2 Jılnama 28 bob

Yahuda patshası Axaz(1-27).

¹ Axaz jigirma jasında patsha bolıp, Erusalimde on altı jıl patshalıq etti. Ol babası Dawıtqa uqsamadı, Jaratqan İyenin' na'zerinde tuwrı bolg'an islerdi islemedi.

² Axaz İzrail patshalarının' jolınan ju'rdi. Ha'tte, Baallarg'a tabınıw ushın quyma but mu'sinlerin isletti.

³ Ol BenHinnom oypatlıg'ında qurbanlıqlar jandırdı, ha'tte, Jaratqan İye İzrail xalqının' aldınan quwıp jibergen milletlerdin' jerkenishli da'stu'rlerine eliklep, o'z ulın otqa jag'ıp qurban etti.

⁴ Ol sıyınıw orınlarında, ha'r bir biyiklikte ha'm qoyıw japıraqlı terektin' astında qurbanlıqlar berip, tu'tetkiler tu'tetti.

⁵ Sol sebepli Qudayı Jaratqan İye Axazdı Aram patshasının' qolına berdi. Aramlılar onı jen'ip, xalqınan ko'p adamlardı tutqın etip, Damaskke alıp ketti. Bunnan tısqarı, onı İzrail patshasının' da qolına berdi. İzrail patshası Axazdı u'lken qırg'ıng'a ushırattı.

⁶ zrail patshası Remaliya ulı Peqax bir ku'nde Yahuda a'skerlerinen bir ju'z jigirma mın' bahadır jawıngerdi o'ltirdi. Sebebi olar ata-babalarının' Qudayı Jaratqan İyeni ta'rk etken edi.

⁷ Efrayımlı Zixriy atlı batır a'sker patshanın' ulı Maaseyanı, saray basqarıwshısı Azriqamdı ha'm patshanın' bas wa'ziri Elqananı o'ltirdi.

⁸ İzraillılar o'zlerinin' tuwısqanı bolg'an yahudalılardan eki ju'z mın' hayal ha'm balalardı tutqın qılıp, ko'p olja menen birge Samariyag'a alıp ketti.

⁹ Samariyada Jaratqan İyenin' Oded atlı payg'ambarı bar edi. Ol qaytıp kiyatırg'an la'shkerlerdin' aldınan shıg'ıp, olarg'a bılay dedi: «Atababaların'ızdın' Qudayı Jaratqan İye Yahuda xalqına g'a'zeplengeni ushın olardı sizlerge ta'slim etti. Biraq sizlerdin' olardı qanday qa'ha'rge minip qırg'anın'ız aspang'a jetip bardı.

¹⁰ Bul az bolg'anday, endi bolsa Yahuda ha'm Erusalim turg'ınların o'zlerin'izge qul qılmaqshısız. O'zlerin'iz ne, Qudayın'ız Jaratqan İyege hesh gu'na qılmadın'ız ba?

¹¹ Sonlıqtan mag'an qulaq salıp, tutqıng'a alg'an tuwısqanların'ızdı izge qaytarın'lar! O'ytkeni, Jaratqan İyenin' lawlag'an g'a'zebi u'stin'izge do'nip tur!»

¹² Sonda Efrayım xalqının' ayırım ko'semleri: Ehoxanan ulı Azariya, Meshillemot ulı Berexiya, Shallum ulı Xizkiya ha'm Xadlay ulı Amasa urıstan qaytqanlarg'a qarsı turıp:

¹³ «Tutqınlardı bul jerge alıp kelmen'ler. Bizler Jaratqan İyenin' aldında ayıplı bolıp qalamız. Yamasa gu'na ha'm ayıplarımızdı ja'ne de ko'beytiwdi qa'leysizler me? Onısız da ayıplarımız ko'p, Jaratqan İyenin' lawlag'an g'a'zebi İzraildın' u'stine do'nip tur», – dedi.

