2 Jılnama 10 bob
1 Rexabam Shexemge ketti. O'ytkeni pu'tkil izraillılar Rexabamdı patsha etip qoyıw ushın Shexemge toplang'an edi.
2 Patsha Sulaymannan qashıp, Mısırda jasap atırg'an Nabat ulı Yarobam bunı esitkende, Mısırdan qayttı.
3 İzraillılar Yarobamdı shaqırttı. Yarobam pu'tkil izraillılar menen birge Rexabamg'a kelip:
4 – A'ken'iz moynımızg'a awır moyıntırıq salg'an edi. Siz a'ken'iz bizlerge ju'klegen awır ju'kti ha'm ol salg'an moyıntırıqtı jen'illetin'. Sonda sizge xızmet etemiz, – dedi.
5 Rexabam olarg'a: – U'sh ku'nnen keyin qaytıp kelin'ler, – dedi. Xalıq tarap ketti.
6 Patsha Rexabam a'kesi Sulaymannın' ko'zinin' tirisinde og'an xızmet etken aqsaqallar menen oylasıp: – Mına xalıqqa ne dep juwap bereyin, qanday ma'sla'ha't beresizler? – dep soradı.
7 Aqsaqallar og'an: – Eger siz bul xalıqqa jıllı shıray ko'rsetip, kewlin alıp, jaqsı so'zin'izdi ayamasan'ız, olar sizge bir o'mir qul boladı, – dep juwap berdi.
8 Degen menen, Rexabam aqsaqallardın' ma'sla'ha'tine qulaq aspay, o'zi menen birge o'sken jaslar menen ken'esip,
9 olardan: – «A'ken'izdin' bizlerge salg'an moyıntırıg'ın jen'illetsen'iz», – dep atırg'an bul xalıqqa ne dep juwap bersem eken? Sizler qanday ma'sla'ha't beresiz? – dep soradı.
10 Sonda o'zi menen birge o'sken jas jigitler og'an bılay dep juwap berdi: – Sizge: «A'ken'iz moynımızg'a awır moyıntırıq salg'an edi, siz onı jen'illetsen'iz», – dep atırg'an xalıqqa: «Menin' shunatay barmag'ım a'kemnin' belinen de juwanıraq.
11 A'kem sizlerge awır moyıntırıq salg'an bolsa, men moyıntırıg'ın'ızdı onnan da awırlataman. A'kem sizlerdi qamshı menen jazalag'an bolsa, men sizlerdi sım qosıp o'rilgen qamshı menen jazalayman», – dep aytın'.
12 Patshanın': «U'sh ku'nnen keyin qaytıp kelin'ler», – degen so'zi boyınsha, u'shinshi ku'ni Yarobam ha'm pu'tkil xalıq Rexabamg'a keldi.
13 Patsha aqsaqallardın' ken'esine qulaq aspay, olarg'a qatal juwap berdi.
14 Ol jas jigitlerdin' ma'sla'ha'ti boyınsha xalıqqa: «A'kem sizlerge awır moyıntırıq salg'an bolsa, men onı ja'ne de awırlataman. A'kem sizlerdi qamshı menen jazalag'an bolsa, men sizlerdi sım qosıp o'rilgen qamshı menen jazalayman», – dedi.
15 Patsha xalıqqa qulaq salmadı. Sebebi Jaratqan İyenin' shilolı Axiya arqalı Nabat ulı Yarobamg'a aytqan so'zleri orınlanıwı ushın Quday usılay isledi.
16 Pu'tkil izraillılar patshanın' o'zlerine qulaq salmag'anın ko'rgende, patshag'a bılay dep juwap berdi: «Dawıt penen bizin' ne baylanısımız bar, İshaydın' ulında alatug'ın u'lesimiz de joq. Ha'y, İzrail xalqı, u'ylerin'izge qaytın'lar! Ha'y Dawıt, o'z u'yin' o'zin'e ardana bolsın!» Usılardı aytıp, izraillılar ha'mmesi o'z u'ylerine qaytıp ketti.
17 Biraq Rexabam Yahuda qalalarında jasaytug'ın izraillılarg'a patshalıq etiwin dawam etti.
18 Patsha Rexabam ma'rdikarg'a alıng'anlar u'stinen qadag'alawshı Hadoramdı İzrail xalqına jiberdi. Xalıq onı tas boran qılıp o'ltirdi. Sonda patsha Rexabam tez sawash arbasına mindi de, Erusalimge qashıp ketti.
19 Sol ku'nnen baslap ha'zirge deyin, İzrail xalqı Dawıttın' urpag'ına qarsı ko'terilip kelmekte.
