2 Patshalar 6 bob

Kelisim sandıg'ının' Erusalimge alıp keliniwi(1-23).

¹ Dawıt ja'ne İzraildag'ı pu'tkil ag'la a'skerlerdi topladı. Olar otız mın' adam edi.

² Son'ınan Dawıt ha'm onın' menen birge bolg'an sol adamlardın' ha'mmesi sandıqtın' u'stindegi eki kerub arasında taxt qurg'an A'lemnin' Jaratqan İyesinin' atı menen atalg'an Qudaydın' sandıg'ın alıp keliw ushın Baale-Yahudag'a ketti.

³ Olar Qudaydın' sandıg'ın to'beshiktegi Abinadabtın' u'yinen alıp, taza bir arbag'a qoydı. Abinadabtın' ulları Uzza menen Axyo taza arbanı jeteklep ju'rdi.

⁴ Olar Qudaydın' sandıg'ın alıp ketip baratırg'anda, Axyo sandıqtın' aldında ju'rdi.

⁵ Sol waqıtta Dawıt ha'm pu'tkil İzrail xalqı Jaratqan İyenin' aldında qosıq aytıp, lira ha'm arfa shertip, da'p qag'ıp, sistranı shın'g'ırlatıp, kimbaldı dan'g'ırlatıp, bar ku'shi menen shadlıqqa bo'lenip kiyatırg'an edi.

⁶ Olar Naxon degen adamnın' qırmanına jetip barg'anda, o'gizler su'rnigip ketti. Sonda Uzza qolın sozıp, Qudaydın' sandıg'ın uslap qaldı.

⁷ Hu'rmetsizligi ushın Jaratqan İyenin' Uzzag'a g'a'zebi qaynadı ha'm sol jerde-aq onın' janın aldı. Uzza Qudaydın' sandıg'ının' qasında jan tapsırdı.

⁸ Jaratqan İyenin' Uzzanı jazalag'anına Dawıt qattı ashıwlandı. Sol ku'nnen baslap, ha'zirge deyin bul orın Peres-Uzza, yag'nıy «Uzzanın' qıyratılıwı» dep ataladı.

⁹ Dawıt sol ku'ni Jaratqan İyeden qorqıp: «Endi qalay Jaratqan İyenin' sandıg'ın a'kelip, janıma qoya alaman?» – dep oyladı.

¹⁰ onlıqtan Dawıt sandıqtı o'zinin' atı menen atalg'an qalag'a alıp barıwdın' ornına, gatlı Obed-Edomnın' u'yine apardı.

¹¹ Sandıq gatlı Obed-Edomnın' u'yinde u'sh ay turdı. Jaratqan İye Obed-Edomdı ha'm onın' pu'tkil shan'arag'ın jarılqadı.

¹² Dawıtqa: «Qudaydın' sandıg'ı sebepli, Jaratqan İye ObedEdomnın' shan'arag'ın ha'm og'an tiyisli ha'mme na'rseni jarılqadı», – degen xabar jetti. Sonda Dawıt barıp, Qudaydın' sandıg'ın Obed-Edomnın' u'yinen Dawıttın' qalasına quwanıshlı tu'rde alıp keldi.

¹³ Jaratqan İyenin' sandıg'ın ko'tergenler altı adım atqanda, Dawıt bir bug'a menen bir semiz tananı qurbanlıqqa shaldı.

¹⁴ Zıg'ır efod kiyip alg'an Dawıt Jaratqan İyenin' aldında bar ku'shi menen oyıng'a tu'sti.

¹⁵ Usılayınsha Dawıt ha'm pu'tkil İzrail xalqı quwanıshlı dawıslar ha'm ka'rnay sesleri astında sandıqtı alıp kiyatırg'an edi.

¹⁶ Sandıq Dawıttın' qalasına kirip kiyatırg'anda, Shauldın' qızı Mixal terezeden qarap turg'an edi. Ol Jaratqan İyenin' aldında sekirip oyıng'a tu'sip kiyatırg'an Dawıt patshanı ko'rgende, onı o'z kewlinde pa's ko'rip ketti.

¹⁷ Jaratqan İyenin' sandıg'ı alıp kelinip, Dawıttın' arnawlı tu'rde qurdırg'an shatırının' ishindegi o'z ornına qoyıldı. Son'ınan Dawıt Jaratqan İyege arnap jandırılatug'ın qurbanlıqlar ha'm tatıwlıq qurbanlıqların berdi.

¹⁸ Jandırılatug'ın ha'm tatıwlıq qurbanlıqların berip bolg'annan keyin, Dawıt A'lemnin' Jaratqan İyesinin' atı menen xalıqqa pa'tiya berdi.

¹⁹ Son'ınan ol pu'tkil xalıqqa, İzrail ja'miyetindegi ha'r bir erkek ha'm hayalg'a bir sho'rek nan, bir uwıs xurma ha'm bir dana keptirip nıg'ızlang'an kishmishten tarqattı. Bunnan son', pu'tkil xalıq u'ylerine qayttı.

²⁰ Dawıt o'z xojalıg'ına pa'tiya beriw ushın u'yine qaytıp kelgende, Shauldın' qızı Mixal onı qarsı alıwg'a shıqtı ha'm og'an: – İzrail patshası bu'gin qanday abırayg'a eristi?! O'z qullarının' shorıları aldında jaramsız adam sıyaqlı jalan'ashlanıp, o'zin ko'rsetti-g'o, – dedi.

²¹ Dawıt Mixalg'a bılay dep juwap berdi: – Meni a'ken'nin' ha'm onın' pu'tkil na'silinin' ornına tan'lap, O'z xalqı İzrailg'a hu'kimdar etip qoyg'an Jaratqan İyenin' aldında oyıng'a tu'stim. Awa, men Jaratqan İyenin' aldında oynay beremen.

²² Endi o'zimdi bunnan da to'men tutıp, ja'ne de pa'sirek sanayman. Biraq sen aytqan sol shorılar meni hu'rmetke bo'leydi.

²³ Shauldın' qızı Mixal o'mirinin' aqırına shekem biyperzent o'tti.