2 Jılnama 18 bob
1 Yahuda patshası Ehoshafat ju'da' bay bolıp, ataq-abırayı asıp ketti. Ol İzrail patshası Axab penen quda-tamır boldı.
2 Aradan bir neshe jıl o'tkennen son', Ehoshafat Axabtı ko'riw ushın Samariyag'a bardı. Axab Ehoshafattın' ha'm onın' menen barg'anlardın' hu'rmetine ko'plegen mayda ha'm iri mallardı soydı ha'm Giladtag'ı Ramot qalasına hu'jim qılıwg'a ko'ndirmekshi boldı.
3 Son'ınan İzrail patshası Axab Yahuda patshası Ehoshafattan: – Giladtag'ı Ramotqa menin' menen birge barasız ba? – dep soradı. Ehoshafat Axabqa: – Meni o'zin'izdey, xalqımdı xalqın'ızday, ko'rin'. Siz benen birge urısqa baramız, – dep juwap berdi.
4 Son'ınan Ehoshafat: – Da'slep Jaratqan İyenin' ne deytug'ının bilip alayıq, – dedi.
5 Sonda İzrail patshası to'rt ju'z payg'ambardı toplap, olarg'a: – Giladtag'ı Ramotqa qarsı urısıw ushın barayıq pa yamasa barmayıq pa? – dep soradı. Olar: – Barın', Quday qalanı sizge ta'slim etedi, – dep juwap berdi.
6 Biraq Ehoshafat: – Bul jerde bulardan basqa Jaratqan İyenin' payg'ambarı bar ma? Onnan da sorayıq, – dedi.
7 İzrail patshası Ehoshafatqa: – Jaratqan İyenin' erkin sorag'anday, ja'ne bir payg'ambar bar. Ol İmla ulı Mixa. Biraq men onı jaman ko'remen. Sebebi ol men tuwralı hesh jaqsı payg'ambarshılıq aytpaydı, ba'rqulla tek jaman payg'ambarshılıq aytadı, – dep juwap berdi. Ehoshafat patshag'a: – Patsha, bulay demen'iz, – dedi.
8 Sonda İzrail patshası bir xızmetkerdi shaqırıp, og'an: «İmla ulı Mixanı tez alıp kel», – dep buyırdı.
9 İzrail patshası Axab ha'm Yahuda patshası Ehoshafat patshalıq kiyimlerin kiyip, Samariyanın' da'rwazasının' kirer awzındag'ı maydanda, ha'r biri o'z taxtında otırg'an edi. Barlıq payg'ambarlar olardın' aldında payg'ambarshılıq etip atırg'an edi.
10 Kenaana ulı Sedekiya o'zine temirden shaqlar islep: «Jaratqan İye bılay deydi: „Aramlılardı qırıp tawıspag'ansha, usı shaqlar menen su'ze beresiz“», – dedi.
11 Basqa payg'ambarlardın' ha'mmesi de: «Giladtag'ı Ramotqa hu'jim etin', jen'iske erisesiz. Sebebi Jaratqan İye olardı sizge ta'slim etedi», – dep, anıq sol so'zdi qaytaladı.
12 Mixanı shaqırıw ushın ketken xızmetker og'an barıp: – Mine, payg'ambarlardın' ha'mmesi bir awızdan patshag'a jaqsı boljawlardı aytıp atır. Sizin' so'zin'iz de olardiki menen birdey bolsın, siz de jaqsı boljaw aytın', – dedi.
13 Biraq Mixa og'an: – Tiri Jaratqan İye haqı ant ishemen: Qudayım mag'an ne dese, sonı aytaman, – dep juwap berdi.
14 Mixa patshag'a keldi. Patsha Mixadan: – Mixa, bizler Giladtag'ı Ramotqa qarsı urısıw ushın barayıq pa yamasa men onnan bas tartayın ba? – dep soradı. Mixa patshag'a: – Bara berin'ler, jen'esizler, olar sizlerge ta'slim etiledi, – dep juwap berdi.
15 Degen menen, patsha Mixag'a: – Jaratqan İyenin' atı menen tek haqıyqattı aytıwın' ushın, sag'an neshe ma'rte ant ishkiziwim kerek? – dedi.
16 Sonda Mixa patshag'a bılay dedi: – Mag'an pu'tkil izraillılar tawlar u'stinde jayılıp ju'rgen shopansız qoylar sıyaqlı ko'rinip tur. Sonda Jaratqan İye mag'an: «Bulardın' xojayını joq. Ha'r biri aman-esen u'yine qaytsın», – dedi.
