3 Patshalar 14 bob
1 Sol waqıtları Yarobamnın' ulı Abiya nawqaslanıp qaldı.
2 Sonda Yarobam hayalına bılay dedi: «Barıp, menin' hayalım ekenin'di bilmewi ushın, kiyimlerin'di o'zgertip al da, Shilog'a bar. Menin' usı xalıqtın' patshası bolatug'ınım tuwralı aldın ala aytqan payg'ambar Axiya sol jerde jasaydı.
3 On sho'rek, bir neshe qıtırlaq nan ha'm bir gu'ze pal alıp, og'an apar. Ulımızg'a ne bolatug'ının ol sag'an aytadı».
4 Hayalı Yarobamnın' aytqanınday islep, Shilog'a, Axiyanın' u'yine ketti. Axiya qartayg'anlıqtan, ko'zi ko'rmeytug'ın bolıp qalg'an edi.
5 Jaratqan İye Axiyag'a: «Mine, Yarobamnın' hayalı kiyatır. Ol keselge shalıng'an ulına ne bolatug'ının sennen soramaqshı. Sen og'an mınadaymınaday dep ayt. Ol o'zin basqa hayal etip ko'rsetiw ushın sırtqı ko'rinisin o'zgertip alg'an», – dedi.
6 Axiya qapıdan kirip kiyatırg'an hayaldın' ayaq sestin esitkende bılay dedi: «Yarobamnın' hayalı, ishke kir! Nege sırtqı ko'rinisin'di o'zgertip, basqasha kiyinip aldın'? Sag'an jaman xabarlarım bar.
7 Yarobamg'a barıp, bılay dep ayt: „İzraildın' Qudayı Jaratqan İye bılay deydi: Men seni xalqım arasınan tan'lap alıp, O'z xalqıma, izraillılarg'a hu'kimdar etip qoydım.
8 Patshalıqtı Dawıttın' urpag'ınan tartıp alıp, sag'an berdim. Biraq sen qulım Dawıtqa uqsamadın'. Ol buyrıqlarıma boysındı ha'm Menin' na'zerimde durıs bolg'an islerdi islep, shın ju'rekten Menin' izimnen ju'rdi.
9 Sen o'zin'nen aldın jasag'anlardın' ha'mmesinen de beter jamanıraq jamanlıqlar isledin'. O'zin'e basqa qudaylardın', yag'nıy tana mu'sinlerin sog'ıp alıp, Menin' g'a'zebimdi keltirdin'. Sen Mennen ju'z burdın'.
10 Sol sebepli Men senin' xojalıg'ın'dı apatshılıqqa ushıratıp, İzrailda senin' urpag'ın'nan bolg'an pu'tkil erkek zatın: qul bolsa da, azat adam bolsa da, ha'mmesin tezektin' tu'yirin de qaldırmay o'rtegendey etip o'rtep, ku'lin ko'kke suwıraman.
11 Senin' xojalıg'ın'nan qalada o'lgenleri iytlerge, dalada o'lgenleri ko'ktegi quslarg'a jem boladı“. Jaratqan İye mine usılay dedi.
12 Sen endi u'yin'e qayt. Qalag'a ayag'ın'dı basıwdan-aq ulın' o'ledi.
13 Pu'tkil İzrail xalqı joqlaw aytıp, onı jerleydi. Yarobamnın' xojalıg'ınan jalg'ız ol g'ana jerlenedi. Sebebi İzraildın' Qudayı Jaratqan İye Yarobamnın' urpag'ınan jalg'ız onda g'ana O'zine unag'an bir na'rselerdi taptı.
14 Endi Jaratqan İye O'zi ushın İzrailg'a bir patsha qoyadı. Bul patsha sol ku'ni-aq, awa, ha'zir-aq* Yarobamnın' urpag'ın qırıp taslaydı.
