3 Patshalar 15 bob

Yahuda patshası Abiyam(1-8),Yahuda patshası Asa(9-24),İzrail patshası Nadab(25-32),İzrail patshası Baasha(33-34),

¹ İzrail patshası Nabat ulı Yarobamnın' patshalıg'ının' on segizinshi jılında Abiyam* Yahudag'a patsha boldı.

² Ol Erusalimde u'sh jıl patshalıq etti. Abiyamnın' anası Abshalomnın' qızı Maaxa edi.

³ Abiyam da a'kesinin' burın islegen barlıq gu'naların dawam etti. Ol Qudayı Jaratqan İyege ju'regin tolıq bag'ıshlag'an babası Dawıtqa uqsamadı.

⁴ Solay bolsa da, Qudayı Jaratqan İye Dawıttın' hu'rmeti ushın og'an Erusalimde bir shıraq jag'ıp berdi: o'zinen keyin ulın onın' ornına otırg'ızdı ha'm Erusalimdi bekkemledi.

⁵ Sebebi xett xalqınan bolg'an Uriyag'a islegen isinen basqa, Dawıt Jaratqan İyenin' na'zerinde durıs bolg'an islerdi isledi ha'm pu'tkil o'miri boyı Onın' buyrıqlarının' hesh birin orınlawdan bas tartpadı.

⁶ Rexabam menen Yarobam arasındag'ı sawash Abiyamnın' o'mirinin' aqırına shekem dawam etti.

⁷ Abiyamnın' basqa isleri ha'm ol islegen barlıq isler Yahuda patshalarının' jılnama kitabında jazılg'an. Abiyam menen Yarobam arasında sawash u'zliksiz dawam etken edi.

⁸ Abiyam o'lip, atababalarına qosılg'anda, Dawıttın' qalasına jerlendi. Onın' ornına ulı Asa patsha boldı.

⁹ İzrail patshası Yarobamnın' patshalıg'ının' jigirmalanshı jılında Asa Yahudag'a patsha boldı.

¹⁰ Ol Erusalimde qırıq bir jıl patshalıq etti. Onın' kempir apası Abshalomnın' qızı Maaxa edi.

¹¹ Asa babası Dawıt sıyaqlı Jaratqan İyenin' na'zerinde durıs bolg'an islerdi isledi.

¹² Ol sıyınıw orınlarındag'ı buzıqshılıq penen shug'ıllanatug'ın erkeklerdi quwıp jiberdi ha'm ata-babaları islegen barlıq butlardı alıp tasladı.

¹³ Kempir apası Maaxa Asherag'a arnap jerkenishli bir but soqtırg'anı ushın, patsha Asa onnan xanbiykelik atag'ın tartıp aldı. Asa bul jerkenishli buttı shawıp taslap, Kidron sayında jag'ıp jiberdi.

¹⁴ Ol tek sıyınıw orınların joq qılmadı, biraq o'mir boyı Jaratqan İyege sadıq qaldı.

¹⁵ Asa a'kesinin' ha'm o'zinin' atag'an na'rselerin: gu'misti, altındı ha'm ıdıslardı Jaratqan İyenin' İbadatxanasına alıp keldi.

¹⁶ Yahuda patshası Asa ha'm İzrail patshası Baasha o'mirlerinin' aqırına shekem urısıp o'tti.

¹⁷ İzrail patshası Baasha Yahudag'a qarsı shıg'ıp, Yahuda patshası Asanın' jerlerine hesh kimnin' kirip-shıqpawı ushın, Ramanın' bekinisin ku'sheytti.

¹⁸ Sonda Asa Jaratqan İyenin' İbadatxanasındag'ı ha'm saray qaznasındag'ı qalg'an barlıq gu'mis penen altındı aldı da, olardı xızmetshileri arqalı Damaskte jasaytug'ın Aram patshasına, Xezyonnın' aqlıg'ı Tabrimmonnın' ulı Ben-Hadadqa jiberip, og'an bılay dedi:

¹⁹ «A'kelerimiz arasında bolg'anı sıyaqlı, bizlerdin' aramızda da kelisim bolsın. Sizge sawg'ag'a gu'mis ha'm altın jiberip atırman. İzrail patshası Baasha menin' jerimnen ketiwi ushın, siz onın' menen du'zgen kelisimin'izdi buzsan'ız».

