2 Jılnama 26 bob
1 Bunnan keyin, Yahudanın' pu'tkil xalqı on altı jasar Uzziyanı* a'kesi Amasiyanın' ornına patsha etip qoydı.
2 A'kesi Amasiyanın' o'liminen keyin, Elat qalasın Yahudag'a qaytarıp alıp, onı qaytadan qurg'an usı Uzziya edi.
3 Uzziya on altı jasında taxtqa otırıp, Erusalimde eliw eki jıl patshalıq etti. Onın' anası erusalimli bolıp, atı Exoliya edi.
4 Uzziya da a'kesi Amasiyag'a uqsap, Jaratqan İyenin' na'zerinde tuwrı bolg'an islerdi isledi.
5 O'zine Qudaydan qorqıwdı u'yretken Zexariyanın' ko'zinin' tirisinde Uzziya Qudayg'a umtılıp jasadı. Ol Jaratqan İyege umtılıp jasag'anında, Quday onı tabıslı qıldı.
6 Uzziya filistlerge urıs ashıp, Gat, Yabne ha'm Ashdod qalalarının' diywalların qulattı. Keyin Ashdod janına ha'm filistlerge qaraslı basqa jerlerge qalalar qurdı.
7 Filistlerge, Gur-Baalda jasaytug'ın arablarg'a ha'm meunimlilerge qarsı urısta Quday og'an ja'rdem berdi.
8 Ammonlar Uzziyag'a salıq to'leytug'ın boldı. Onın' ku'sheygenligi sonshelli, dan'qı Mısır shegaralarına deyin jetti.
9 Uzziya Erusalimde Mu'yesh da'rwazasının', Oypatlıq da'rwazasının' ha'm diywallardın' mu'yeshlerinin' u'stine minaralar qurıp, olardı bekkemledi.
10 Ol sho'lge de minaralar qurg'ızdı, ko'plegen suw saqlag'ıshlar qazdırdı. Sebebi onın' batıstag'ı taw eteklerinde ha'm ken'islikte bag'ılıp atırg'an malları ko'p edi. Al tawlarda ha'm o'nimdar jerlerde diyxanları menen ju'zim o'siriwshi bag'manları miynet etti. Uzziya diyxanshılıqtı su'ydi.
11 Uzziyanın' toparlarg'a bo'linip, ha'rdayım urısqa tayar turg'an la'shkerleri bar edi. Olardı dizimge alıp, toparlarg'a bo'liw isin patshanın' wa'zirlerinen biri Xananiyanın' basshılıg'ında xatker Eiel ha'm qadag'alawshı Maaseya alıp bardı.
12 Bul ma'rt jawıngerlerge jetekshilik etetug'ın a'wlad basshılarının' ulıwma sanı eki mın' altı ju'z edi.
13 Olardın' qol astında urısqa jaramlı u'sh ju'z jeti mın' bes ju'z a'sker bolıp, patshag'a dushpanlarına qarsı urısıwda ja'rdem beretug'ın u'lken ku'sh edi.
14 Uzziya pu'tkil ordanı qalqan, nayza, duwlıg'a, sawıt, oq jay ha'm saqpannın' tasları menen ta'miyinledi.
15 Ol Erusalimdegi minaralar u'stine ha'm qala diywalının' mu'yeshlerine o'zinin' alımları oylap tapqan oq atatug'ın ha'm u'lken taslardı ılaqtıratug'ın urıs quralların ornattı. Onın' dan'qı alıslarg'a jayıldı. Ol Qudaydan u'lken ja'rdem alg'anlıqtan, qu'diretli patshag'a aylandı.
16 Degen menen, Uzziyanın' qu'diretli bolıwı, onın' menmensip qulawına alıp keldi. Ol Qudayı Jaratqan İyege degen sadıqlıg'ın buzıp, tu'tetki tu'tetiletug'ın orında tu'tetki tu'tetiw ushın, Jaratqan İyenin' İbadatxanasına kirdi.
17 Ruwxaniy Azariya menen Jaratqan İyenin' seksen batır ruwxaniyi patshanın' izinen ishke kirip,
18 patshanın' jolın tosıp, og'an bılay dedi: «Uzziya, Jaratqan İyege arnap tu'tetki tu'tetiwge haqın'ız joq! Tu'tetki tu'tetiw – bul Xaron urpaqlarınan bolg'an bag'ıshlang'an ruwxaniylerdin' isi. Muxaddes orınnan shıg'ıp ketin'! Siz jınayatqa qol urdın'ız. Quday İye de bul isin'izdi maqullamaydı».
19 Tu'tetki tu'tetiw ushın, xosh iyisli zatlar salıng'an tabanı qolına uslap turg'an Uzziya ruwxaniylerge qattı ashıwlandı. Sol waqıtta-aq, olardın' ko'z aldında Uzziyanın' man'layında jaman teri keselliginin' dag'ı payda boldı. Bul Jaratqan İyenin' İbadatxanasındag'ı tu'tetki tu'tetiletug'ın orın janında ju'z bergen edi.
20 Bas ruwxaniy Azariya ha'm barlıq ruwxaniyler patshag'a qarag'anda, onın' man'layında jaman teri keselligi payda bolg'anın ko'rdi ha'm onı sırtqa shıg'arıwg'a asıqtı. Patshanın' o'zi de Jaratqan İyenin' jazasına jolıqqanın tu'sinip, ol jerden ketiwge asıqtı.
21 Ol bir o'mir jaman teri keselliginen qutıla almadı. Sonlıqtan ol Jaratqan İyenin' İbadatxanasına kire almay, bo'lek bir u'yde jasadı. Saraydı ha'm u'lke xalqın onın' ulı İotam basqardı.
22 Uzziyanın' basqa islerin basınan aqırına deyin, Amos ulı payg'ambar İyshaya jazıp qaldırg'an.
23 Uzziya o'lip, ata-babalarına qosılg'anda, jaman teri keselligi menen awırg'anlıg'ı sebepli, patshalar qoyılatug'ın qa'birge emes, al onın' qasındag'ı atızg'a jerlendi. Onın' ornına ulı İotam patsha boldı.
