'tkil İzrailda sın-sımbatı boyınsha Abshalom sıyaqlı maqtawı artqan adam joq edi. Ol basınan ayag'ına shekem minsiz edi. 26Abshalomg'a shashı awırlıq qılatug'ın bolg'anlıqtan, ol ha'r j
26 Abshalomg'a shashı awırlıq qılatug'ın bolg'anlıqtan, ol ha'r jılı shashın kestiretug'ın edi. Ol shashın kestirgen waqıtta o'lshetetug'ın edi. Onın' shashının' awırlıg'ı patshalıqtag'ı o'lshem birligi boyınsha o'lshegende, eki ju'z shekel shıg'atug'ın edi.
27 Abshalomnın' u'sh ulı ha'm Tamara degen sulıw bir qızı bar edi.
28 Abshalom Erusalimde eki jıl jasasa da, patshanı ko're almadı.
29 Son'ınan ol patshag'a jiberiw ushın İoabtı shaqırttı. Biraq İoab Abshalomg'a keliwdi qa'lemedi. Abshalom ekinshi ret shaqırttı, biraq İoabtın' ja'ne kelgisi kelmedi.
30 Sonda Abshalom qullarına: «Minekey, İoabtın' arpa atızı menikinin' janında tur. Barıp, atızg'a ot berin'», – dedi. Xızmetshiler barıp, İoabtın' atızına ot berdi.
31 İoab ornınan turdı da, Abshalomnın' u'yine barıp: – Qulların' ne ushın atızıma ot berdi? – dep soradı.
32 Abshalom og'an bılay dedi: – Minekey, men seni patshanın' aldına jiberiw ushın, usı jerge keliwin'di aytıp, adam jollag'an edim. Sen arqalı patshag'a: «Geshurdan ne ushın keldim? Ol jerde qalg'anım men ushın jaqsıraq bolar edi», – dep aytpaqshı edim. Endi men patshanı ko'rgim keledi. Eger ayıplı bolsam, meni o'zi o'ltirsin.
33 Sonda İoab barıp, Abshalomnın' so'zlerin patshag'a jetkizdi. Patsha Abshalomdı shaqırttı. Abshalom patshanın' aldına keldi de, onın' aldında et-betinen jerge jıg'ılıp, ta'jim etti. Patsha Abshalomdı su'ydi.
