2 Jılnama 23 bob
1 Ataliyanın' hu'kimdarlıg'ının' jetinshi jılı ruwxaniy Ehoyada ku'shke tolıp, ju'zbasılar: Eroxam ulı Azariya, Ehoxanan ulı İsmayıl, Obid ulı Azariya, Adaya ulı Maaseya ha'm Zixriy ulı Elishafat penen kelisim du'zdi.
2 Olar Yahudanı aralap shıg'ıp, lebiyliler menen İzrail a'wladlarının' basshıların jıynadı ha'm Erusalimge alıp keldi.
3 Solay etip pu'tkil ja'miyet Qudaydın' İbadatxanasında patsha menen kelisim du'zdi. Ehoyada olarg'a bılay dedi: «Jaratqan İyenin' Dawıttın' urpaqlarına bergen wa'desine muwapıq, patshanın' ulı patshalıq qılıwı kerek.
4 Endi sizler bılay isleysizler: Shabbat ku'ni xızmetke keletug'ın ruwxaniyler menen lebiylilerdin' u'shten biri da'rwazalardı qarawıllasın.
5 U'shten biri patshanın' sarayın, al qalg'an u'shten biri Tiykar da'rwazasın qorg'asın. Basqa adamlardın' ha'mmesi Jaratqan İyenin' İbadatxanasının' ha'wlisine jıynalsın.
6 Ruwxaniyler menen xızmettegi lebiylilerden basqa hesh kim Jaratqan İyenin' İbadatxanasına kirmesin. Olar muxaddes bolg'anlıg'ı sebepli, ol jerge kire aladı. Basqa adamlardın' ha'mmesi Jaratqan İyenin' tapsırması boyınsha sırtta qalsın.
7 Lebiyliler quralların qolg'a alıp, patshanı qorshap tursın. İbadatxanag'a kirgen ha'r bir adam o'ltirilsin. Patsha ishke kirgende de, shıqqanda da onın' janında bolın'lar».
8 Lebiyliler ha'm pu'tkil Yahuda xalqı ruwxaniy Ehoyadanın' ha'mme buyrıqların orınladı. Ha'r bir ju'zbası Shabbat ku'ni xızmetke tu'setug'ın ha'm xızmetten shıg'atug'ın o'zinin' qol astındag'ı adamların alıp qaldı. Sebebi ruwxaniy Ehoyada toparlardın' hesh birinin' ketiwine ruxsat bermegen edi.
9 Ruwxaniy Ehoyada Qudaydın' İbadatxanasındag'ı patsha Dawıttan qalg'an nayzalardı, kishkene ha'm u'lken qalqanlardı ju'zbasılarg'a tarattı.
10 Patshanı qorg'aw ushın İbadatxananın' qublasınan arqasına deyin, qurbanlıq orınnın' ha'm İbadatxananın' a'tirapına qurallı saqshılar qoydı.
11 Ehoyada ha'm onın' ulları patshanın' ulı İoashtı sırtqa alıp shıg'ıp, basına taj kiygizdi, qolına patshalıq nızamların berip, onı patsha dep ja'riyaladı. Onı maylap, patsha etip qoydı, keyin: «Jasasın patsha!» – dep qıshqırdı.
12 Ataliya juwırısqan ha'm patshanı alg'ıslap baqırısqan xalıqtın' shawqımın esitip, Jaratqan İyenin' İbadatxanasındag'ı jıynalg'an xalıqtın' janına keldi.
13 Qarasa, patsha İbadatxananın' kireberisindegi o'renin' janında, al a'skerbasılar ha'm ka'rnayshılar onın' a'tirapında turg'an eken. Al pu'tkil u'lke xalqı bolsa, quwanısh penen ka'rnay shalıp, qosıqshılar bolsa saz a'sbaplarına qosılıp alg'ıs-maqtaw qosıqların aytıp turg'an eken. Sonda Ataliya kiyimlerin jırtıp: «Qıyanet, qıyanet!» – dep baqırdı.
14 Ruwxaniy Ehoyada Ataliyanın' Jaratqan İyenin' İbadatxanasında o'ltiriliwin qa'lemegenlikten, a'skerlerge juwapker ju'zbasılardı jiberip atırıp, olarg'a bılay dedi: «Onı aradan sırtqa alıp shıg'ın'lar ha'm og'an ergen ha'r bir adamdı qılıshtan o'tkizin'ler», – dedi.
15 A'skerler Ataliyanı tutıp aldı ha'm saraydın' At da'rwazasına a'kelip, sol jerde o'ltirdi.
16 Xalıqtın' Jaratqan İyenin' xalqı bolıwı ushın, Ehoyada o'zi, pu'tkil xalıq ha'm patsha arasında kelisim du'zdi.
17 Son'ınan pu'tkil xalıq Baaldın' butxanasına barıp, onı qıyrattı. Ondag'ı qurbanlıq orındı ha'm mu'sinlerdi buzıp tasladı, al Baaldın' ruwxaniyi Mattandı qurbanlıq orınlardın' aldında o'ltirdi.
18 Keyin Ehoyada Jaratqan İyenin' İbadatxanasının' islerin alıp barıwdı lebiyli ruwxaniylerge tapsırdı. Olarg'a Dawıt belgilegen İbadatxana xızmetlerin orınlaw, Muwsanın' Nızamında jazılg'anlarg'a muwapıq, Jaratqan İyege jandırılatug'ın qurbanlıqlar usınıw ha'm Dawıttın' buyrıg'ına muwapıq, quwanıshlı tu'rde qosıq aytıw tapsırıldı.
19 Qanday sebep penen bolsa da, haram bolg'an adamnın' Jaratqan İyenin' İbadatxanasına kirip ketpewi ushın, da'rwazag'a qarawıllar qoydı.
20 Son'ınan Ehoyada ju'zbasılardı, aqsu'yeklerdi, xalıq basshıların ha'm pu'tkil u'lke xalqın ertip, patshanı Jaratqan İyenin' İbadatxanasınan alıp shıqtı. Olar Joqarg'ı da'rwaza arqalı o'tip, patshanı taxtqa otırg'ızdı.
21 Pu'tkil u'lke xalqı shadlıqqa bo'lenip, qala tınıshlanıp qaldı. Sebebi Ataliya qılısh penen o'ltirilgen edi.
