2 Jılnama 13 bob
1 İzrail patshası Yarobamnın' patshalıg'ının' on segizinshi jılında Abiya Yahudag'a patsha boldı.
2 Ol Erusalimde u'sh jıl patshalıq etti. Abiyanın' anası gibalı Urieldin' qızı Mixaya edi. Abiya menen Yarobam ortasında urıs boldı.
3 Abiya to'rt ju'z mın' ag'la a'skerdi sawashqa basladı. Yarobam bolsa, segiz ju'z mın' ag'la ha'm ma'rt a'skerin og'an qarsı sapqa dizdi.
4 Abiya Efrayımnın' tawlı u'lkesindegi Semarayım tawına shıg'ıp, bılay dedi: «Ha'y, Yarobam ha'm pu'tkil İzrail, meni tın'lan'lar!
5 İzraildın' Qudayı Jaratqan İyenin' buzılmas bir kelisim boyınsha İzrailg'a patshalıq qılıwdı ma'n'gige Dawıtqa ha'm onın' urpaqlarına bergenin bilmeysiz be?
6 Biraq Dawıt ulı Sulaymannın' xızmetshisi Nabat ulı Yarobam o'z mırzasına qarsı bas ko'terdi.
7 Onın' qasına on'bag'an ha'm jaramas adamlar jıynalıp, Sulayman ulı Rexabamg'a qarsı shıqtı. Rexabam sol waqıtta jas ha'm ta'jiriybesiz bolg'anlıqtan, olarg'a qarsı tura almadı.
8 Endi bolsa, Dawıttın' urpag'ının' qolında bolg'an Jaratqan İyenin' patshalıg'ına qarsı turmaqshısız. Awa, sizler ko'pshiliksiz! Bunın' u'stine, qudayın'ız dep Yarobam soqtırıp bergen altın tanalar da janın'ızda!
9 Jaratqan İyenin' ruwxaniyleri bolg'an Xaronnın' urpaqların ha'm lebiylilerdi quwıp jibergen sizler emes pe? Olardın' ornına basqa xalıqlardın' da'stu'rine say, a'piwayı adamlardan ruwxaniylerdi qoyıp alg'an joqsız ba? Awa, bag'ıshlanıw ra'simine bir bug'a yamasa jeti qoshqar alıp kelgen ha'r bir adam jalg'an qudaylarg'a ruwxaniy bola aladı-da'!
10 Al bizlerge kelsek, Jaratqan İye bizlerdin' Qudayımız! Bizler Onnan ju'z burmadıq. Jaratqan İyege xızmet etip atırg'an ruwxaniyler de Xaron urpag'ınan bolıp, lebiyliler olarg'a ja'rdem bermekte.
11 Olar ha'r ku'ni azanda ha'm keshte Jaratqan İyege jandırılatug'ın qurbanlıqlar beredi, xosh iyisli tu'tetkiler tu'tetedi, arnawlı stolg'a usınılg'an nanlar qoyadı, ha'r ku'ni keshte altın ha'stedegi shıralardı jag'adı. Awa, bizler Qudayımız Jaratqan İyenin' tapsırmaların orınlap ju'rmiz. Al sizler bolsan'ız, Onı ta'rk ettin'iz.
12 Quday bizler menen birge, Ol bizlerdin' jolbasshımız. Onın' ruwxaniyleri ka'rnaylar shalıp, sizlerge qarsı urısqa shaqıradı. İzrail urpaqları, atababaların'ızdın' Qudayı Jaratqan İyege qarsı urıspan'lar! Ba'ri bir jen'iske erispeysiz».
13 Sol arada Yarobam a'skerlerinin' bir bo'legin Yahuda a'skerlerinin' artqı ta'repine buqqı qoyıw ushın jibergen edi. A'skerlerdin' tiykarg'ı bo'limi Yahuda a'skerlerinin' aldında turdı, al buqqıdag'ılar artqı ta'repinde edi.
14 Yahuda a'skerleri burılıp, o'zlerine aldıdan da arttan da hu'jim jasamaqshı bolıp turg'anlardı ko'rgende, Jaratqan İyege jalbarındı. Al ruwxaniyler ka'rnayların shaldı.
15 Yahuda a'skerleri su'ren salıp baqırıstı. Olar baqırısqanda, Quday Yarobamdı ha'm izraillılardı Abiya menen Yahuda aldında qırg'ıng'a ushırattı.
16 İzraillılar yahudalılardın' aldına tu'sip qashtı ha'm Quday olardı yahudalılarg'a ta'slim etti.
17 Abiya ha'm onın' a'skerleri izraillılarg'a awır soqqı berdi. İzraillılardın' bes ju'z mın' ag'la a'skeri qaza taptı.
18 Solay etip izraillılar jen'iliske ushıradı. Al yahudalılar atababalarının' Qudayı Jaratqan İyege su'yengeni ushın jen'iske eristi.
19 Abiya Yarobamdı quwıp ketip, og'an tiyisli Beyt-El, Eshana, Efron qalaların ha'm olardın' do'geregindegi awıllardı qolg'a kirgizdi.
20 Yarobam Abiya da'wirinde o'zinin' burıng'ı qu'diretin tikley almadı. Jaratqan İye onın' janın aldı ha'm ol qaytıs boldı.
21 Al Abiyanın' hu'kimdarlıg'ı ku'sheye berdi. Ol on to'rt hayal alıp, olardan jigirma eki ul ha'm on altı qızlı boldı.
22 Abiyanın' basqa isleri, islegen isleri ha'm aytqanları İddo payg'ambardın' tu'sindirme kitabında jazılg'an.
