3 Patshalar 2 bob
1 Dawıttın' o'limi jaqınlasqanda, ol ulı Sulaymang'a mına wa'siyatlardı berdi:
2 «Basqalar sıyaqlı men de jaqın arada bul du'nyanı ta'rk etemen. Sen ku'shli ha'm ma'rt bol.
3 İslegen ha'r bir isin'de ha'm barg'an ha'r bir jerin'de tabısqa erisiwin' ushın, Qudayın' bolg'an Jaratqan İyenin' tapsırmaların orınlap, Onın' jollarınan ju'r ha'm Muwsanın' Nızamında jazılg'anınday, Qudaydın' qag'ıydalarına, buyrıqlarına, nızamlarına ha'm qararlarına boysın.
4 Sonda Jaratqan İye mag'an bergen mına so'zin orınlaydı: „Eger urpaqların' o'z jollarınan adaspay, shın ju'rekten ha'm jan-ta'ni menen Mag'an sadıq bolıp ju'rse, senin' urpag'ın'nan İzrail taxtında otıratug'ın er adamnın' izi u'zilmeydi“.
5 Bunnan tısqarı sen Seruya ulı İoabtın' mag'an neler islegenin bilesen'. Ol İzraildın' eki sa'rka'rdası Ner ulı Abner menen Eter* ulı Amasanı o'ltirip, tınıshlıq waqtında urıstag'ıday qan to'kti ha'm belindegi belbewi menen ayag'ındag'ı sandalların qang'a bılg'adı.
6 Sen aqılın'a salıp, is tut. Biraq onın' ag'arg'an basının' o'liler ma'kanına tınıshlıq penen kiriwine jol qoyma.
7 Giladlı Barzillaydın' ullarına jaqsılıq isle. Olarg'a dasturxanın'nan awqatlanatug'ınlar arasınan orın ber. O'ytkeni men a'jag'an' Abshalomnan qashıp ju'rgenimde, olar mag'an ja'rdem berdi.
8 Benyamin urıwınan bolg'an baxurimli Geranın' ulı Shimey de senin' janın'da. Ol Maxanayımg'a qaray qashıp baratırg'anımda, meni qattı g'arg'ag'an edi. Biraq son'ınan ol meni ku'tip alıw ushın İordan da'ryasının' boyına keldi. Sonda men og'an: „Seni qılısh penen o'ltirmeymen“, – dep Jaratqan İyenin' atı menen ant ishken edim.
9 Degen menen, sen onı jazasız qaldırma. Sen aqıllı adamsan', og'an ne islewdi o'zin' bilesen'. Onın' aq shashlı basın o'liler ma'kanına qanı menen jiber».
10 Dawıt o'lip, ata-babalarına qosılg'anda, ol o'zinin' atı menen atalg'an qalag'a jerlendi.
11 Dawıt İzrailda qırıq jıl patshalıq etip, onın' jeti jılın Xebronda, otız u'sh jılın Erusalimde o'tkizdi.
12 Solay etip, Sulayman a'kesi Dawıttın' taxtına otırdı ha'm onın' patshalıg'ı ju'da' bekkem boldı.
13 Xaggit ulı Adoniya Sulaymannın' anası Bat-Shebanın' janına bardı. Bat-Sheba onnan: – Amanlıq pa? – dep soradı. Adoniya og'an: – Amanlıq, – dep juwap berdi.
14 Son'ınan ol: – Sizge bir na'rse aytpaqshı edim, – dedi. Bat-Sheba og'an: – Ayta ber, – dedi.
15 Adoniya Bat-Shebag'a bılay dedi: – O'zin'iz bilesiz, patshalıq mag'an tiyisli edi ha'm pu'tkil İzrail menin' patsha bolıwımdı ku'tip ju'rgen edi. Biraq jag'day o'zgerip, patshalıq inimnin' qolına o'tti. Sebebi Jaratqan İyenin' erki usı edi.
