3 Patshalar 10 bob
1 Sheba hayal patshası Jaratqan İyenin' atı sebepli Sulaymannın' arttırg'an dan'qı tuwralı esitip, onı jumbaqlar menen sınaw ushın keldi.
2 Ol xosh iyisli zatlar, ko'p mug'darda altın ha'm qımbatbaha taslar ju'klengen u'lken bir ka'rwandı baslap, bir qansha adamları menen Erusalimge keldi ha'm kewlinde bar bolg'an ha'mme na'rsesin Sulayman menen bo'listi.
3 Sulayman hayal patshanın' ha'mme sorawlarına juwap berdi. Sorawlarda patsha tu'sindire almastay hesh na'rse joq edi.
4 Sheba hayal patshası Sulaymannın' danalıg'ın, ol qurdırg'an saraydı ko'rdi.
5 Ol ja'ne patshanın' dasturxanındag'ı tag'amların, wa'zirlerinin' otırıs-turısın, xızmetshilerinin' xızmetin ha'm olardın' kiyimlerin, sharap quyıwshıların ha'm onın' Jaratqan İyenin' İbadatxanasında bergen jandırılatug'ın qurbanlıqların ko'rgende, artıq o'zin uslap tura almadı.
6 Ol patshag'a bılay dedi: «Sizin' islerin'iz ha'm danalıg'ın'ız haqqında o'z elimde esitkenlerim ıras eken.
7 Biraq men kelip, o'z ko'zlerim menen ko'rmegenshe sol so'zlerge inanbag'an edim. Mag'an bulardın' yarımın da aytpag'an eken. Sizin' danalıg'ın'ız ha'm baylıg'ın'ız esitkenimnen de artıq eken.
8 Sizin' adamların'ız ha'm xızmetshilerin'iz qanshelli baxıtlı! Olar ba'rqulla aldın'ızda turıp, danalıg'ın'ızdı tın'lay aladı.
9 Sizge kewli tolıp, sizdi İzrail taxtına otırg'ızg'an Qudayın'ız Jaratqan İyege alg'ıslar bolsın! Jaratqan İye ma'n'gige İzraildı su'ygenligi sebepli, a'dalattı ha'm tuwrılıqtı ju'zege asırıwın'ız ushın sizdi patsha etip qoydı».
10 Sheba hayal patshası patshag'a bir ju'z jigirma talant altın, ju'da' ko'p mug'darda xosh iyisli zatlar ha'm qımbatbaha taslar sawg'a etti. Sheba hayal patshasının' patsha Sulaymang'a sawg'a etkenindey da'rejede ko'p xosh iyisli zatlar bunnan keyin hesh qashan alıp kelingen emes.
11 Xiramnın' Ofirden altın alıp kelgen kemeleri de sol jerden ju'da' ko'p mug'darda sapalı arsha ag'ashların ha'm qımbatbaha taslar alıp keldi.
12 Patsha sapalı arsha ag'ashlarınan Jaratqan İyenin' İbadatxanası ha'm o'zinin' sarayı ushın tirepberdiler, qosıqshılar ushın lira ha'm arfa saz a'sbapların isletti. Bu'ginge deyin onday da'rejede ko'p sapalı arsha ag'ashı a'kelinbegen de, bunı hesh kim ko'rmegen de edi.
13 Sulayman Sheba hayal patshasına kewlinen shıqqan bir qansha sawg'aların berdi. Bunnan tısqarı, ol hayal patshag'a sorag'an ha'm qa'legen na'rselerinin' ha'mmesin berdi. Bunnan keyin, hayal patsha adamları menen birge o'z eline qaytıp ketti.
14 Ha'r jılı Sulaymang'a kelip turatug'ın altınnın' mug'darı altı ju'z alpıs altı talant edi.
15 Usaqlap satıwshılardan, sawdagerlerdin' sawdasınan ha'm Arabstannın' barlıq patshaları menen İzrail u'lkelerinin' ha'kimlerinen kelip tu'setug'ın altınlar bug'an kirmeytug'ın edi.
16 Patsha Sulayman eki ju'z u'lken qalqan isletip, olardı altın menen qaplattı. Ha'r bir qalqang'a altı ju'z shekel altın jumsaldı.
17 Ja'ne altınnan ha'r biri u'sh mina keletug'ın u'sh ju'z kishkene qalqan isletti. Patsha bul qalqanlardı Lebanon tog'ayı dep atalatug'ın sarayg'a qoydı.
18 Ol ja'ne pildin' su'yeginen u'lken taxt isletip, onı sap altın menen qaplattı.
19 Taxttın' altı basqaldag'ı bar edi. Taxttın' su'yengishinin' bas beti domalaq bolıp, otırg'ıshının' eki ta'repinde shıg'anaq qoyg'ıshı ha'm onın' janında eki arıslannın' mu'sini tur edi.
20 Taxttın' altı basqaldag'ının' ha'r birinin' eki ta'repinde bir-birden on eki arıslannın' mu'sini tur edi. Hesh bir patshalıqta bunday na'rse joq edi.
21 Patsha Sulaymannın' ishimlik ishetug'ın ıdısları altınnan islendi. Onın' Lebanon tog'ayı dep atalatug'ın sarayındag'ı ha'mme ıdıslar da altınnan islengen bolıp, hesh gu'mis qollanılmag'an edi. Sebebi Sulaymannın' waqtında gu'mis qa'dirsiz bolıp qalg'an edi.
22 Ten'izde Xiramnın' kemelerinin' janında Sulaymannın' da Tarshish sawda kemeleri bar edi. Bul kemeler u'sh jılda bir ret altın, gu'mis, pil su'yegi, maymıllar ha'm tawıs qusların alıp keletug'ın edi.
23 Patsha Sulayman baylıqta ha'm danalıqta du'nyanın' barlıq patshalarınan u'stin boldı.
24 Qudaydın' Sulaymang'a bergen danalıg'ın tın'law ushın, pu'tkil du'nya onı ko'riwge qushtar edi.
25 Onı ko'riwge kelgenlerdin' ha'r biri ha'r jılı sawg'a ushın gu'mis ha'm altın ıdıslar, kiyimler, qural-jaraqlar, xosh iyisli zatlar, at ha'm g'ashırlar alıp kelip turdı.
26 Sulayman sawash arbaları menen atlar jıynadı. Onın' bir mın' to'rt ju'z sawash arbası, on eki mın' atı bar edi. Olardın' bir bo'legin sawash arbaları ushın ajıratılg'an qalalarg'a, bir bo'legin o'zinin' janına, Erusalimge jaylastırdı.
27 Patsha Erusalimde gu'misti a'piwayı taslarg'a ten' qıldı. Al kedr ag'ashı ju'da' ko'p bolg'anlıqtan, batıstag'ı taw eteklerinde o'setug'ın jabayı a'njir ag'ashına ten' bolıp qaldı.
28 Sulaymannın' atları Mısırdan ha'm Quweden alıp kelinetug'ın edi. Patshanın' sawdagerleri atlardı Quweden satıp alatug'ın edi.
29 Mısırdan ha'r bir sawash arbası altı ju'z shekel gu'miske, al ha'r bir at bir ju'z eliw shekel gu'miske satıp a'kelinip, olar Sulaymannın' sawdagerleri arqalı pu'tkil Xett ha'm Aram patshalarına satılatug'ın edi.
