2 Patshalar 7 bob
1 Dawıt patsha o'z sarayında jasay berdi. Sebebi Jaratqan İye onı a'tirapındag'ı barlıq dushpanlarınan qorg'ap, tınıshlıq berdi.
2 Sol waqıtları patsha payg'ambar Natang'a: – Qara, men kedr ag'ashınan qurılg'an sarayda jasap atırman, al Qudaydın' sandıg'ı bolsa, shatırda turıptı, – dedi.
3 Natan og'an: – Kewlin'iz ku'segenin qıla berin', sebebi Jaratqan İye siz benen birge, – dep juwap berdi.
4 Biraq sol ku'ni tu'nde Natang'a Jaratqan İyeden mınaday so'z tu'sti:
5 «Barıp, qulım Dawıtqa bılay dep ayt: „Jaratqan İye bılay deydi: Ma'kan basıwım ushın, Mag'an arnap u'ydi sen qurmaqshımısan'?
6 İzrail xalqın Mısırdan alıp shıqqan ku'nimnen baslap usı waqıtqa deyin, Men u'yde jasadım ba, o'zi? Shatırda ol jaqtan bul jaqqa ko'ship ju'rgen joqpan ba?
7 Pu'tkil izraillılar menen birge ko'ship ju'rgen jerlerde xalqımdı basqarıwdı buyırg'an İzrail biylerinin' qaysı birine: Nege Mag'an kedr ag'ashınan u'y qurıp bermedin'iz? – degen edim?“
8 Endi qulım Dawıtqa bılay dep ayt: „A'lemnin' Jaratqan İyesi bılay deydi: Men seni jaylawda qoy bag'ıp ju'rgen jerin'nen alıp, xalqım İzrailg'a hu'kimdar etip qoydım.
9 Qay jerge barsan' da, senin' menen birge bolıp, aldın'dag'ı ha'mme dushpanların'dı joq qıldım. Atın'dı du'nyadag'ı ullı adamlardın' atları sıyaqlı ullı qılaman.Xalqım İzrail ushın orın tayarlap, olardı sol jerge ornalastıraman. Olardın' o'z jurtı boladı ha'm hesh kim tınıshın buzbaydı. Zalımlar olarg'a burıng'ıday zorlıq qılmaydı.
10 Xalqım İzrailg'a biyler qoyg'an waqıttan beri zalımlar olardı ezip kelmekte. Al seni pu'tkil dushpanların'nan qutqarıp, ra'ha'tke eristiremen“.
11 Xalqım İzrailg'a biyler qoyg'an waqıttan beri zalımlar olardı ezip kelmekte. Al seni pu'tkil dushpanların'nan qutqarıp, ra'ha'tke eristiremen“. Jaratqan İye ja'ne bılay dep bildiredi: „Men senin' ushın bir shan'araq – patshalar a'wladın jarataman.
12 Sen o'lip, ata-babaların'a qosılg'anın'da, zu'ryadın'nan birin taxtqa otırg'ızıp, onın' patshalıg'ın bekkemleymen.
13 Mag'an atap u'ydi ol quradı. Men de onın' patshalıq taxtın ma'n'gilik qılıp ornataman.
14 Men og'an a'ke bolaman, ol Mag'an ul boladı. Eger ol gu'na islese, a'ke ulın tayaq penen jazalag'anday, onı basqa milletler arqalı jazalayman.
15 Biraq senin' ko'z aldın'da Shauldan O'z miyrimimdi tartıp alg'anım sıyaqlı, onnan O'z miyrimimdi hesh qashan tartıp almayman.
16 6Senin' urpag'ın' ha'm patshalıg'ın' Menin' aldımda ma'n'gige turadı ha'm taxtın' ma'n'gi bekkem boladı“».
17 Solay etip, Natan ayan bolg'an bul so'zlerdin' ha'mmesin Dawıtqa aytıp berdi.
18 Son'ınan Dawıt patsha kelip, Jaratqan İyenin' aldında otırdı da, bılay dedi: «Quday İye! Sen meni bunshelli ma'rtebeli qılg'anday, men kim bolıppan, menin' u'y-ishim de ne bolıptı?
19 Quday İye! Senin' na'zerin'de bul da az bolg'anday, qulın'nın' urpag'ının' keleshegi tuwralı da aytıp berdin'. Quday İye, Senin' adamzatqa degen qatnasın' usınday ma?!
20 Men Sag'an basqa ne ayta alaman? O'ytkeni Quday İye, Sen O'z qulın'dı bilesen'-g'o.
21 Sen O'z so'zin'e ha'm ju'regin'e muwapıq bolg'an bul ullı isti isledin' ha'm onı qulın'a bildirdin'.
22 2Qanday ullısan', Quday İye! O'z qulaqlarımız benen esitken barlıq xabarımız boyınsha, Sag'an ten' keletug'ını joq, Sennen basqa Quday da joq.
23 Du'nyada xalqın' İzrailg'a uqsag'an birde bir xalıq joq. Olardı O'z xalqın' qılıw ushın, azat qılıwg'a bardın' ha'm xalqın' ushın da, elin' ushın da ullı ha'm tan' qalarlıq isler islep, O'z dan'qın'dı shıg'ardın'. Mısırdan O'zin' ushın azat qılg'an xalqın'nın' aldınan xalıqlardı ha'm qudaylardı quwıp jiberdin'.
24 Xalqın' İzraildı ma'n'gige O'z xalqım boladı dep, olardı bekkemledin' ha'm O'zin' de, Jaratqan İye, olardın' Qudayı boldın'.
25 Endi, Quday, Jaratqan İye! Qulın'a ha'm onın' urpag'ına bergen wa'den'de ma'n'gige turıp, so'zin'di orınlay go'r.
26 Adamlar: „A'lemnin' Jaratqan İyesi – İzraildın' Qudayı“, – dep atın'dı ma'n'gige ullılasın ha'm qulın' Dawıttın' urpag'ı da Senin' aldın'da bekkem tursın.
27 A'lemnin' Jaratqan İyesi, İzraildın' Qudayı! Sen qulın'a: „Senin' ushın bir shan'araq – patshalıq jarataman“, – dep ayan ettin'. Sonlıqtan qulın' usılay duwa etiwge ju'rek etti.
28 8Quday İye, Sen Qudaysan', Senin' so'zlerin' haq. Sen qulın'a bul iygilikli wa'deni berdin'.
29 Endi aldın'da ma'n'gige dawam etiwi ushın, qulın'nın' patshalıg'ın jarılqawın'dı sorayman. Sebebi Quday İye, Sen solay so'z berdin' ha'm qulın'nın' patshalıg'ı Senin' jarılqawın' arqalı ma'n'gige jarılqanatug'ın boladı».
