3 Patshalar 20 bob
1 Aram patshası Ben-Hadad pu'tkil a'skerlerin jıynadı. BenHadadqa qaraslı otız eki patsha da atları ha'm sawash arbaları menen og'an qosıldı. Olar bardı da, Samariyanı qorshap alıp, qalag'a hu'jim etti.
2 Ben-Hadad qalag'a, İzrail patshası Axabqa xabarshılar jiberip, bılay dedi: «Ben-Hadad bılay deydi:
3 „Senin' gu'mis ha'm altının'nın', hayalların' ha'm ulların'nın' en' jaqsıları meniki boladı“».
4 İzrail patshası og'an: «Taqsır, sizin' aytqanın'ızday bolsın. O'zim de, mendegi ha'mme na'rse de siziki», – dep juwap berdi.
5 Ben-Hadadtın' elshileri ja'ne qaytıp kelip, Axabqa bılay dedi: «BenHadad bılay deydi: „Sag'an gu'mis ha'm altının'dı, hayalların'dı ha'm ulların'dı mag'an beresen' dep xabar jibergen edim.
6 Endi erten' usı waqıtta senin' sarayın'dı ha'm xızmetshilerin'nin' u'yin tintiw ushın adamlarımdı jiberemen. Olar sag'an qa'dirli bolg'an ha'mme na'rseni alıp ketedi“».
7 Sonda İzrail patshası eldegi barlıq aqsaqallardı jıynap, olarg'a: – Oylap ko'rin'ler, bul adam qanday jamanlıq oylap qoyıptı? Ol mennen hayallarımdı, ullarımdı, gu'mis ha'm altınımdı talap etkende, men qarsılıq bildirmedim, – dedi.
8 Sonda aqsaqallar da, xalıq ta patshag'a: – Og'an qulaq salman', ırazı da bolman', – dedi.
9 Solay etip, Axab Ben-Hadadtın' elshilerine: «Taqsırg'a da'slepki tilegin orınlaytug'ınımdı, biraq keyingisine ırazı emesligimdi aytıp barın'lar», – dedi. Elshiler barıp, Ben-Hadadqa juwaptı jetkizdi.
10 Sonda Ben-Hadad Axabqa xabarshıların jiberip: «Samariyada izime ergen a'skerlerdin' uwısın toltırg'anday topıraq qaldırsam, qudaylar meni jazalag'an u'stine jazalasın», – dedi.
11 İzrail patshası og'an bılay dep juwap berdi: «Patshan'ızg'a barıp aytın', sawıtın kiyip atırıp emes, al sheship atırıp maqtansın».
12 Shatırda o'zine qaraslı patshalar menen birge sharap iship otırg'an Ben-Hadad bunı esitkende, adamlarına: «Hu'jimge tayarlanın'», – dep buyırdı. Olar qalag'a hu'jim qılıwg'a tayar turdı.
13 Sol waqıtta bir payg'ambar İzrail patshası Axabqa kelip bılay dedi: – Jaratqan İye bılay deydi: «Mına u'lken a'skerler toparın ko'rip tursan' ba? Bu'gin onı sag'an ta'slim etemen! Sonda sen Menin' Jaratqan İye ekenimdi bilip alasan'!»
14 Axab payg'ambardan: – Kim arqalı? – dep soradı. Payg'ambar og'an: – Jaratqan İye bılay deydi: «Wa'layat ha'kimlerinin' jas jawıngerleri arqalı», – dep juwap berdi. Axab onnan: – Sawashtı kim baslaydı? – dep soradı. Payg'ambar Axabqa: – Siz baslaysız, – dep juwap berdi.
15 Axab wa'layat ha'kimlerinin' jas jawıngerlerin shaqırıp sanadı. Olar eki ju'z otız edi. Son'ınan pu'tkil xalıqtı, İzrail a'skerlerin sanadı. Olar jeti mın' adam edi.
16 Tu'ste, BenHadad o'zine ja'rdem berip atırg'an otız eki patsha menen birge shatırda waqtı xoshlıq etip atırg'an waqıtta, izraillılar hu'jimdi basladı.
17 Da'slep wa'layat ha'kimlerinin' jas jawıngerleri sawashqa shıqtı. Ben-Hadad jibergen tın'shılar og'an: «Samariyadan adamlar shıg'ıp kiyatır», – dep xabarladı.
18 Ben-Hadad: «Olar kelisim du'ziw ushın kiyatırg'an bolsa da, urısıw ushın kiyatırg'an bolsa da, tiriley uslap alın'lar», – dedi.
19 Da'slep wa'layat ha'kimlerinin' jas jawıngerleri, olardın' izinen basqa a'skerler qaladan shıqtı.
20 Olardın' ha'r biri o'z qarsılasın o'ltirdi, aramlılar qasha basladı ha'm izraillılar olardın' izinen quwıp ketti. Aram patshası Ben-Hadad ta atına minip, atlıları menen birge qashıp qutıldı.
21 zrail patshası qaladan shıg'ıp, atlar menen sawash arbalarına hu'jim jasadı ha'm aramlılardı u'lken qırg'ıng'a ushırattı.
22 Bunnan keyin, payg'ambar kelip, İzrail patshasına: «Barıp, ku'shin'izdi jıynan' ha'm ne isleytug'ının'ızdı bilip alın'. Sebebi kelesi jılı ba'ha'rde Aram patshası sizge ja'ne hu'jim qıladı», – dedi.
23 Aram patshasının' xızmetkerleri og'an bılay dedi: «İzraildın' qudayı – tawlar Qudayı. Sonlıqtan olar bizlerdi jen'di. Eger olar menen tegislikte urıssaq, bizler olardı so'zsiz jen'emiz.
