2 Jılnama 15 bob

Patsha Asanın' jen'illikleri (1-19).

¹ Oded ulı Azariyanın' u'stine Qudaydın' Ruwxı tu'sti.

² Sonda Azariya patsha Asa menen ushırasıw ushın jolg'a shıqtı ha'm og'an barıp bılay dedi: «Ha'y, Asa! Ha'y, Benyamin ha'm Yahuda xalqı, mag'an qulaq salın'lar! Sizler Jaratqan İye menen birge bolg'an da'wirde, Ol da sizler menen birge boladı. Eger Onı izlesen'iz, tabasızlar. Al eger Onı ta'rk etsen'iz, Ol da sizlerdi ta'rk etedi.

³ Uzaq waqıt dawamında İzrail xalqı haqıyqıy Qudaydan, ta'lim beretug'ın ruwxaniyden ha'm Onın' Nızamınan alısta jasadı.

⁴ Biraq qıyınshılıqqa ushırag'anında olar İzraildın' Qudayı Jaratqan İyege bet burıp, Onı izledi ha'm Onı taptı.

⁵ Sol ku'nleri saparg'a shıg'ıw qa'wipli bolıp, ha'mme ellerdin' turg'ınları ushın g'awasatlı waqıtlar edi.

⁶ Millet milletke, qala qalag'a qarsı urısatug'ın edi. Sebebi Quday olardı ha'r tu'rli apatshılıqlarg'a ushıratıp, albıratıp qoyg'an edi.

⁷ Biraq sizler bekkem bolın'lar! Tu'skinlikke tu'spen'ler! O'ytkeni miynetin'izdin' jemisin alasızlar».

⁸ Oded ulı Azariya payg'ambardın' bul payg'ambarshılıq so'zlerin esitkende, Asa jigerlendi. Ol pu'tkil Yahuda menen Benyamin jerlerindegi ha'm Efrayımnın' tawlı u'lkesindegi o'zi qolg'a kirgizgen qalalardag'ı jerkenishli butlardı alıp tasladı. Sonday-aq, Jaratqan İyenin' İbadatxanasının' aywanının' aldına ornatılg'an Jaratqan İyenin' qurbanlıq ornın qayta tikledi.

⁹ Bunnan keyin, Asa Yahuda ha'm Benyamin urıwı menen birge olardın' arasında jasap atırg'an Efrayım, Menashshe ha'm Shimon urıwınan bolg'anlardı topladı. O'ytkeni ko'p adamlar Quday İyenin' Asa menen birge ekenin ko'rip, İzraildı taslap, Yahudag'a ko'ship kelgen edi.

¹⁰ Olar Asa hu'kimdarlıg'ının' on besinshi jılının' u'shinshi ayında Erusalimge jıynaldı.

¹¹ Sol ku'ni olar urıstan alıp kelgen oljasınan jeti ju'z bas iri mal ha'm jeti mın' bas mayda maldı Jaratqan İyege arnap qurbanlıqqa berdi.

¹² Xalıq atababalarının' Qudayı Jaratqan İyeni shın ju'rekten, jan-ta'ni menen izlew ushın kelisim du'zdi.

¹³ İzraildın' Qudayı Jaratqan İyeni izlemegen ha'r bir adam: jas bolsın, g'arrı bolsın, erkek bolsın, hayal bolsın ha'mmesi o'ltiriletug'ın boldı.

¹⁴ Olar baqırıp, ha'r tu'rli ka'rnaylar hawazları astında ba'lent dawıs penen Jaratqan İyege ant ishti.

¹⁵ Pu'tkil yahudalılar bergen antı ushın quwanıshlı edi, sebebi olar shın ju'rekten ant ishken edi. Olar ıqlaslanıp Jaratqan İyeni izlegeni ushın, Onı taptı. Jaratqan İye olarg'a ha'r ta'repleme tınıshlıq berdi.

¹⁶ Patsha Asa kempir apası Maaxadan xanbiykelik atag'ın tartıp aldı. Sebebi ol Asherag'a arnap jerkenishli bir but soqtırg'an edi. Asa bul jerkenishli buttı shawıp taslap, maydalap, Kidron sayında jag'ıp jiberdi.

¹⁷ Ol İzraildag'ı sıyınıw orınların joq qılmasa da, o'mir boyı Jaratqan İyege sadıq qaldı.

¹⁸ Asa a'kesinin' ha'm o'zinin' atag'an na'rselerin: gu'misti, altındı ha'm buyımlardı Qudaydın' İbadatxanasına alıp keldi.

¹⁹ Asanın' patshalıg'ının' otız besinshi jılına deyin elde urıs bolmadı.