2 Jılnama 17 bob

Yahuda patshası Ehoshafat (1-19).

¹ Asanın' ornına ulı Ehoshafat patsha boldı ha'm İzrailg'a qarsı bekinisin ku'sheytti.

² Ol Yahudanın' barlıq qorg'anlı qalalarına a'skerlerin ornalastırıp, pu'tkil Yahuda jerinde ha'm a'kesi Asa Efrayım urıwınan basıp alg'an qalalarg'a saqshılar toparların qoydı.

³ Ehoshafat babası Dawıttın' da'slepki ju'rgen jollarınan ju'rgeni ushın, Jaratqan İye onın' menen birge boldı. Ol Baallarg'a sıyınbay,

⁴ a'kesi Asa sıyıng'an Qudayg'a umtılıp, Onın' buyrıqlarına boysındı. Al İzrail xalqı islegen da'stu'rlerge ermedi.

⁵ Sonlıqtan Jaratqan İye Ehoshafattın' patshalıg'ın bekkemledi. Pu'tkil Yahuda eli og'an sıylıqlar alıp kelip turdı. Usılayınsha patsha mol baylıqqa ha'm hu'rmetke iye boldı.

⁶ Onın' ju'regi Jaratqan İyege bag'ıshlang'an edi. Ol Yahudadag'ı sıyınıw orınların ha'm kiyeli ag'ashlarına arnalg'an kiyeli ag'ashlardı alıp tasladı.

⁷ Ehoshafat o'z hu'kimdarlıg'ının' u'shinshi jılında o'zinin' xızmetkerlerinen Ben-Xayıldı, Obadiyanı, Zexariyanı, Netaneldi ha'm Mixayanı xalıqqa ta'lim beriwi ushın Yahuda qalalarına jiberdi.

⁸ Olar menen birge lebiylilerden: Shemaya, Nataniya, Zebadiya, Asahel, Shemiramot, Ehonatan, Adoniya, Tobiya ha'm Tob-Adoniyanı, ruwxaniylerden: Elishama ha'm İoramdı jiberdi.

⁹ Jiberilgenler Jaratqan İyenin' Nızam kitabın janına alıp ju'rip, Yahudada ta'lim berdi. Olar pu'tkil Yahuda qalaların aralap, xalıqqa u'yretti.

¹⁰ Yahuda a'tirapındag'ı barlıq u'lkelerdin' patshalıqlarına Jaratqan İye qorqıw salg'anlıqtan, olardın' hesh biri Ehoshafatqa qarsı urıs ashpadı.

¹¹ Bazı filistler sawg'a ha'm salıq sıpatında Ehoshafatqa gu'mis, al arablar mayda mal su'riwin: jeti mın' jeti ju'z qoshqar ha'm jeti mın' jeti ju'z teke alıp keldi.

¹² Ehoshafat ku'sheyip bara berdi. Ol Yahudada qorg'anlar ha'm telekleri bar qalalar qurg'ızıp,

¹³ Yahuda qalalarında ko'p mug'darda kerek-jaraq jıynap qoydı. Al Erusalimde ta'jiriybeli bahadır jawıngerleri bar edi.

¹⁴ Olardın' a'wladları boyınsha dizimi mınaday: Yahuda urıwında mın'basılar bar edi. A'skerbası Adna u'sh ju'z mın' bahadır jawıngerdi basqardı.

¹⁵ Onnan keyingi a'skerbası Ehoxanan bolıp, ol eki ju'z seksen mın' jawıngerge basshılıq etti.

¹⁶ Onnan keyingi a'skerbası Zixriy ulı Amasiya bolıp, ol eki ju'z mın' bahadır jawıngerge basshılıq etti. Amasiya o'z erki menen Jaratqan İyege xızmet etip atırg'an edi.

¹⁷ Benyamin urıwınan shıqqan oq jay ha'm qalqan menen qurallang'an eki ju'z mın' bahadır jawıngerge Elyada basshılıq etti.

¹⁸ Onnan keyingi a'skerbası Ehozabad urısqa tayar, qurallang'an bir ju'z seksen mın' adamdı basqardı.

¹⁹ Bul jawıngerler patshanın' pu'tkil Yahuda elindegi bekinisli qalalarına jaylastırg'an a'skerlerinen tısqarı a'skerleri edi.