15 Jaratqan İye İzrail xalqın jazalaydı ha'm ol suwda terbelip turg'an qamısqa uqsap qaladı. Jaratqan İye olardı ata-babalarına bergen bul jaqsı jerlerden quwıp shıg'ırıp, Evfrat da'ryasının' arg'ı ta'repine shashıratıp jiberedi. O'ytkeni olar o'zlerine kiyeli ag'ashların islep alıp, Jaratqan İyenin' g'a'zebin keltirdi.
16 Yarobamnın' islegen ha'm İzrailg'a isletken gu'naları sebepli Jaratqan İye İzraildı ta'rk etedi».
17 Yarobamnın' hayalı ol jerden shıg'ıp, Tirsag'a keldi. Ol u'yine ayaq basar-baspastan, bala qaytıs boldı.
18 Pu'tkil izraillılar onı jerlep, ol ushın aza tuttı. Solay etip, Jaratqan İyenin' O'z qulı payg'ambar Axiya arqalı aytqan so'zi orınlandı.
19 Yarobamnın' basqa isleri, yag'nıy, qalay urısqanları ha'm eldi qalay basqarg'anı İzrail patshalarının' jılnama kitabında jazılg'an.
20 Yarobam jigirma eki jıl patshalıq etti. Ol o'lip, ata-babalarına qosılg'annan son', onın' ornına ulı Nadab patsha boldı.
21 Sulaymannın' ulı Rexabam Yahudag'a patsha bolg'anda qırıq bir jasta edi. Jaratqan İyenin' O'z atın ornatıw ushın pu'tkil İzrail urıwları jasap atırg'an qalalar ishinen tan'lap alg'an qalası Erusalimde ol on jeti jıl patshalıq etti. Onın' anası ammon xalqınan bolıp, atı Naama edi.
22 Yahudalılar Jaratqan İyenin' na'zerinde jawız bolg'an islerdi isledi. Olar ata-babaları islegen gu'nalardan da u'lkenirek gu'nalar islep, Jaratqan İyenin' qızg'anıshlı g'a'zebin oyattı.
23 Olar da arqa patshalıq sıyaqlı, o'zleri ushın ha'r bir biyiklikke ha'm qoyıw japıraqlı terektin' astına sıyınıw orınların islep, kiyeli taslar ha'm kiyeli ag'ashların ornattı.
24 Ha'tte, u'lkedegi sıyınıw orınlarında buzıqshılıq isi menen shug'ıllanatug'ın erkekler de boldı. Yahudalılar Jaratqan İyenin' burın İzrail xalqının' aldınan quwg'an xalıqları islegen barlıq jerkenishli islerdi isledi.
25 Rexabamnın' patshalıg'ının' besinshi jılında Mısır patshası Shishaq Erusalimge hu'jim jasadı.
26 Ol Jaratqan İyenin' İbadatxanasındag'ı ha'm patsha sarayındag'ı g'a'ziynelerdi alıp ketti. Ol ha'mme na'rseni, Sulayman soqtırg'an altın qalqanlardı da alıp ketti.
27 Son'ınan patsha Rexabam bulardın' ornına qoladan qalqanlar isletti ha'm olardı patsha sarayının' kirer awzın qorg'aytug'ın saqshılardın' basshılarına berdi.
28 Patsha Jaratqan İyenin' İbadatxanasına ha'r barg'anda, saqshılar bul qalqanlardı alıp ju'retug'ın, son'ınan ja'ne saqshılardın' bo'lmesine aparıp qoyatug'ın edi.
29 Rexabamnın' basqa isleri ha'm ol islegen ha'r bir na'rse Yahuda patshalarının' jılnama kitabında jazılg'an.
30 Rexabam menen Yarobam pu'tkil o'miri dawamında urısıp keldi.
31 Rexabam o'lip, ata-babalarına qosılg'anda, ol Dawıttın' qalasına, ata-babalarının' janına qoyıldı. Rexabamnın' anası ammon xalqınan bolıp, atı Naama edi. Rexabamnın' ornına ulı Abiyam patsha boldı.
