1 Jılnama 20 bob
1 Kelesi jılı ba'ha'rde, patshalar urısqa shıg'atug'ın waqıtta, İoab a'skerlerin baslap jolg'a shıqtı. Olar ammonlardın' elin wayran etip, Rabba qalasın qamal qıldı. Biraq Dawıt Erusalimde qalg'an edi. İoab Rabba qalasına hu'jim jasap, onı jer menen jeksen etti.
2 Dawıt olardın' patshasının' basındag'ı tajdı aldı. Hasıl taslar menen bezelgen, awırlıg'ı bir talant keletug'ın altın taj Dawıttın' basına kiygizildi. Dawıt qaladan ko'p mug'darda olja da alıp qayttı.
3 Ol qala xalqın sırtqa shıg'arıp, olardı jarg'ı, sho'kkish ha'm balta menen islenetug'ın jumıslardı islewge ma'jbu'r etti. Dawıt ammonlardın' qalalarının' ha'mmesinde usılay isledi. Bunnan keyin, Dawıt pu'tkil a'skerlerin ertip, Erusalimge qayttı.
4 Bir qansha waqıt o'tkennen son', Gezerde filistler menen urıs baslandı. Bul sawashta xushalı Sibbexay da'w a'wladlarınan bolg'an Sippaydı o'ltirdi. Sonda filistler bas iydi.
5 Filistler menen bolg'an basqa sawashta, Yair ulı Elxanan gatlı Goliyattın' tuwısqanı Laxmiydi o'ltirdi. Laxmiydin' nayzasının' sabı toqıw u'skenesinin' qadasınday edi.
6 Keyinirek Gat qalasında ja'ne bir sawash bolıp, ol jerde da'wdey bir adam bar edi. Onın' qolları ha'm ayaqları altı barmaqlı bolıp, ha'mmesi bolıp jigirma to'rt barmag'ı bar edi. Ol da da'w a'wladlarınan edi.
7 Usı adam izraillılardı masqaralag'anda, Dawıttın' a'jag'ası Shimeanın' ulı İonatan onı o'ltirdi.
8 Dawıt ha'm onın' adamları ta'repinen o'ltirilgen usı adamlar da Gattag'ı da'w a'wladlarınan edi.