16 Biraq menin' sizden bir tilegim bar. O'tinemen, qarsılıq bildirmen'. Bat-Sheba: – Ayt, – dedi.
17 Sonda Adoniya Bat-Shebag'a: – O'tinemen, patsha Sulayman menen so'ylesin'. Ol sizge qarsılıq bildirmeydi. Mag'an shunemli Abishagtı hayallıqqa bersin, – dedi.
18 Bat-Sheba og'an: – Yaqshı, sen tuwralı patsha menen so'ylesip ko'reyin, – dep juwap berdi.
19 Bat-Sheba Adoniyanın' o'tinishi tuwralı so'ylesiw ushın patsha Sulaymang'a ketti. Sulayman anasın ku'tip alıw ushın ornınan turıp, anasına ta'jim etti ha'm son'ınan taxtına otırdı. Patsha o'zinin' on' ta'repine bir taxt qoydırıp, og'an anasın otırg'ızdı.
20 Anası taxtqa otırg'annan son', patshag'a: – Sennen kishkene bir o'tinishim bar edi, so'zimdi jerde qaldırma, – dedi. Patsha og'an: – Ayta ber, anajan, so'zin'izdi jerde qaldırmayman, – dedi.
21 Bat-Sheba patshag'a: – Shunemli Abishagtı a'jag'an' Adoniyag'a hayallıqqa bersen' qa'ytedi? – dedi.
22 Patsha Sulayman anasına: – Ne ushın Adoniyag'a tek shunemli Abishagtı sorap tursız? Ol ushın patshalıqtı da sorasan'ız bolar edi. Aqırı ol mennen u'lken. Bunın' u'stine, ruwxaniy Abiyatar menen Seruya ulı İoab ta ol ta'repte emes pe? – dedi.
23 Son'ınan patsha Sulayman Jaratqan İyenin' atı menen ant iship bılay dedi: «Eger Adoniyanı bul ga'pi ushın o'ltirtpesem, Quday meni jazalag'an u'stine jazalasın!
24 Meni ku'shke toltırıp, a'kem Dawıttın' taxtına otırg'ızg'an ha'm İzrail patshalarının' menin' urpag'ımnan kelip shıg'atug'ının aytıp, wa'de etken tiri Jaratqan İye haqı ant ishemen: Adoniya bu'gin-aq o'ltiriledi».
25 Solay etip, patsha Sulayman Ehoyada ulı Benayag'a Adoniyanı o'ltiriwdi buyırdı. Ol barıp, Adoniyanı o'ltirdi.
26 Patsha ruwxaniy Abiyatarg'a: «Sen Anatottag'ı o'z jerin'e bar. Negizinde, sen o'limge ılayıqlısan'. Biraq ha'zir seni o'ltirmeymen. Sebebi sen a'kem Dawıttın' aldında Quday İyenin' sandıg'ın ko'terip ju'rdin' ha'm a'kem shekken ha'r bir azaptı onın' menen birge bastan keshirdin'», – dedi.
27 Sulayman Abiyatardı Jaratqan İyenin' ruwxaniyliginen shetletti. Solay etip, Jaratqan İyenin' Shiloda Eliydin' u'y-ishine qarsı aytqan so'zi orınlandı.
28 Bul xabar İoabqa da jetti. İoab Abshalomg'a qosılmag'an bolsa da, Adoniyanı qollap-quwatlag'an edi. Sonlıqtan İoab Jaratqan İyenin' shatırına qashıp barıp, qurbanlıq orınnın' shaqlarına jabıstı.
29 İoabtın' Jaratqan İyenin' shatırına qashıp barıp, qurbanlıq orınnın' janında turg'anı patsha Sulaymang'a xabarlandı. Sulayman Ehoyada ulı Benayag'a barıp, onı o'ltiriwdi buyırdı.
30 Benaya Jaratqan İyenin' shatırına barıp, İoabqa: – Patsha sırtqa shıg'ıwın'dı buyıradı, – dedi. Biraq İoab: – Yaq, men usı jerde o'lmekshimen, – dep juwap berdi. Sonda Benaya barıp, İoabtın' bergen juwabın patshag'a jetkizdi.