17 İzrail patshası Ehoshafatqa: «Bunın' men tuwralı jaqsı emes, al tek jaman payg'ambarshılıq aytatug'ının sizge aytqan joq pa edim?» – dedi.
18 Mixa patshag'a bılay dedi: – Onda Jaratqan İyenin' so'zin tın'lan'. Men Jaratqan İyenin' O'z taxtında otırg'anın, pu'tkil aspan barlıqlarının' Onın' on' ha'm shep ta'repinde turg'anın ko'rdim.
19 Sonda Jaratqan İye: «Giladtag'ı Ramotqa barıp, sol jerde o'liwi ushın, İzrail patshası Axabtı kim ko'ndire aladı?» – dep soradı. Birewi anaw, birewi mınaw dep turg'anda,
20 bir ruwx aldıg'a shıqtı da, Jaratqan İyenin' aldında turıp: «Men ko'ndire alaman», – dedi. Jaratqan İye onnan: «Qalay?» – dep soradı.
21 Sol ruwx: «Men jalg'an ruwxqa aylanıp, Axabtın' barlıq payg'ambarlarına jalg'an so'yletemen», – dep juwap berdi. Jaratqan İye og'an: «Sen onı ko'ndirip, bunı isleysen'. Barıp, solay isle», – dedi.
22 Mine, ha'zir Jaratqan İye sizin' sol payg'ambarların'ızdın' awzına jalg'an ruwxtı salıp qoyg'an. O'ytkeni Jaratqan İye sizge jamanlıq islewge qarar etti.
23 Kenaana ulı Sedekiya Mixag'a jaqınlap, onın' betine shapalaq penen urıp jiberdi de: – Jaratqan İyenin' Ruwxı senin' menen so'ylesiw ushın, mennen shıg'ıp ketken be eken? – dedi.
24 Mixa og'an: – Bunı sen jasırınıw ushın ishki bo'lmege tıg'ılg'an waqtın'da ko'resen', – dedi.
25 Sonda İzrail patshası bılay dedi: «Mixanı qala ha'kimi Amon menen patshanın' ulı İoashqa qaytıp alıp barın'lar.
26 Olarg'a menin' mına so'zimdi jetkizin': „Men aman-esen qaytıp kelgenimshe, bul adamdı qamaqxanag'a qamap qoyıp, az-maz nan menen suwdan basqa hesh na'rse bermesin“».
27 Mixa patshag'a: «Eger shınında da aman-esen qaytıp kelsen'iz, onda Jaratqan İye menin' awzım arqalı so'ylemegen boladı», – dedi, son'ınan xalıqqa: «Ha'mmen'iz bunı esitip qoyın'lar», – dedi.
28 İzrail patshası Axab ha'm Yahuda patshası Ehoshafat Giladtag'ı Ramotqa hu'jim jasaw ushın jolg'a shıqtı.
29 İzrail patshası Ehoshafatqa: «Men patshalıq kiyimlerin kiymey, urısqa shıg'aman, al siz patshalıq kiyimlerin'izdi kiyip shıg'ın'», – dedi. Solay etip, İzrail patshası kiyimlerin o'zgertip, olar sawashqa shıqtı.
30 Aram patshası o'z sawash arbalarının' a'skerbasılarına: «Kishkenesi menen de, u'lkeni menen de urısıp otırmay, tek İzrail patshası menen urısqa kirisin'», – dep buyırdı.
31 Sawash arbalarının' a'skerbasıları Ehoshafattı ko'rgende: «İzrail patshası usı bolsa kerek», – dep oylap, og'an qaray bas saldı. Ehoshafat baqırıp jibergende, Quday İye og'an ja'rdemge kelip, hu'jim qılıwshılardı basqa jaqqa burıp jiberdi.
32 O'ytkeni sawash arbalarının' a'skerbasıları onın' İzrail patshası emesligin an'g'arıp, izge qayttı.
33 Sol arada bir adam tosattan oq jayın atıp jiberip, İzrail patshasın jaradar etti. Oq sawıttın' qosılg'an jerinen kirgen edi. Patsha arbakeshine: «İzge aylanıp, meni sawash maydanınan alıp shıq, men jaraqatlandım», – dedi.
34 Degen menen, sol ku'ni g'ıjlag'an sawash bolıp, İzrail patshası o'zinin' sawash arbası menen tıg'ılısta qaldı ha'm keshke shekem aramlılarg'a qarap turıwg'a ma'jbu'r boldı. Keshke taman patsha qaza taptı.
