2 Jılnama 11 bob

Shemayanın' payg'ambarshılıg'ı (1-4), Rexabamnın' Yahuda qalaların bekkemlewi (5-17), Rexabamnın' xojalıg'ı (18-23).

¹ Rexabam Erusalimge bardı da, İzrail menen urısıp, o'z patshalıg'ın qaytarıp alıw ushın, Yahuda ha'm Benyamin urıwınan bir ju'z seksen mın' ag'la jawıngerdi a'skerlikke topladı.

² Biraq sol arada Qudaydın' adamı bolg'an Shemayag'a Jaratqan İyeden mınaday so'z tu'sti:

³ «Yahuda patshası Sulaymannın' ulı Rexabamg'a, Yahuda ha'm Benyamin jerindegi barlıq izraillılarg'a bılay dep ayt:

⁴ Jaratqan İye bılay deydi: „O'z tuwısqanların'ızg'a qarsı urıs ashıp, urıstı baslaman'lar. Ha'r birin'iz o'z u'yin'izge qaytın'lar. O'ytkeni bul islerdi islep atırg'an Men bolaman“». Jaratqan İyenin' bul so'zlerin esitken xalıq Yarobamg'a qarsı urısıwdan waz keship, izine qayttı.

⁵ Rexabam Erusalimde jasadı ha'm qorg'anıw ushın Yahudadag'ı mına qalalardı diywallar menen qorshadı:

⁶ Beytlehem, Etam, Teqoa,

⁷ Beyt-Sur, Soxo, Adullam,

⁸ Gat, Maresha, Zif,

⁹ Adorayım, Laxish, Azeqa,

¹⁰ Sora, Ayyalon ha'm Xebron. Bular Yahuda ha'm Benyamin jerlerindegi qorg'anlı qalalar edi.

¹¹ Rexabam usı qalalardın' bekinislerin ku'sheytip, bekinislerge a'skerbasılar qoydı ha'm olarda azıq-awqat, za'ytu'n mayı ha'm sharap saqlanatug'ın orınlar qurdı.

¹² Ha'r bir qalanı u'lken qalqan ha'm nayzalar menen ta'miyinlep, qorg'anıwdı bekkemledi. Solay etip, Yahuda ha'm Benyamin urıwları Rexabamnın' qol astında qaldı.

¹³ İzraildın' barlıq aymaqlarındag'ı ruwxaniyler menen lebiyliler Rexabamnın' qasına toplandı.

¹⁴ Lebiyliler, ha'tte, o'z jaylawları menen malmu'liklerin taslap, Yahuda ha'm Erusalimge ko'ship keldi. Sebebi Yarobam menen onın' ulları olardı ruwxaniy bolıp, Jaratqan İyege xızmet etiwden shetletken edi.

¹⁵ Yarobam teke ha'm tana mu'sinlerin isletip sıyınıw orınlarına qoydı ha'm ol jerlerge xızmet etiw ushın o'z ruwxaniylerin tayınladı.

¹⁶ İzraildın' barlıq urıwlarındag'ı İzraildın' Qudayı Jaratqan İyege shın ju'rekten umtılg'anlar o'zlerinin' ata-babalarının' Qudayı Jaratqan İyege qurbanlıq beriw ushın, ruwxaniyler menen lebiylilerge erip, Erusalimge keldi.

¹⁷ Olar Yahuda patshalıg'ın bekkemledi ha'm u'sh jıl dawamında Dawıt penen Sulaymannın' jolı menen ju'rip, Sulaymannın' ulı Rexabamdı qollap-quwatladı.

¹⁸ Rexabam Dawıttın' ulı Erimottın' qızı Maxalatqa u'ylendi. Onın' anası İshaydın' ulı Eliabtın' qızı Abihayıl edi.

¹⁹ Maxalat Rexabamg'a Eush, Shemariya ha'm Zaham degen ullardı tuwıp berdi.

²⁰ Maxalattan son' Rexabam Abshalomnın' qızı Maaxag'a u'ylendi. Ol Rexabamg'a Abiya, Attay, Ziza ha'm Shelomitti tuwıp berdi.

²¹ Rexabam basqa hayalları ha'm toqallarına qarag'anda, Abshalomnın' qızı Maaxanı ko'birek jaqsı ko'rdi. Rexabamnın' on segiz hayalı ha'm alpıs toqalı bolıp, olardan jigirma segiz ul ha'm alpıs qızı bar edi.

²² Rexabam Maaxadan tuwılg'an ulı Abiyanı o'z taxtının' miyrasxorı qılmaqshı bolıp, basqa tuwısqanlarına basshı etip qoydı.

²³ Rexabam aqıllılıq penen is tutıp, basqa ullarının' ha'mmesin Yahuda menen Benyamin jerlerindegi qorg'anlı qalalarg'a bo'lip jiberdi. Olardı kerek-jarag'ı menen moldan ta'miyinlep, bir qansha hayallar alıp berdi.