4 Patshalar 8 bob
1 Elisha o'zi o'limnen tiriltken balanın' anasına: «U'y-ishin' menen ko'ship ketip, jasay alg'anday jerde jasap tur. Sebebi Jaratqan İye elge jeti jıllıq ashlıq jiberiwdi qarar etti», – dedi.
2 Hayal Qudaydın' adamının' so'zi boyınsha, u'y-ishi menen birge ko'ship ketip, jeti jıl filistlerdin' jerinde jasadı.
3 Aradan jeti jıl o'tkennen son', hayal filistlerdin' jerinen qaytıp keldi ha'm u'yi menen jerlerinin' qaytarıp beriliwin soraw ushın patshanın' aldına keldi.
4 Sol waqıtta patsha Qudaydın' adamının' xızmetshisi Gexaziy menen so'ylesip otırg'an bolıp, og'an: «Mag'an Elisha islegen ha'mme ullı isler haqqında aytıp ber», – degen edi.
5 Ol Elishanın' o'lgen adamdı tiriltkeni haqqında aytıp berip atırg'an waqıtta, Elisha ulın tiriltken hayal u'yi menen jerlerinin' qaytıp beriliwin sorap patshag'a keldi. Sonda Gexaziy patshag'a: «Taqsır, men aytqan hayal mınaw, al qasındag'ı bala sol Elisha tiriltken bala», – dedi.
6 Patsha hayaldan sorag'anda, ol ha'mmesin aytıp berdi. Patsha hayalg'a bir saray xızmetshisin qosıp jiberip: «Og'an tiyisli ha'mme na'rse, elden ketken ku'nnen baslap, usı ku'nge shekemgi jerinen alıng'an ha'mme paydası menen birge qaytarıp berilsin», – dedi.
7 Bir ku'ni Elisha Damaskke keldi. Sol waqıtta Aram patshası Ben-Hadad awırıp atırg'an edi. Patshag'a: «Qudaydın' adamı usı jerge keldi», – dep xabarladı.
8 Sonda patsha Xazael degen xızmetshisine: «Sawg'ag'a bir na'rseler al da, Qudaydın' adamının' aldınan shıq ha'm menin' bul awırıwdan jazılatug'ın yaki jazılmaytug'ınımdı ol arqalı Jaratqan İyeden sora», – dedi.
9 Xazael sawg'ag'a Damasktegi en' jaqsı zatlardan qırıq tu'yege artıp, Qudaydın' adamın ku'tip alıwg'a ketti. Ol Elishanın' aldına kelip, og'an: – Qulın'ız, Aram patshası Ben-Hadad awırıwınan jazılatug'ın yaki jazılmaytug'ının soraw ushın meni sizge jiberdi, – dedi.
10 Elisha og'an: – Barıp og'an: «Pu'tkilley sawalıp ketedi ekensiz», – dep ayt. Biraq Jaratqan İye mag'an onın' so'zsiz o'letug'ının ayan qıldı, – dedi.
11 Xazael uyattan qızarıp ketkenshe, Qudaydın' adamı og'an tigilip qarap turdı, son'ınan jılap jiberdi.
12 Xazael onnan: – Mırzam, nege jılaysız? – dep soradı. Elisha og'an: – Sebebi men senin' İzrail xalqına isleytug'ın jawızlıqların'dı bilemen. Sen olardın' qorg'anlı qalaların o'rtep, jigitlerin qılıshtan o'tkizesen', emiziwli na'restelerdi jerge urıp o'ltiresen', ju'kli hayallardın' qarınların jarıp taslaysan', – dep juwap berdi.
13 Sonda Xazael: – Bunday u'lken islerdi isley alatug'ınday, ko'pekten parqı bolmag'an bul qulın'ız kim bolıptı? – dedi. Elisha og'an: – Jaratqan İye mag'an senin' Aram patshası bolatug'ının'dı ko'rsetti, – dedi.
14 Xazael Elishanın' qasınan ketip, o'z hu'kimdarına keldi. Ben-Hadad onnan: – Elisha sag'an ne dedi? – dep soradı. Ol: – Elisha mag'an sizin' pu'tkilley sawalıp ketetug'ının'ızdı ayttı, – dep juwap berdi.
15 Biraq erten'ine Xazael bir ko'rpeni suwg'a malıp alıp, onı patshanın' betine basıp, patshanı tunshıqtırıp o'ltirdi. Solay etip onın' ornına o'zi patsha boldı.
16 İzrail patshası Axab ulı İoramnın' patshalıg'ının' besinshi jılında Ehoshafat ele Yahudag'a patsha bolıp turg'an waqıtta, Ehoshafattın' ulı İoram da Yahudag'a patsha boldı.
17 İoram patsha bolg'an waqıtta otız eki jasta edi. Ol Erusalimde segiz jıl patshalıq etti.
18 Onın' hayalı Axabtın' qızı bolg'anlıqtan, ol da Axabtın' u'y-ishi sıyaqlı İzrail patshalarının' jolınan ju'rip, Jaratqan İyenin' na'zerinde jaman bolg'an islerdi isledi.
19 Biraq Jaratqan İye qulı Dawıttın' hu'rmeti ushın Yahudanı joq qılg'ısı kelmedi. Sebebi Ol Dawıtqa ha'm onın' urpag'ına ma'n'gige so'nbeytug'ın shıraq beriwdi wa'de etken edi.
20 İoramnın' patshalıg'ı da'wirinde edomlılar Yahuda hu'kimdarlıg'ına qarsı bas ko'terip, o'zlerine patsha qoyıp aldı.
21 İoram pu'tkil sawash arbaları menen birge Sairge ketti. Ol jerde edomlılar onı ha'm onın' sawash arbalarının' sa'rdarların qorshap aldı. Biraq İoram tu'nde turıp, qamaldı jarıp shıqtı. Onın' a'skerleri de o'z u'ylerine qaray qashtı.
22 Sonnan baslap usı ku'nge deyin edomlılar Yahudanın' hu'kimdarlıg'ına boysınbay keledi. Sol waqıtta Libna qalası da qozg'alan' ko'tergen edi.
23 İoramnın' basqa isleri ha'm ol islegen barlıq isler Yahuda patshalarının' jılnama kitabında jazılg'an.
24 İoram o'lip, ata-babalarına qosıldı ha'm Dawıttın' qalasına, ata-babalarının' qasına jerlendi. Onın' ornına ulı Axaziya patsha boldı.
25 İzrail patshası Axab ulı İoramnın' patshalıg'ının' on ekinshi jılında, İoram ulı Axaziya Yahudag'a patsha boldı.
26 Axaziya jigirma eki jasında patsha bolıp, Erusalimde bir jıl patshalıq etti. Onın' anası İzrail patshası Omriydin' aqlıg'ı bolıp, atı Ataliya edi.
27 Axaziya Axabqa quda-tamır bolg'anlıg'ı sebepli, Axabtın' urpag'ının' jolınan ju'rdi ha'm olarg'a uqsap, Jaratqan İyenin' na'zerinde jaman bolg'an islerdi isledi.
28 Axaziya Aram patshası Xazaelge qarsı urısıw ushın, Axab ulı İoram menen birge Giladtag'ı Ramotqa ketti. Aramlılar İoramdı jaradar etti.
29 Patsha İoram Ramada, Aram patshası Xazael menen urısqanda, aramlılardan alg'an jaraqatın emletiw ushın İzreelge qayttı. Yahuda patshası İoram ulı Axaziya da jaradar bolg'an Axab ulı İoramdı ko'riw ushın İzreelge keldi.