¹⁴ Sonda a'skerler tutqınlar menen oljalardı ko'semler menen pu'tkil jıyın turg'an jerge qaldırıp ketti.

¹⁵ Joqarıda atı atalg'an to'rt ko'sem orınlarınan turıp, tutqınlarg'a g'amxorlıq etti. Olardın' kiyimi joqlarına oljadag'ı kiyimlerden alıp, kiyim kiygizdi, ayaq kiyim berdi, ishkizip-jegizdi, jaralarına may jaqtı. Haldan tayg'anların eshekke mingizip, ha'mmesin palma ag'ashları o'setug'ın Erixo qalasındag'ı ag'ayinlerine alıp bardı. Keyin o'zleri Samariyag'a qayttı.

¹⁶ Sol arada patsha Axaz ja'rdem sorap, Assiriya patshasına elshi jiberdi.

¹⁷ Sebebi edomlılar qaytadan Yahudag'a hu'jim jasap, adamların tutqın etip, alıp ketken edi.

¹⁸ Bunın' u'stine, filistler Yahudanın' batısındag'ı taw eteklerindegi ha'm qublasındag'ı qalalarg'a shabıwıl jasap, Beyt-Shemesh, Ayyalon, Gederot qalaların, sonday-aq Soxo, Timna, Gimzo qalaların a'tirapındag'ı awılları menen qosa basıp alıp, ol jerlerge qonıslanıp aldı.

¹⁹ Jaratqan İye Yahudanı patshası Axazdın' kesirinen ayaq-astı qıldı. Axaz Yahudanı gu'nag'a baslap, o'zi de Jaratqan İyege opasızlıq etken edi.

²⁰ Solay etip, Assiriya patshası Tilgat-Pilneser Axazg'a keldi. Biraq ol ja'rdem beriwdin' ornına, onı qısqıg'a ala basladı.

²¹ Axaz Jaratqan İyenin' İbadatxanasındag'ı, o'zinin' sarayındag'ı ha'm ha'kimlerinin' u'ylerindegi bahalı na'rselerdi alıp, Assiriya patshasına salıq retinde berdi. Biraq bul da og'an ja'rdem bermedi.

²² Awır ku'nlerdi basınan keshirip atırsa da, Axaz Jaratqan İyege degen opasızlıg'ın burıng'ıdan da ku'sheytti. Awa, ol – patsha Axaz-da'!

²³ Ol: «Aram patshalarının' qudayları olarg'a ja'rdem berip kelmekte. Endi olarg'a qurbanlıq bersem, olar da mag'an ja'rdem berer», – dep oylap, o'zin jen'iliske ushıratqan Damask qalasının' qudaylarına qurbanlıqlar berdi. Biraq, tilekke qarsı, olar Axazdın' o'zinin' ha'm pu'tkil İzraildın' qulawına sebepshi boldı.

²⁴ Axaz Qudaydın' İbadatxanasındag'ı buyımlardı jıynap, maydaladı. Ja'ne, Jaratqan İyenin' İbadatxanasının' qapıların japtırıp tasladı ha'm Erusalim ko'shelerinin' ha'r bir mu'yeshine qurbanlıq orınlar qurdırdı.

²⁵ Ol basqa qudaylarg'a arnap tu'tetkiler tu'tetiw ushın, Yahudanın' ha'r bir qalasına sıyınıw orınların qurıp, ata-babalarının' Qudayı Jaratqan İyeni g'a'zeplendirdi.

²⁶ Axazdın' basqa isleri ha'm barlıq is-ha'reketleri bastan ayag'ına shekem Yahuda ha'm İzrail patshalarının' jılnama kitabında jazılg'an.

²⁷ Axaz o'lip ata-babalarına qosıldı ha'm Erusalim qalasında jerlendi. Biraq onı İzrail patshalarının' mazarına qoymadı. Onın' ornına ulı Xizkiya patsha boldı.