²⁰ Ben-Hadad patsha Asanın' usınısın qabıl etip, İzrail qalalarına qarsı a'skerbasıların jiberdi. Olar İyyon, Dan, Abel-Beyt-Maaxa qalaların, pu'tkil Naftaliy jeri menen birge pu'tkil Kinneretti basıp aldı.

²¹ Baasha bunı esitkende, Ramanın' qurılısın toqtatıp, Tirsag'a qaytıp keldi,

²² Patsha Asa birde bir adamdı qaldırmay, pu'tkil yahudalılardı shaqırdı. Olar Rama qalasın qurg'anda, Baasha qollang'an tas ha'm ag'ashlardı Ramadan tasıp alıp ketti ha'm patsha Asa olardan Benyamin jerindegi Geba ha'm Mispa qalalarının' bekinisin ku'sheytti.

²³ Asanın' basqa barlıq isleri, barlıq qaharmanlıqları, barlıq islegen isleri ha'm ol qurdırg'an barlıq qalalar Yahuda patshalarının' jılnama kitabında jazılg'an. Ol qartayg'anda ayaq awırıwına shalındı.

²⁴ Asa o'lip, ata-babalarına qosılg'anda, babası Dawıttın' qalasına, ata-babalarının' janına jerlendi. Onın' ornına ulı Ehoshafat patsha boldı.

²⁵ Yahuda patshası Asanın' patshalıg'ının' ekinshi jılında Yarobamnın' ulı Nadab İzrailg'a patsha boldı ha'm İzrailda eki jıl patshalıq etti.

²⁶ Ol da Jaratqan İyenin' na'zerinde jawız bolg'an isler islep, a'kesinin' jolı ha'm İzrailg'a isletken gu'naları izinen ketti.

²⁷ Nadab ha'm pu'tkil izraillılar filistlerdin' Gibbeton qalasın qamal qılıp atırg'anda, İssaxar urıwınan shıqqan Axiya ulı Baasha til biriktirip, Nadabtı Gibbetonda o'ltirdi.

²⁸ Yahuda patshası Asanın' patshalıg'ının' u'shinshi jılında Baasha Nadabtı o'ltirip, onın' ornına patsha boldı.

²⁹ Ol taxtqa otırıwdan-aq, Yarobamnın' urpag'ın tolıg'ı menen qırıp tasladı. Yarobamnın' xojalıg'ı pu'tkilley joq etilip, birde bir tiri jan qalmadı. Solay etip, Jaratqan İyenin' O'z qulı shilolı Axiya arqalı aytqan so'zi orınlandı.

³⁰ Bulardın' ha'mmesi Yarobamnın' o'zi gu'na islep, İzrail xalqına da gu'na isletip, İzraildın' Qudayı Jaratqan İyenin' g'a'zebin keltirgeni sebepli ju'z berdi.

³¹ Nadabtın' basqa isleri ha'm ol islegen barlıq isler İzrail patshalarının' jılnama kitabında jazılg'an.

³² Yahuda patshası Asa menen İzrail patshası Baasha arasındag'ı sawash olardın' o'mirinin' aqırına deyin dawam etti.

³³ Yahuda patshası Asanın' patshalıg'ının' u'shinshi jılında Axiya ulı Baasha pu'tkil İzrailg'a patsha boldı ha'm Tirsada jigirma to'rt jıl patshalıq etti.

³⁴ Baasha Jaratqan İyenin' na'zerinde jawız bolg'an isler isledi. Ol Yarobamnın' jolın quwıp, og'an uqsap gu'nag'a battı, İzraildı da gu'nag'a batırdı.