1 Jılnama 10 bob

Shaul ha'm onın' ullarının' o'limi (1-14).

¹ Filistler izraillılar menen urısıp atırg'an edi. İzraillılar filistlerdin' aldına tu'sip qashıp, ko'pshiligi Gilboa tawında nabıt boldı.

² Filistler Shaul menen onın' ullarının' izine tu'sip, Shauldın' ulları İonatandı, Abinadabtı ha'm Malkiy-Shuanı o'ltirdi.

³ Shauldın' a'tirapında sawash ha'wij alg'an edi. Sonda sadaqshılar ta'repinen atılg'an oq Shaulg'a tiyip, ol jaraqatlandı.

⁴ Shaul o'z no'kerine: «Qılıshın'dı qınabınan suwırıp al da, meni o'ltir. Bolmasa, mına su'nnetsizler keledi de, meni xorlaydı», – dedi. Biraq no'keri qattı qorqıp, bunı islemedi. Sonlıqtan Shaul qılıshın qınınan suwırıp alıp, o'zin qılıshtın' u'stine tasladı.

⁵ No'keri Shauldın' o'lgenin ko'rgende, ol da qılıshının' u'stine o'zin taslap o'ldi.

⁶ Solay etip, Shaul menen onın' u'sh ulı da qaza taptı ha'm pu'tkil shan'arag'ı olar menen birge qurıp ketti.

⁷ Oypatlıqta jasaytug'ın barlıq izraillılar İzrail a'skerlerinin' qashqanın ha'm Shaul menen onın' ullarının' o'lgenin ko'rgende, o'z qalaların taslap, qasha basladı. Filistler kelip, sol qalalarg'a ornalasıp aldı.

⁸ Kelesi ku'ni filistler o'lgenlerdi tonaw ushın kelgende, Gilboa tawında Shauldın' ha'm onın' ullarının' o'ligin taptı.

⁹ Olar Shauldın' kiyimlerin sheship, basın ha'm qural-jaraqların aldı. Son'ınan bul xabardı butxanalarına ha'm xalqına jetkeriw ushın, filistlerdin' jerlerinin' ha'mmesine xabarshılar jiberdi.

¹⁰ Olar Shauldın' qural-jaraqların o'z qudaylarının' butxanasına qoyıp, basın Dagonnın' butxanasına ildirip qoydı.

¹¹ Giladtag'ı pu'tkil Yabesh xalqı filistlerdin' Shaulg'a islegen ha'mme isleri haqqında esitkende,

¹² olardın' barlıq ma'rt jawıngerleri barıp, Shaul menen onın' ullarının' denesin Yabeshke alıp keldi. Keyin olardın' su'yeklerin Yabeshtegi terebinf ag'ashının' astına ko'mip, jeti ku'n oraza tutıp, azaladı.

¹³ Shaul Jaratqan İyege qıyanet etkeni ushın o'lgen edi. Ol Jaratqan İyenin' so'zine boysınbay, ha'tte, a'rwaq shaqırıwshıg'a da ma'sla'ha't saldı.

¹⁴ Al Jaratqan İyeden ma'sla'ha't soramadı. Sol sebepli Jaratqan İye Shauldı o'ltirip, onın' patshalıg'ın İshay ulı Dawıtqa berdi.