31 Patsha Benayag'a bılay dedi: «Onın' aytqanınday isle. Onı o'ltirip, jerle. Usılayınsha, İoabtın' jazıqsız to'kken qanlarının' qunın menin' ha'm a'kemnin' urpaqlarının' moynınan alıp tasla.
32 Jaratqan İye onın' to'kken qanı ushın o'zin jazalasın. Sebebi ol a'kem Dawıtqa bildirmesten, o'zinen a'dilirek ha'm o'zinen jaqsıraq bolg'an eki adamdı: İzraildın' sa'rka'rdası Ner ulı Abnerdi ha'm Yahudanın' sa'rka'rdası Eter ulı Amasanı qılısh penen o'ltirdi.
33 Solay etip, olardın' qanı ma'n'gige İoabtın' ha'm onın' urpaqlarının' moynında qaladı. Al Jaratqan İye Dawıtqa, onın' urpaqlarına, u'y-ishine ha'm taxtına ma'n'gige tınıshlıq beredi».
34 hoyada ulı Benaya barıp, İoabtı o'ltirdi ha'm ol sho'ldegi o'z u'yine jaqın jerge jerlendi.
35 Patsha İoabtın' ornına Ehoyada ulı Benayanı sa'rka'rda etip, al Abiyatardın' ornına Sadoqtı ruwxaniy etip tayınladı.
36 Bunnan keyin patsha adam jiberip, Shimeydi shaqırttı ha'm og'an bılay dedi: – Erusalimde bir u'y qurıp alıp, sol jerde jasa. Hesh jaqqa ketpe.
37 Ol jerden shıg'ıp, Kidron sayınan o'tken ku'nin'-aq so'zsiz o'ltiriletug'ının'dı bilip qoy. O'z qanın' ushın o'zin' juwapker bolasan'.
38 Shimey patshag'a: – Taqsır, qullıq. Siz ne desen'iz, qulın'ız bolg'an men sonı orınlayman, – dedi. Solay etip, Shimey uzaq waqıt Erusalimde jasadı.
39 Biraq aradan u'sh jıl o'tkennen son', Shimeydin' eki qulı Gat patshası Maaxa ulı Axishtin' janına qashıp ketti. Shimeyge qullarının' Gatta ekenligi tuwralı xabar keldi.
40 Sonda Shimey eshegin ertlep, qulların izlew ushın Gatqa, Axishtin' janına ketti. Ol qulların qaytarıp a'keldi.
41 Shimeydin' Erusalimnen shıg'ıp, Gatqa barıp qaytqanı tuwralı Sulaymang'a xabar jetti.
42 Sonda Sulayman Shimeydi shaqırtıp, og'an bılay dedi: «Sag'an Jaratqan İyenin' atı menen ant ishtirgen joq pa edim? „Bilip qoy, qaladan shıg'ıp, qanday da bir jerge barg'an ku'nin'-aq so'zsiz o'ltirilesen'“, – dep eskertpegen be edim? Sen de mag'an: „Qullıq, ırazıman“, – demegen be edin'?
43 Onda nege Jaratqan İyenin' aldında ishken antın'a ha'm menin' buyrıg'ıma boysınbadın'?»
44 Patsha so'zin dawam etip, Shimeyge ja'ne bılay dedi: «Sen a'kem Dawıtqa islegen barlıq jamanlıqların'dı jaqsı bilesen'. Bul islegen jamanlıqların'dı Jaratqan İye o'zin'e qaytaradı
45 Biraq Jaratqan İye meni jarılqasın ha'm Dawıttın' taxtı Jaratqan İyenin' aldında ma'n'gige terbelmesin»
46 Patsha Ehoyada ulı Benayag'a buyrıq berdi. Ol Shimeydi alıp shıg'ıp, o'ltirdi. Solay etip, Sulaymannın' patshalıg'ı bekkemlendi.
