2 Jılnama 30 bob

Qutqarılıw bayramına tayarlıq(1-27).

¹ Xizkiya pu'tkil İzrail ha'm Yahudag'a xabar jiberip, Efrayım ha'm Menashshe urıwlarına da xat jazıp, olardı İzraildın' Qudayı Jaratqan İyege arnap Qutqarılıw bayramın nıshanlaw ushın Erusalimdegi Jaratqan İyenin' İbadatxanasına mira't etti.

² Patsha, onın' wa'zirleri ha'm Erusalimdegi pu'tkil jıyın ken'esip, bayramdı ekinshi ayda o'tkeriwdi sheshti.

³ Olar bayramdı belgilengen waqıtta, birinshi ayda o'tkere almag'an edi. Sebebi pa'kleniw ra'siminen o'tken ruwxaniyler jetkiliksiz boldı ha'm xalıq ta Erusalimge jıynalıp u'lgermedi.

⁴ Bul usınıs patshag'a da, pu'tkil jıyıng'a da unadı.

⁵ Solay etip, olar pu'tkil İzrail boylap, qubladag'ı Beer-Shebadan arqadag'ı Dang'a shekemgi pu'tkil xalıq İzraildın' Qudayı Jaratqan İyege arnap Qutqarılıw bayramın nıshanlaw ushın Erusalimge kelsin dep ja'riyalawdı sheshti. Sebebi bul bayram jazılg'ang'a say ulıwma xalıqlıq bayram sıpatında nıshanlanbay kiyatırg'an edi.

⁶ Patshanın' buyrıg'ı boyınsha, shabarmanlar patshanın' ha'm onın' xızmetkerlerinin' jazg'an xatın pu'tkil İzrail ha'm Yahuda boylap tarattı. Onda bılay dep jazılg'an edi: «İzrail xalqı, İbrayımnın', Isaqtın' ha'm İzraildın' Qudayı Jaratqan İyege qaytın'lar! Sonda Ol da sizlerge, Assiriya patshalarının' qolınan aman qalg'anlarg'a qaytadı.

⁷ Ata-babalarının' Qudayı Jaratqan İyege opasızlıq etken ata-babaların'ız ha'm tuwısqanların'ız sıyaqlı bolman'lar! Ko'rip turg'anın'ızday, Jaratqan İye olardı qorqınıshlı ko'riniske alıp keldi.

⁸ Ata-babaların'ız sıyaqlı qaysar bolmay, Jaratqan İyege boysının'lar! Onın' ma'n'gige muxaddes qılg'an Muxaddes ornına kelip, u'stin'izge do'nip turg'an Onın' lawlag'an g'a'zebinin' basılıwı ushın, Qudayın'ız Jaratqan İyege xızmet etin'ler!

⁹ Eger Jaratqan İyege ju'z bursan'ız, ag'ayinlerin'izdi ha'm balaların'ızdı tutqında uslap turg'anlar olarg'a rehim etip, olardı usı elge qaytaradı. Sebebi Qudayın'ız Jaratqan İye miyrimli ha'm rehimli. Eger Og'an qaytsan'ız, Ol sizlerden ju'z burmaydı».

¹⁰ Solay etip, shabarmanlar Efrayım ha'm Menashshe jerlerin Zebulong'a shekem qalama-qala aralap shıqtı. Biraq adamlardın' ko'pshiligi jarshılardın' u'stinen ku'lip, masqaraladı.

¹¹ Degen menen, Asher, Menashshe ha'm Zebulon urıwlarının' ayırımları boysınıp, Erusalimge keldi.

¹² Ju'reklerine birlik ruwxın sıylag'an Jaratqan İyenin' qolı da Yahuda u'stinde bolıp, xalıqta patsha ha'm onın' wa'zirlerinin' Jaratqan İyenin' so'zi boyınsha bergen buyrıg'ın orınlawg'a degen qa'lew tuwdırdı.

¹³ Ekinshi ayda Ashıtqısız nan bayramın nıshanlaw ushın, ju'da' u'lken alaman Erusalimge jıynaldı.

