2 Jılnama 12 bob

Shishaqtın' Yahudag'a hu'jim jasawı (1-16).

¹ Rexabam o'z hu'kimdarlıg'ın bekkemlep, ku'shke tolg'annan keyin, onın' o'zi de, pu'tkil İzrail xalqı da Jaratqan İyenin' Nızamınan ju'z burdı.

² Olar Jaratqan İyege qıyanet etti. Sonlıqtan Rexabamnın' patshalıg'ının' besinshi jılında Mısır patshası Shishaq Erusalimge hu'jim jasadı.

³ Shishaq o'zi menen birge Mısırdan bir mın' eki ju'z sawash arbasın, alpıs mın' atlı a'skerdi, sonday-aq liviyalı, suklı ha'm kushlı sansanaqsız la'shkerlerdi alıp keldi.

⁴ Shishaq Yahudanın' qorg'anlı qalaların basıp alıp, Erusalimge deyin jaqınlastı.

⁵ Sonda Shishaqtan qorqıp, Erusalimge jıynalg'an Rexabamg'a ha'm Yahuda basshılarına payg'ambar Shemaya kelip, bılay dedi: – Jaratqan İye bılay deydi: «Sizler Meni ta'rk ettin'iz, endi Men de sizlerdi ta'rk etip, Shishaqtın' qolına tapsıraman».

⁶ İzrail basshıları ha'm patsha o'z ayıpların ta'n alıp: – Jaratqan İye a'dil, – dedi.

⁷ Jaratqan İye olardın' ayıpların ta'n alg'anın ko'rgende, Shemayag'a Onnan mınaday so'z tu'sti: «Olar gu'naların moyınladı. Sonlıqtan Men olardı qırıp taslamayman, qutqarılıwı ushın az-maz ja'rdem beremen. Erusalimge degen g'a'zebimdi Shishaq arqalı to'kpeymen.

⁸ Biraq olardı Shishaqqa bag'ınıshlı qılaman. Sonda olar Mag'an xızmet etiw menen basqa ellerdin' patshalarına xızmet etiw arasındag'ı ayırmashılıqtı bilip aladı».

⁹ Mısır patshası Shishaq Erusalimge bastırıp kelip, Jaratqan İyenin' İbadatxanasındag'ı ha'm patsha sarayındag'ı g'a'ziynelerdi tartıp alıp ketti. Ol ha'mme na'rseni, Sulayman soqtırg'an altın qalqanlardı da aldı.

¹⁰ Patsha Rexabam olardın' ornına qoladan qalqanlar isletip, olardı patsha sarayının' kirer awzın qorg'aytug'ın saqshılardın' basshılarına berdi.

¹¹ Patsha Jaratqan İyenin' İbadatxanasına ha'r barg'anda, saqshılar patshanın' qasında bul qalqanlardı alıp ju'retug'ın, son'ınan ja'ne saqshılardın' bo'lmesine aparıp qoyatug'ın edi.

¹² Rexabam gu'nasın moyınlag'anda, Jaratqan İye g'a'zepten qaytıp, Yahuda xalqın tolıq qırıp jibermedi. Yahudada ele de jaqsı isler bar edi.

¹³ Patsha Rexabam Erusalimde patshalıg'ın bekkemlep, hu'kimdarlıq qıla berdi. Ol taxtta otırg'anda qırıq bir jasta edi. Rexabam Jaratqan İye O'z atın ornatıw ushın İzraildın' pu'tkil urıwları arasınan tan'lap alg'an qalası Erusalimde on jeti jıl patshalıq qıldı. Onın' anası ammon xalqınan bolıp, atı Naama edi.

¹⁴ Rexabam Jaratqan İyege shın ju'rekten umtılmag'anı sebepli, jaman islerdi islep turdı.

¹⁵ Rexabam islegen isler basınan ayag'ına shekem Shemaya payg'ambardın' jazıwlarında ha'm wa'liy İddonın' shejirege kirgizilgen jazıwlarında bayan etilgen. Rexabam menen Yarobam pu'tkil o'miri dawamında urısıp keldi.

¹⁶ Rexabam o'lip, ata-babalarına qosıldı ha'm Dawıttın' qalasına jerlendi. Onın' ornına ulı Abiya patsha boldı.