2 Jılnama 22 bob
1 Erusalim turg'ınları İoramnın' ornına onın' en' genje ulı Axaziyanı patsha etip qoydı. Sebebi arablar menen birge a'skeriy ordag'a shabıwıl jasag'an basqınshılar patshanın' Axaziyadan u'lken ullarının' ha'mmesin o'ltirgen edi. Usılayınsha, İoram ulı Axaziya Yahuda u'stinen patshalıq ete basladı.
2 Axaziya jigirma eki jasında patsha bolıp, Erusalimde bir jıl patshalıq etti. Onın' anası İzrail patshası Omriydin' aqlıg'ı bolıp, atı Ataliya edi.
3 Axaziya Axabtın' urpag'ının' jolınan ju'rdi. Sebebi anası og'an ma'sla'ha't berip, jaman islerdi islewge tu'rtki salıp otırdı.
4 Axaziya Axab urpag'ı sıyaqlı Jaratqan İyenin' na'zerinde jaman bolg'an islerdi isledi. A'kesi İoram o'lgennen keyin, Axab urpaqları og'an ken'esshi bolıp, onı qulawg'a alıp keldi.
5 Axaziya olardın' ma'sla'ha'tine qulaq salıp, İzrail patshası Axab ulı İoramg'a erip, Aram patshası Xazael menen urısıw ushın Giladtag'ı Ramotqa ketti. Aramlılar İoramdı jaradar etti.
6 Patsha İoram Ramada, Aram patshası Xazael menen urısqanda, aramlılardan alg'an jaraqatın emletiw ushın İzreelge qayttı. Yahuda patshası İoram ulı Axaziya da jaradar bolg'an Axab ulı İoramdı ko'riw ushın İzreelge keldi.
7 Biraq Quday Axaziyanı İoramdı ko'riwge kelgende o'ltiriwdi sheship qoyg'an edi. Axaziya kelgennen keyin, İoram menen birge Nimshiy ulı Ehudı qarsı alıwg'a shıqtı. Jaratqan İye Ehudı maylap, Axabtın' u'y-ishin joq qılıw ushın tan'lag'an edi.
8 Ehu Axabtın' u'y-ishi u'stinen shıg'arılg'an hu'kimdi orınlap atırg'anda, Axaziyag'a xızmet etip atırg'an Yahuda basshıları menen Axaziyanın' a'jag'alarının' ullarına dus keldi ha'm olardı da o'ltirdi.
9 Keyin ol Axaziyanı izley basladı. Ehudın' adamları Axaziyanı Samariyadag'ı jasırıng'an jerinen taptı ha'm onı Ehug'a alıp kelip, sol jerde o'ltirdi. Keyin: «Bul o'zin shın ju'rekten Jaratqan İyege bag'ıshlag'an Ehoshafattın' ulı g'oy!» – dep, onı jerledi. Solay etip, Axaziyanın' u'y-ishinen patshalıq qılg'anday hesh kim qalmadı.
10 Axaziyanın' anası Ataliya ulının' o'ltirilgenin esitkende, Yahudadag'ı patsha tuqımınan bolg'anlardın' ha'mmesin qırıp taslawdı sheshti.
11 Biraq patsha İoramnın' qızı Ehoshabat Axaziya ulı İoashtı patshanın' o'ltiriliwi kerek bolg'an ulları arasınan alıp qashıp, ta'rbiyashısı menen birge jatatug'ın bo'lmege jasırıp tasladı. Usılayınsha, patsha İoramnın' qızı, ruwxaniy Ehoyadanın' hayalı, Axaziyanın' o'gey qarındası bolg'an Ehoshabat balanı Ataliyadan jasırdı. Solay etip, Ataliya balanı o'ltire almadı.
12 Ataliya el u'stinen patshalıq etip turg'anda, bala Qudaydın' İbadatxanasında olar menen altı jıl jasırın tu'rde jasadı.