24 Endi qol astın'ızdag'ı patshalardın' ha'mmesin orınlarınan alıp taslap, orınlarına sa'rka'rdalardı tayınlan'.
25 Qoldan ketken at ornına at, arba ornına arba toplap, burıng'ıday a'sker jıynan'. Keyin izraillılar menen tegislikte sawash ju'rgizemiz ha'm so'zsiz olardı jen'emiz». Ben-Hadad olarg'a qulaq salıp, solay isledi.
26 Kelesi jılı ba'ha'rde Ben-Hadad aramlılardı jıynap, İzrail menen urısıw ushın Afek qalasına ketti.
27 İzraillılar da jıynalıp, azıq-awqatın aldı da, olar menen urısıw ushın jolg'a shıqtı ha'm olardın' qarsısına orda qurdı. U'lkeni toltırg'an aramlılardın' aldında izraillılar kishkene eki eshki su'riwi sıyaqlı edi.
28 Qudaydın' adamı İzrail patshasının' janına kelip bılay dedi: «Jaratqan İye bılay deydi: „Aramlılar Jaratqan İye tegisliklerdin' emes, al tawlardın' Qudayı degeni ushın, usı u'lken a'skerler toparın sag'an ta'slim etemen. Sonda Menin' Jaratqan İye ekenimdi bilesizler“».
29 Bir-birine qarsı orda qurg'an aramlılar menen izraillılar jeti ku'n turdı. Jetinshi ku'ni sawash baslandı. Bir ku'nde izraillılar aramlılardın' ju'z mın' piyada a'skerin o'ltirdi.
30 Qalg'anları Afekke, qalanın' ishine qashtı. Ol jerde qalg'an jigirma jeti mın' adamnın' u'stine qalanın' diywalı quladı. Ben-Hadad ta qalanın' ishine qashıp barıp, ishki bir bo'lmege kirip aldı.
31 Sonda xızmetshileri Ben-Hadadqa: «Esitiwimizshe, İzrail patshaları rehimli patshalar qusaydı. Endi u'stimizge aza kiyimin kiyip, moynımızg'a arqan salıp, İzrail patshasının' aldına barayıq. Ba'lkim, ol bir qasıq qanın'ızdan kesher», – dedi.
32 Olar u'stine aza kiyimin kiyip, moyınlarına arqan saldı ha'm İzrail patshasının' aldına kelip: «Qulın'ız Ben-Hadad bir qasıq qanınan keshiwin'izdi sorap jalbarınadı», – dedi. Axab: «Ben-Hadad ele tiri me? Ol menin' a'jag'am-g'o», – dedi.
33 BenHadadtın' xızmetshileri bunı jaqsılıqqa jorıp, patshanın' awzındag'ı so'zdi qag'ıp aldı da: «Ben-Hadad sizin' a'jag'an'ız!» – dedi. Patsha: «Barıp, onı alıp kelin'ler», – dep buyırdı. Ben-Hadad kelgende, patsha onı o'z sawash arbasına otırg'ızdı.
34 Ben-Hadad Axabqa: – A'kemnin' sizin' a'ken'izden tartıp alg'an qalaların qaytıp beremen. A'kemnin' Samariyada bazarlar qurg'anı sıyaqlı, siz de Damaskte bazarlar qurasız, – dedi. Axab og'an: – Kelisim du'zgennen son', seni bosatıp jiberemen, – dedi. Son'ınan onın' menen kelisim du'zdi de, bosatıp jiberdi.
35 Sol arada payg'ambarlar toparındag'ılardan biri Jaratqan İyenin' so'zi boyınsha joldasına: – O'tinemen, meni ur, – dedi. Biraq ol joldasın urıwdı qa'lemedi.
36 Sonda payg'ambar joldasına: – Jaratqan İyenin' buyrıg'ın orınlamag'anın' ushın, janımnan ketiwden-aq, seni bir arıslan o'ltiredi, – dedi. Sol adam payg'ambardın' qasınan ketiwden-aq, bir arıslang'a dus kelip, arıslan onı o'ltirdi.
37 Son'ınan payg'ambar basqa bir adamg'a kelip: «O'tinemen, meni ur», – dedi. Sol adam onı urıp, jaradar etti.
38 Payg'ambar ketti ha'm o'zin tanıtpaw ushın' ko'zin japqısh penen jawıp, jol boyında patshanı ku'te basladı.
39 Patsha sol jerden o'tip baratırg'anda, payg'ambar baqırıp, og'an bılay dedi: – Qulın'ız bolg'an men urısqa barg'an edim. Sonda bir a'sker arman bardı da, bir tutqındı mag'an a'kelip: «Mına adamg'a qarap tur. Eger qashıp ketse, onın' ornına o'zin'nin' janın' alınadı yamasa bir talant gu'mis beresen'», – dedi.
40 Biraq men anaw-mınaw menen ba'nt bolg'anımda, ol qashıp ketipti. İzrail patshası og'an: – O'zin'e o'zin' hu'kim shıg'arıp tursan'-g'o. Senin' jazan' sol boladı, – dedi.
41 Sol waqıtta payg'ambar da'rriw betindegi japqıshtı alıp tasladı. Sonda patsha onın' payg'ambarlardan biri ekenin bildi.
42 Payg'ambar patshag'a bılay dedi: «Jaratqan İye bılay deydi: „Men joq qılıwdı buyırg'an adamdı o'z qolın'nan bosatıp jibergenin' ushın, onın' ornına o'zin'nin' janın' alınadı. Al onın' xalqının' basına tu'setug'ın na'rse senin' xalqın'nın' basına tu'sedi“».
43 İzrail patshası qapa bolıp, tınıshsızlang'an halda Samariyadag'ı sarayına keldi.