¹⁴ lar iske kirisip, Erusalimdegi jat qudaylarg'a arnalg'an qurbanlıq orınlardı ha'm tu'tetki tu'tetiletug'ın barlıq qurbanlıq orınlardı qıyratıp, Kidron sayına ılaqtırdı.

¹⁵ Ekinshi aydın' on to'rtinshi ku'ni olar Qutqarılıw bayramına arnalg'an qurbanlıq qozısın shaldı. Ruwxaniyler menen lebiyliler uyalıp qalıp, o'zlerin pa'kledi ha'm Jaratqan İyenin' İbadatxanasına jandırılatug'ın qurbanlıqlar alıp keldi.

¹⁶ Keyin olar Qudaydın' adamı Muwsanın' nızamı boyınsha, o'z orınların iyeledi. Ruwxaniyler lebiyliler a'kelip bergen qurbanlıq qanın alıp, qurbanlıq orıng'a septi.

¹⁷ Xalıq arasında o'zlerin pa'klemegen adamlar ko'p edi. Sonlıqtan tazalanıw ra'siminen o'tpegenlerdin' Qutqarılıw qurbanlıg'ın soyıw ha'm olardı Jaratqan İyege bag'ıshlaw lebiylilerge ju'klendi.

¹⁸ Xalıqtın' ko'pshiligi, a'sirese Efrayım, Menashshe, İssaxar ha'm Zebulon urıwlarınan kelgenlerdin' ko'bisi pa'kleniw ra'siminen o'tpegen bolsa da, Qutqarılıw bayramının' asınan jep, qag'ıydanı buzdı. Biraq Xizkiya olar ushın bılay dep duwa etti: «İygilikli Jaratqan İye!

¹⁹ Bul adamlar Muxaddes orınnın' nızamına say o'zlerin pa'klemegen bolsa da, olar ata-babalarının' Qudayı – Quday İyeni shın ju'rekten izledi, sonlıqtan olardın' ha'r birin keshire go'r!»

²⁰ Jaratqan İye Xizkiyanın' duwasın esitti ha'm xalıqtı keshirdi.

²¹ Erusalimge jıynalg'an izraillılar jeti ku'n dawamında u'lken quwanısh penen Ashıtqısız nan bayramın nıshanladı. Lebiyliler menen ruwxaniyler Jaratqan İyeni ta'riyiplewge arnalg'an saz a'sbapları menen ha'r ku'ni Jaratqan İyege arnap alg'ıs-maqtaw ayttı.

²² Xizkiya Jaratqan İyege degen xızmetlerin sheberlik penen atqarg'an lebiylilerdi jigerlendirdi. Xalıq jeti ku'n dawamında tatıwlıq qurbanlıqların berdi, ata-babalarının' Qudayı Jaratqan İyege alg'ıslar aytıp, bayram asınan jedi.

²³ Pu'tkil jıyın bayramdı ja'ne jeti ku'nge sozıwg'a qarar etti. So'ytip, olar ja'ne jeti ku'n quwanısh penen bayram qıldı.

²⁴ Yahuda patshası Xizkiya jıynalg'anlarg'a mın' bug'a ha'm jeti mın' qoy-eshki berdi. Al ha'meldarlar bolsa, mın' bug'a ha'm on mın' qoy-eshki berdi. Ju'da' ko'p ruwxaniyler pa'klew ra'siminen o'tken edi.

²⁵ Pu'tkil Yahuda xalqı, ruwxaniyler, lebiyliler, İzraildan kelgenler, İzraildan kelip Yahudada jasap atırg'an jat jerliler quwanıshqa tolg'an edi.

²⁶ Erusalimde ullı quwanısh hu'kim su'rdi. Sebebi İzraildın' patshası Dawıt ulı Sulaymannın' da'wirinen beri Erusalimde bunday bayram bolıp ko'rmegen edi.

²⁷ Ruwxaniyler menen lebiyliler xalıqqa pa'tiya berdi. Quday olardı esitti, olardın' duwaları ko'klerge, Onın' muxaddes ma'kanına jetip bardı.