1 Jılnama 14 bob

Dawıttın' shan'arag'ı (1-7), Filistlerdin' jen'iliske ushırawı (8-17).

¹ Tir patshası Xiram Dawıtqa elshiler, sonın' menen birge saray qurılısı ushın kedr ag'ashların, tas qalawshılardı ha'm ag'ash ustaların jiberdi.

² Sonda Dawıt Jaratqan İyenin' o'zin İzrail patshası etip tastıyıqlag'anın ha'm O'z xalqı İzrail ushın onın' patshalıg'ın ullı dan'qqa eristirgenin tu'sindi.

³ Sonda Dawıt Jaratqan İyenin' o'zin İzrail patshası etip tastıyıqlag'anın ha'm O'z xalqı İzrail ushın onın' patshalıg'ın ullı dan'qqa eristirgenin tu'sindi.

⁴ Dawıttın' Erusalimde tuwılg'an perzentlerinin' atları mınalar: Shammua, Shobab, Natan, Sulayman,

⁵ İbxar, Elishua, Elpelet,

⁶ Nogah, Nefeg, Yafia,

⁷ Elishama, Beliyada, Elifelet.

⁸ Filistler Dawıttın' maylanıp, İzrailg'a patsha etip qoyılg'anın esitkende, pu'tkil filist a'skerleri Dawıttı qolg'a tu'siriw ushın izlep ketti. Bunı esitken Dawıt olardı qarsı alıwg'a shıqtı.

⁹ Filistler kelip, Refaim oypatlıg'ına shabıwıl jasadı.

¹⁰ Dawıt Qudaydan: – Filistlerge qarsı ju'ris qılayın ba? Olardı mag'an ta'slim etesen' be? – dep soradı. Jaratqan İye: – Awa, ju'ris qıl. Olardı sag'an ta'slim etemen, – dedi.

¹¹ Sonda Dawıt a'skerleri menen birge Baal-Perasimge ketti ha'm ol jerde filistlerdi qıyrattı. Keyin ol: «Ha'r bir bo'getti jaypap o'tetug'ın suw tasqını sıyaqlı, Quday dushpanlarımdı menin' qolım menen qıyratıp tasladı», – dedi. Sol sebepten ol jerge Baal-Perasim atı berildi.

¹² Filistler butların sol jerge taslap qashqan edi. Dawıttın' buyrıg'ı boyınsha, butlar jag'ıp jiberildi.

¹³ Ko'p o'tpey, filistler qaytadan sol oypatlıqqa shabıwıl jasadı.

¹⁴ Dawıt ja'ne Qudaydan soradı ha'm Quday og'an bılay dep juwap berdi: «Olarg'a bul jerden hu'jim qılma. Olardı aylanıp o'tip, art jag'ınan, tut ag'ashları ta'repten hu'jim qıl.

¹⁵ Sen tut ag'ashlarının' joqarısınan ayaq sesleri sıyaqlı dawıstı esitiwden-aq, olarg'a hu'jimge o't. Sebebi sol waqıtta Men senin' aldın'da filist ordasın qıyratıw ushın baratırg'an bolaman».

¹⁶ Dawıt Qudaydın' buyırg'anınday qıldı ha'm filist ordasın Gibonnan Gezerge deyin qıyratıp bardı.

¹⁷ Solay etip, Dawıttın' dan'qı do'gerektegi ellerdin' ha'mmesine jayıldı. Jaratqan İye barlıq xalıqlardı onnan qorqatug'ın qıldı.